Dual PanelBagia
1Pujija Ida Sang Hyang Widi Wasa! Bagia anake sane ngluihang Ida Sang Hyang Widi Wasa, sane saking liang ngamargiang sapatitah Idane.
2Pianak-pianak jadmane sane patut jaga mawisesa ring jagate, tur katurunannyane pacang molih merta.
3Kulawargannyane wibuh, tur ipun jaga gemuh landuh salami-laminipun.
4Ring sajeroning peteng dedet, jaga wenten galang masinar pabuat anake sane patut, sane kapiolasan, panyayang miwah adil.
5Bagia anake sane mutangang, sane saking jujur ngamargiang pakaryannyane.
6Anake sane patut jaga tansah sida karya, tur ipun setata jaga kelingang.
7Ipun nenten jaga ajerih nrima orti sane kaon. Pangegan ipune kukuh bakuh tur ipun pracaya ring Ida Sang Hyang Widi Wasa.
8Ipun nenten sangsaya wiadin ajerih. Ipun pracaya jaga manggihin meseh-meseh ipune kaon.
9Ipun mapadana ring anake sane kakirangan, tur kapiolasan ipune nenten rered-rered. Ipun jaga mawisesa tur kajiang.
10Rikala jadmane sane dursila ngeton paindikane puniki, ipun sami pada pedih. Ipun pedih angarab-arab, raris sirna. Pangajap-ajap ipune sirna kantos salami-laminipun.