Dual PanelSang
1Buana miwah sadagingipun makasami punika druen Ida Sang Hyang Widi Wasa. Mrecapada miwah saananing sane urip irika taler druen Idane.
2Ida ngardi buana punika ring duur toyane sane ring sor pretiwine, tur dasarnyane kapasang ring sawang samudrane.
3Sapasirake sane wenang mamargi ngungsi Gunung Ida Sang Hyang Widi Wasa? Sapasirake sane kalugra ngranjing ring Perhyangan Agung Idane sane suci?
4Wantah jadmane sane suci laksana miwah pepinehipune, sane nenten nyumbah arca-arca, wiadin nenten lompang ring pasubaya.
5Ida Sang Hyang Widi Wasa jaga ngamertanin ipun tur ngrahayuang ipun. Ida Sang Hyang Widi Wasa jaga nyinahang mungguing ipun tan paiwang.
6Kadi asapunika indik jadmane sane rauh tangkil ring Ida Sang Hyang Widi Wasa, sane tangkil ring ajeng Widin Dane Yakube.
7Linggahangja ngampakang gapurane, ampakangja lawang-lawange sane purwaka santukan Ida Sang Prabu Sane Linuih jaga ngranjing.
8Sapasirake Sang Prabu Sane Linuih punika? Ida punika Sang Hyang Widi Wasa, sane kuat tur wisesa, Sang Hyang Widi sane jaya ring rana.
9Linggahangja ngampakang gapurane, ampakangja lawang-lawange sane purwaka santukan Ida Sang Prabu Sane Linuih jaga ngranjing.
10Sapasirake Sang Prabu Sane Linuih punika? Ida punika Sang Hyang Widi Wasa sane menang. Ida punika Sang Prabu Sane Agung.