Dual PanelPikol
1“Suku Lewi sane kawenangang dados pandita nenten patut polih duman tanah ring Israel, nanging dane patut polih pangupa jiwa saking aturan-aturan sane katur ring Ida Sang Hyang Widi Wasa.
2Dane nenten patut madue tanah sakadi suku-suku sane lianan. Duman danene inggih punika linggih buat dados pandita druen Ida Sang Hyang Widi Wasa sakadi sane sampun kajanjiang antuk Ida Sang Hyang Widi Wasa.
3Yening wenten aturan banteng wiadin biri-biri, parapanditane patut katurin paannyane sane ring arep, cadik miwah basangnyane.
4Dane taler patut katurin pamupon gandum, anggur miwah minyak saitun semetone sane pangawit. Kadi asapunika taler bulun biri-birin semetone sane kagunting pinih pangawit.
5Saking pantaran sakancan suku bangsan semetone, Ida Sang Hyang Widi Wasa nyelik suku Lewi dados pandita, buat ngaturang ayah pamantuka ring Ida Sang Hyang Widi Wasa salami-laminipun.
6Sakancan wong Lewi sane saking salah tunggil kota ring Israel, raris rauh ring genah pangubaktine sane kaselik antuk Ida Sang Hyang Widi Wasa, tur mapakayunan jenek irika,
7dane dados ngaturang ayah irika sakadi pandita druen Ida Sang Hyang Widi Wasa, Widin danene, sakadi wong Lewi sane lianan, sane ngayah irika.
8Dane taler patut polih duman ajengan sane pateh sakadi pandita sane lianan, tur dane dados ngambil sakancan brana sane kakirimang antuk kulawargan danene ring dane.”
Indik
9“Yening semeton rauh ring jagate sane pacang kapaicayang antuk Ida Sang Hyang Widi Wasa ring semeton, sampunangja semeton nulad laksana sane cemer, sane kalaksanayang antuk bangsa-bangsane sane wenten irika.
10Sampunangja okan semetone anggena aturan sane maborbor ring pamorboran aturan semetone, tur sampunang bangsan semetone nglaksanayang indik matetenungan, matetenger wiadin mabalianan,
11wiadin nganggen gegemet, tur sampunang maluasang buat matuunang atman anake sane sampun padem.
12Ida Sang Hyang Widi Wasa, Widin semetone kalintang bendu ring jadmane sane nglaksanayang paindikan-paindikan sane cemer punika, tur indike punika ngawinang Ida nyapuh bangsa-bangsane punika saking jagate irika ring ajeng parasemetone.
13Semeton patut saking saguluking ati satia tuu ngaula ring Ida Sang Hyang Widi Wasa, Widin semetone.”
Janji
14Dane Musa raris ngandika sapuniki: “Jadmane ring jagat sane pacang aug semeton, ipun pada ngidepang tutur anake sane ngadokang tenung miwah tetenger-tetenger. Nanging Ida Sang Hyang Widi Wasa, Widin semetone nenten nglugrain semeton nglaksanayang paindikan-paindikan sane kadi asapunika.
15Tungkalikanipun, Ida pacang ngutus nabi adiri, sane pateh sakadi tiang, pacang ngrauhin semeton. Nabine punika kaselik saking pantaran bangsan semetone, tur semeton patut satinut ring dane.
16Ring rahina daweg semeton mapunduh ring Gunung Sinai, semeton mapinunas mangda semeton sampunang malih miragi Ida Sang Hyang Widi Wasa masabda, miwah ngeton teja wedanan Idane sajeroning geni sane ngendih murub punika, santukan semeton ajerih jagi padem.
17Duaning punika Ida Sang Hyang Widi Wasa raris ngandika ring tiang sapuniki: ‘Pinunasnyane ento beneh.
18Ulun lakar ngutus nabi adiri ane patuh buka kita buat nekain ia. Nabine ento, selik Ulun uli pantaran bangsannyane. Ulun lakar ngorahin nabine ento, apa ane patut orahanga, ia lakar ngorahin rakyate sakancan ane pituduhang Ulun.
19Ia lakar ngraos dadi wakil Ulune, tur Ulun lakar nyisipang anake ane tusing nyak satinut teken ia.
20Nanging yening ada nabi ane bani ngucapang pawarah sajeroning parab Ulune, sakewala Ulun tusing ada nitahang ia ngraos keto, ulihan ento ia patut mati. Aketo masih sakancan nabine ane ngucapang pawarah, pinaka dadi wakil widi-widi ane lenan.’
21Sapunapi antuk parasemeton mrasidayang uning mungguing pawarah nabine punika saking Ida Sang Hyang Widi Wasa wiadin boya saking Ida?
22Yening wenten nabi ngucapang pawarah, ngaku dados wakil Ida Sang Hyang Widi Wasa, nanging saluiring sane kawarahang punika nenten sawiakti kasidan, kenginan pawarahe punika boya saking pituduh Ida Sang Hyang Widi Wasa. Nabine punika sampun mabaos nganggen kakuasaanipune niri, tur semeton nenten patut ajerih ring ipun.”