Dual Panel1Ida Sang Hyang Widi Wasa Sane Maha Kuasa ngandika ring parapanditane sapuniki: “Pituduhe ene katiba teken kita ajak makejang.
2Kita patut ngluihang Ulun aji laksanan kitane. Yening kita tusing madingehang pangandikan Ulune, ditu Ulun lakar nibakang temah teken kita. Ulun lakar nibakang temah marep teken sakancan pikolih ane tampi kita. Sujatinne Ulun suba nemah pikolih-pikolih kitane ento, sawireh kita tusing teleb nyalanang pituduh Ulune.
3Ulun lakar nyisipang pianak-pianak kitane muah lakar nguap muan kitane aji tain wewalungan aturan kitane, tur kita lakar kentungang ka jabaan sig tongos dugdugan taine.
4Sasubane keto kita lakar nawang, mungguing Ulun suba maicayang pituduhe ene teken kita, apanga prajanjian Ulune teken parapandita parakaturunan Lewine, tusing lakar kalompangin.
5Sajeroning prajanjian Ulune ento, Ulun majanji ngicen ia idup muah sutrepti rahayu, tur ento ane paicayang Ulun teken ia, apanga ia prasida subakti teken Ulun. Dugase ento ia pada subakti muah nungkul teken Ulun.
6Ia pada minehin paundukan ane patut, tur tusing minehin paundukan ane pelih. Ia pada idup salulut teken Ulun, ia tusing nglaksanayang paundukan ane beneh pabuat dewekne padidi dogen, nanging ia masih liu nulungin anak ane lenan apanga suud malaksana corah.
7Ento ane mula dadi tetegenan parapanditane, buat ngurukang kaweruhan Ida Sang Hyang Widi Wasa ane patut. Anake patut pada teka sig parapanditane, buat mlajahin pakarsan Ulune, sawireh parapanditane ento dadi utusan Ida Sang Hyang Widi Wasa Ane Maha Kuasa.
8Nanging ane jani, kita soroh panditane, suba lempas uli jalane ane beneh. Paurukan kitane suba liu mimpin anak malaksana ane pelih. Kita suba lompang teken prajanjian ane gae Ulun ngajak kita.
9Sawireh keto, Ulun lakar ngadakang wong Israele pada nganistayang kita sawireh kita tusing satinut teken pakarsan Ulune. Buina yening kita ngurukang kaulan Ulune, tusing patuh baan kita maang paurukan.”
Indik
10Boyake iraga sareng sami maderbe aji wantah adiri? Boyake iraga sareng sami kakardi antuk Widi sane tunggal? Duaning punika, napi awinannya iraga lompang ring janjin iragane marep ring timpal iragane? Samaliha napi awinannya iraga nganistayang prajanjian sane kakardi antuk Ida Sang Hyang Widi Wasa ring leluur iragane?
11Wong Yehudane sampun lompang ring janjinnyane pamantuka ring Ida Sang Hyang Widi Wasa, tur ipun nglaksanayang paindikan sane cemer ring Yerusalem miwah ring sakuub jagate sami. Ipun ngletehin Perhyangan Agung sane kasuecanin antuk Ida Sang Hyang Widi Wasa. Jadmane sane muani-muani sampun pada masomahan ring anak luh-luh sane nyungsung widi-widi sunantara.
12Dumadak Ida Sang Hyang Widi Wasa ngingsirang sakancan jadmane sane malaksana kadi asapunika saking patunggilan pasamuan Israele, tur nenten malih nglugrain ipun sareng-sareng ring bangsan iragane, buat ngaturang aturan ring ayun Ida Sang Hyang Widi Wasa Sane Maha Kuasa.
13Puniki paindikan sane lianan sane laksanayang semetone. Semeton nyiram pamorboran aturan Ida Sang Hyang Widi Wasa antuk toyan panyingakan, samaliha semeton nangis miwah masesambatan, santukan Ida nenten malih nrima aturan sane aturang semeton ring Ida.
14Semeton nunasang, napi awinannya Ida nenten ledang nrima aturane punika. Santukan Ida uning mungguing semeton sampun lompang ring janjin semetone marep ring rabin semetone, sane ambil semeton duke daa miwah truna. Ipun sampun dados timpal semetone, tur semeton sampun lompang ring janjin semetone ngajak ipun, yadiastun semeton majanji ring ayun Ida Sang Hyang Widi Wasa, mungguing semeton jaga satia tuu ring ipun.
15Boyake Ida Sang Hyang Widi Wasa nadosang semeton nunggal raga miwah roh ring ipun? Napike sane karsayang Ida sajeroning paindikane punika? Sane arsayang Ida inggih punika semeton patut madue oka, tur okan semetone dados kaulan Idane Sang Hyang Widi Wasa sane sujati. Duaning punika elingja, sampunang wenten ring pantaran semetone sane jaga lompang ring janjinnyane marep ring somahnyane.
16Ida Sang Hyang Widi Wasa, Widin Israele masabda, sapuniki: “Ulun geting teken anak ane palas makurenan. Ulun geting teken anak ane ngambekang kawirosan teken somahnyane. Ingetangja mungguing kita tusing dadi lompang teken janji ane patut tuonin kita marep teken somah kitane.”
Rahin
17Semeton sampun makewuhin Ida Sang Hyang Widi Wasa antuk baos semetone. Nanging semeton mataken sapuniki: “Kadi asapunapike antuk tiang makewuhin Ida?” Malantaran semeton mabaos sapuniki: “Ida Sang Hyang Widi Wasa Sane Maha Kuasa mitaenang sakancan jadmane sane malaksana jaat punika becik, sujatinipun Ida ledang ring ipun sareng sami.” Wiadin malantaran semeton mataken sapuniki: “Dijake Ida Sang Hyang Widi Wasa sane kasinanggeh adil punika?”