Dual PanelPanga
1Duh Ratu Sang Hyang Widi Wasa, Widin titiange, titiang tangkil ring ayun Palungguh IRatu buat nunas pasayuban. Luputang tur rahayuangja titiang saking sakancan jadmane sane nguber titiang.
2Yen nenten kadi asapunika, ipun waluya sakadi singane malaibang titiang, tur nenten wenten anak sane ngluputang titiang. Irika ipun jaga mokeng-mokeng titiang.
3Duh Ratu Sang Hyang Widi Wasa, Widin titiange, yening titiang sampun malaksana iwang ring anak lianan, tur yening titiang sampun nilas sawitran titiange, wiadin titiang sampun madalem anake sane tan pakrana ngiwangang titiang, yening titiang sampun nglaksanayang sinalih tunggal paindikane puniki,
4(7:3)
5banggayangja meseh-meseh titiange nguber tur ngejuk titiang, banggayang titiang tan mangkihan ring tanahe.
6Duh Ratu Sang Hyang Widi Wasa, durusang margiang pidukan Palungguh IRatu! Rarisang mapas brangtin meseh titiange. Matangi tur icenja titiang pitulungan. Palungguh IRatu ngarsayang kadilan.
7Duaning punika punduhangja bangsa-bangsane sami ring ayun Palungguh IRatu, tur titahja ipun makasami saking luur.
8Palungguh IRatu maraga hakim pabuat bangsa-bangsane makasami. Duh Ratu Sang Hyang Widi Wasa, tepasin tur iloninja titiang. Palungguh IRatu wikan mungguing titiang nenten iwang.
9Palungguh IRatu maraga Widi sane adil, tur sane nepasin pepineh miwah pakitan titiange. Puputangja kajaatan jadmane dursila, tur pikolihinja jadmane sane becik.
10Ida Sang Hyang Widi Wasa dados pasayuban titiange. Ida ngrahayuang anake sane astiti bakti ring Ida.
11Ida Sang Hyang Widi Wasa maraga hakim sane adil tur setata nyisipang jadmane sane jaat.
12Yening ipun nenten nyak ngesehin solahipune, Ida Sang Hyang Widi Wasa jaga nyangih pedang Idane. Ida mentang panah Idane, tur sedia jaga katiwakang.
13Ida ngambil sanjatan Idane sane ngawinang padem, tur matitisang panah Idane sane ngendih murub.
14Indayangja cingakin, kadi asapunapi jadmane dursila ngrincikang kajaatan. Ipun ngrincikang kamewehan tur nglaksanayang panglingga caya,
15nanging ipun newek sane keni jeet sane pasang ipun pabuat anak tios.
16Kadi asapunika ipun kukum antuk kajaatanipune niri, tur kasengkalen antuk kaangkara murkanipune newek.
17Titiang matur panyuksma ring Ida Sang Hyang Widi Wasa, malantaran kadilan Idane. Titiang makidung muji Ida Sang Hyang Widi Wasa, Sane Maha Luur.