Dual PanelKarma
1Sampunangja rumasa meweh ring jadmane sane dursila. Sampunangja iri ati ring jadmane sane malaksana iwang.
2Ipun digelis pacang sirna waluya sakadi padange sane tuh. Ipun jaga padem sakadi tetanduran sane layu.
3Pracayaja ring Ida Sang Hyang Widi Wasa tur rarisang malaksana ayu. Uripja ring jagate saha muponin sutrepti.
4Ulatija bagian semeton sajeroning Ida Sang Hyang Widi Wasa, janten Ida pacang maicayang ring semeton paindikan sane edotang semeton.
5Aturangja ragan semetone ring Ida Sang Hyang Widi Wasa. Pracayaja ring Ida janten Ida jaga nulungin semeton.
6Ida jaga ngawinang kapatutan semetone masinar sakadi suryane rikalaning tengai tepet.
7Sabar tur jantosja Ida Sang Hyang Widi Wasa. Sampunangja meweh mikayunin anake sane gemuh, wiadin mikayunin anake sane sida karya sajeroning rencananipune sane corah.
8Sampunangja meweh ring kayun wiadin duka, santukan indike punika wantah nuntun ngungsi kamewehan.
9Anake sane pracaya ring Ida Sang Hyang Widi Wasa, ipun jaga nerbeang jagate nanging jadmane sane dursila jaga katundung saking irika.
10Jadmane sane dursila digelis pacang sirna. Semeton dados ngrereh ipun, nanging ipun nenten jaga keniang semeton.
11Jadmane sane alap asor ipun jaga nerbeang jagat, tur muponin kawiryan miwah sutrepti.
12Jadmane dursila sampun pada igum jaga nglawan jadmane sane becik, tur mandreng ipun maduluran antuk manah geting.
13Nanging Ida Sang Hyang Widi Wasa ica ngaksi jadmane dursila, santukan Ida wikan mungguing ipun digelis jaga kasirnayang.
14Jadmane dursila pada ngaud pedang miwah mentang panahipune buat jaga mademang anake sane tiwas miwah kakirangan miwah buat munggal anake sane malaksana patut.
15Nanging ipun jaga kapademang antuk pedangipune niri, tur panahipune jaga lung.
16Paindikan sane alit sane kaderbeang antuk jadmane sane becik, punika langkungan ajinipun ring kasugihan sakancan jadmane dursila,
17santukan Ida Sang Hyang Widi Wasa jaga mancut kasitengan jadmane dursila, nanging nyayubin anake sane patut.
18Ida Sang Hyang Widi Wasa matiningin anake sane satinut ring Ida, tur jagate jaga dados paderbeanipune kantos salami-laminipun.
19Ipun nenten jaga katibenin sangsara rikala wenten masa sane kaon. Rikalaning masan sayah ipun tansah cukup pangan kinum.
20Nanging jadmane dursila jaga padem. Meseh-meseh Ida Sang Hyang Widi Wasa jaga sirna waluya sakadi sekare. Ipun pacang sirna sakadi anduse.
21Jadmane dursila demen nyilih tur nenten naenin ngwaliang, nanging anake sane becik ipun demen makidihang.
22Anake sane kamertanin antuk Ida Sang Hyang Widi Wasa, ipun jaga nerbeang jagate, nanging jadmane sane katemah antuk Ida jaga katundung saking irika.
23Ida Sang Hyang Widi Wasa nuntun jadmane ring margi sane patut tuut ipun, tur Ida nyayubin anake sane ledangin Ida.
24Yening ipun labuh, ipun nenten jaga kantos bah, santukan Ida Sang Hyang Widi Wasa jaga nyaga ipun.
25Sane mangkin titiang sampun tua, titiang sampun urip sue pisan nanging titiang durung naenin manggihin anak sane patut kakutang antuk Ida Sang Hyang Widi Wasa, wiadin pianak-pianakipune ngagendong ngidih daar.
26Sapanjang masa ipun lila makidihang miwah maselangang ring anak lian tur pianak-pianakipune sami dados merta.
27Mabalikja saking paindikan sane corah tur laksanayangja paindikan sane ayu, janten katurunan semetone jaga tan mari urip ring jagate.
28Santukan Ida Sang Hyang Widi Wasa asih sueca ring paindikan sane patut tur Ida nenten ngutang kaulan Idane sane satia tuu. Ida nyayubin ipun salami-laminipun, nanging sentanan jadmane sane dursila jaga tundung Ida.
29Anake sane patut jaga nerbeang jagate tur muponin urip irika kantos salami-laminipun.
30Baos jadmane sane patut punika wicaksana, tur ipun setata jujur.
31Ipun ngagem pidabdab Widinipune ring manahipune, tur nenten naenin matilar saking irika.
32Jadmane sane dursila nyadang anake sane patut tur mamanah ngamademang ipun.
33Nanging Ida Sang Hyang Widi Wasa, nenten jaga ngutang ipun ring kakuasan meseh-mesehipune, wiadin manggayang ipun kasisipang rikalaning ipun ring ajeng pangadilane.
34Gantungangja pangajap-ajap semetone ring Ida Sang Hyang Widi Wasa, tur tinutinja titah-titah Idane. Ida pacang ngajiang semeton malantaran mapaica tanah ring semeton, tur semeton jaga ngeton jadmane dursila katundung saking irika.
35Titiang naenin manggihin jadmane dursila sane nyapa kadi aku. Ipun nyeleg ring pantaran sakancan jadmane lianan waluya sakadi wit taru arase ring Libanon.
36Nanging pungkuran rikala titiang nglintang irika, ipun nenten kantun irika. Titiang ngrereh ipun, nanging ipun nenten keniang titiang.
37Tlektekangja jadmane sane polos, tur tureksainja jadmane sane patut. Anake sane sutrepti rahayu pada maderbe katurunan,
38nanging jadmane sane madosa kabasmi kerta makasami tur katurunanipune sami kakaonang.
39Ida Sang Hyang Widi Wasa ngrahayuang jadmane sane patut, tur nyayubin ipun rikalaning masa kamewehan.
40Ida nulungin tur ngluputang ipun. Ida ngrahayuang ipun saking jadmane dursila santukan ipun rauh maranin Ida buat nunas pasayuban.