Dual PanelRerin
1Dane Sanbalat, Dane Tobia, Dane Gesem miwah meseh-meseh tiange sane tiosan miragi mungguing tiang sampun ngwangun tembok tur nenten wenten bolong-bolong sane kantun ring temboke punika, yadiastun tiang durung masang jelanan ring gapura-gapurannyane.
2Duaning punika Dane Sanbalat miwah Dane Gesem ngundang tiang, mangda tiang nyak matemu ring dane ring salah tunggaling desa ring tanahe dangsah ring Ono. Puniki pangindrajalannyane buat mencanen tiang.
3Tiang raris ngutus utusan kadulurin atur sapuniki: “Tiang sedek ngarap pakaryan sane penting pisan tur tiang tan mrasidayang rauh mriki. Tiang nenten jaga ngrarianang pakaryan wantah buat jaga kapanggih ring ragane kewanten.”
4Dane ngundang tiang kantos ping pat, tur tiang ngwales antuk pasaur sane pateh sakadi inucap.
5Sasampune punika Dane Sanbalat raris ngutus sinalih tunggil parekan danene buat makta undangan sane kaping lima, sane marupa surat sane nenten madaging cap.
6Daging surate punika sapuniki: “Dane Gesem maosang ring tiang, kocap sampun iur gatrane ring pantaran rakyate ring kiwa tengen wewidangan puniki, mungguing ragane miwah wong Yahudine ngrencanayang jaga brontak. Punika awinanipun, ragane ngwangun temboke punika. Dane Gesem taler maosang mungguing ragane ngraga mapakayunan jaga dados prabu,
7tur ragane sampun nabdabang mangda makudang-kudang nabine jaga ngumumang ring Yerusalem, mungguing ragane sane dados ratun wong Yehudane. Sampun janten ida sang prabu jaga mireng indike puniki. Duaning punika tiang nunas mangda ragane ledang matemu ring tiang buat maosang paindikan punika.”
8Tiang raris nyaurin sapuniki: “Sane baosang ragane punika makasami nenten wenten sane patut. Ragane ngraga sane ngawi-awi indike punika.”
9Dane ngindayang jaga nakut-nakutin tiang, mangda tiang wusan makarya. Tiang raris ngastawa sapuniki: “Oduh Ratu Sang Hyang Widi Wasa, sane mangkin kuatangja titiang.”
10Rikala punika tiang ngrauhin Dane Semaya okan Dane Delaya, putun Dane Mehetabeel sane tan mrasidayang nilarin jeron danene. Dane mabaos ring tiang sapuniki: “Semeton miwah tiang patut masingidan ring Genah Sucine sane ring Perhyangan Agung tur ngancing lawang-lawange irika, duaning ipun jaga rauh tur nyedayang semeton. Ring sinalih tunggiling wengi ipun jaga rauh tur nyedayang semeton.”
11Tiang tumuli masaur sapuniki: “Tiang boyaja soroh jadma sane getap. Napi semeton ngaden tiang pacang ngindayang ngluputang urip tiange, malantaran mengkeb ring Perhyangan Agung? Tiang nentenja jaga sapunika.”
12Rikala tiang minehin indike punika, tiang raris uning mungguing Ida Sang Hyang Widi Wasa nenten masabda ring Dane Semaya, nanging Dane Tobia miwah Dane Sanbalat sane sampun nyuap dane mangda dane miteketin tiang.
13Sang kalih ngupahin dane mangda dane nakut-nakutin tiang tur mangda tiang ngamargiang dosa, tur malantaran punika dane mrasidayang ngusakang wastan tiange tur nganistayang tiang.
14Tiang ngastawa sapuniki: “Duh Ratu Sang Hyang Widi Wasa, ledang Palungguh IRatu eling ring laksanan Tobia miwah Sanbalate, tur rarisang IRatu nyisipang ipun. Kadi asapunika taler elingangja Ni Noaja miwah sakancan nabi-nabine sane nakut-nakutin titiang.”
Pakar
15Sasampune seket kalih rahina makarya, temboke punika raris puput ring tanggal slae ring bulan Elul.
16Rikala meseh-meseh tiange parabangsa sane wenten ring kiwa tengen miragi indike punika, ipun raris pada kimud, santukan sakancan anake pada uning mungguing Ida Sang Hyang Widi Wasa nyarengin pakaryane punika.
17Daweg punika parapamimpin wong Yahudine pada saling kirimin surat ring Dane Tobia.
18Akeh rakyate ring Yehuda maroang ring dane, duaning matuan danene anak Yahudi, sane mapesengan Sekanya okan Dane Arah. Sajawining punika, Dane Yohanan okan danene taler ngambil okan Dane Mesulam, putun Dane Berekya.
19Rakyate punika setata maosang ring tiang indik kabecikan Dane Tobia, tur ipun taler ngrauhang ring dane napi sane baosang tiang. Dane setata ngirim surat ring tiang buat nakut-nakutin tiang.