Dual PanelSesam
1Duh Ratu Sang Hyang Widi Wasa, titiang muji Palungguh IRatu. Sampunangja Palungguh IRatu meneng kewanten.
2Jadmane dursila miwah jadmane bobab sampun nyiatin titiang. Ipun sampun misunayang titiang.
3Samaliha ipun maosang indik-indik sane tan patut ngeniang indik titiange, tur tan pakrana ipun nyiatin titiang.
4Ipun nglawan titiang yadiastun titiang nresnain ipun tur sampun ngastawayang ipun.
5Ipun ngwales kabecikan titiange antuk kadursilan miwah tresnan titiange kawales antuk angkara murka.
6Ledang Palungguh IRatu ngamanggehang hakim sane tan adil jaga nepasin meseh titiange, tur banggayang mesehipune nalih ipun.
7Dumadak ipun katepasin, tur kabaos iwang samaliha dumadak pangastawannyane dados kiwangannyane.
8Dumadak ipun gelis padem, tur dumadak pakaryanipune kambil antuk anak lianan.
9Dumadak pianak-pianakipune dados anak ubuh miwah somahipune dados anak balu.
10Dumadak pianakipune ngumbara dados gegendong saparan-paran. Dumadak ipun katundung saking genah padunungannyane sane sampun uug.
11Dumadak anake sane mutangang ring ipun pada ngambil sakancan paderbeanipune samaliha dumadak sakancan pamuponipune kajarah antuk anak tiosan.
12Dumadak mangda nenten wenten anak sane madalem ipun, wiadin matiningin pianakipune sane ubuh, sane tinggalin ipun.
13Dumadak mangda katurunanipune padem makasami samaliha dumadak wastanipune nenten pacang kasambat ring katurunan sane jaga rauh.
14Dumadak Ida Sang Hyang Widi Wasa eling ring kadursilan leluuripune, tur nenten naenin ngampurayang dosa-dosan memenipune.
15Dumadak Ida Sang Hyang Widi Wasa tansah eling ring dosa-dosanipune samaliha dumadak ipun newek nenten kelingang malih.
16Jadmane punika nenten naenin mamanah nresnain anak tios. Ipun tansah nyangsarain miwah ngamademang anak tiwas, anak sane kakirangan miwah anak sane nenten maderbe pitulungan.
17Ipun demen nemah anak. Duaning punika dumadak ipun keni temah! Ipun tan demen ngamertanin anak, duaning punika dumadak nenten wenten anak sane ngamertanin ipun.
18Ipun sampun biasa nemah misuh sakadi ipun nyaluk panganggenyane. Duaning punika dumadak temahnyane nyrekcek kadi toya nyusup sikiannyane, tur sakadi minyak nyusup tulang-tulangipune.
19Dumadak temahnyane ngaput ipun sakadi kawaca, tur setata nglilit ipun sakadi sabuk!
20Duh Ratu Sang Hyang Widi Wasa, ukumja meseh-meseh titiange kadi asapunika, inggih punika anake sane mamanah dursila ring titiang.
21Nanging duh Ratu Sang Hyang Widi Wasa, Widin titiang, tulungja titiang anut ring janjin Palungguh IRatune samaliha luputangja titiang malantaran kabecikan sih pasuecan Palungguh IRatu.
22Titiang sangsara tur nista. Atin titiange matatu raat pisan.
23Titiang tan bina sakadi lawate rikala sore, sane gelis ical. Titiang kampehang angin sakadi balange.
24Lulud titiange lemet duaning kakirangan teda, tur sikian titiange berag tegreg, kantun ikulit ngaput itulang.
25Ritatkala titiang kapanggih ring anak tios, ipun ngedekin titiang. Ipun pada ngadesem ring titiang.
26Duh Ratu Sang Hyang Widi Wasa, Widin titiange, tulunginja titiang malantaran sih pasuecan Palungguh IRatu sane nenten rered-rered, tur rahayuangja titiang.
27Banggayang mangda meseh-meseh titiange uning, mungguing wantah Palungguh IRatu sane ngrahayuang titiang.
28Banggayang ipun nemah titiang, nanging Palungguh IRatu sane jaga ngamertanin titiang. Dumadak sangsaran titiange ngawinang ipun kaon, nanging dumadak titiang parekan Palungguh IRatune jaga masuka rena.
29Dumadak meseh-meseh titiange jaga kakaput antuk kimud, tur dumadak kimudipune punika sakadi panganggenipune.
30Titiang jaga masuryak ngaturang panyuksma ring Ida Sang Hyang Widi Wasa. Titiang jaga muji Ida ring pasangkepan rakyate.
31Santukan Ida nindihin jadmane sane tiwas, tur ngluputang ipun saking jadmane sane jaga ngepet patinipune.