Alkitab Mobile SABDA
[VER] : [BALI]     [PL]  [PB] 
 <<  Mazmur 96 >> 

Ida S

1Kidungangja kidung sane anyar pamantuka ring Ida Sang Hyang Widi Wasa. Ih jagate sami pada makidungja muji Ida Sang Hyang Widi Wasa.

2Makidungja pamantuka ring Ida Sang Hyang Widi Wasa, tur pujija Ida. Nyabran rahina lumbrahangja orti rahayune, mungguing Ida sampun ngrahayuang iraga.

3Lumbrahangja kaluihan Idane ring bangsa-bangsane sami miwah pakaryan Idane sane mawisesa ring jagate makasami.

4Ida Sang Hyang Widi Wasa maraga agung tur patut puji saha luurang pisan. Ida patut kaluihang langkungan ring paradewane sami.

5Paradewan bangsa-bangsane sane lianan punika wantah arca kewanten. Nanging Ida Sang Hyang Widi Wasa sane ngardi akasane.

6Kagungan miwah kaluihane ngiter Ida, tur kawisesan miwah kabecikane ngebekin Perhyangan Agung Idane.

7Ih sakancan bangsane ring mrecapada, pujija Ida Sang Hyang Widi Wasa, tur pujija kaluihan miwah kawisesan Idane.

8Pujija Ida Sang Hyang Widi Wasa sane luih. Aturangja aturane tur ngranjingja ring Perhyangan Agung Idane.

9Sumungkemja ring ayun Sane Maha Suci, rikalaning Ida makantenang raga. Ih sakuub mrecapadane, pada ngetorja ring ajeng Idane.

10Baosangja ring sakancan bangsane, sapuniki: “Ida Sang Hyang Widi Wasa punika maraga Sang Prabu. Jagate sampun kagenahang saha kukuh bakuh ring genahnyane tur nenten mrasidayang makisid. Ida jaga nepasin bangsa-bangsane antuk kadilan.”

11Pada girangja ih pretiwi miwah akasane. Pada pagelurja, segara miwah sadagingnya sami.

12Pada girangja, ih tegal miwah sadagingnyane sami. Pada masuryakja ih taru-tarune ring alase tur masuryak mabungah-bungahja,

13rikala Ida Sang Hyang Widi Wasa rauh jaga nitah mrecapada. Ida jaga mrentah jadmane ring jagate antuk kadilan miwah kajujuran.


  Share Facebook  |  Share Twitter

 <<  Mazmur 96 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel