Dual Panel1Yening semeton manggihin banteng wiadin biri-birin sesaman semetone wong Israel sane paling, sampunangja semeton mapi-mapi tan uning, nanging jukja tur waliang ring sang madue.
2Nanging yen sang sane nruenang punika doh genahipune wiadin semeton tan uning ring sane nerbeang, baktaja ingon-ingone punika ka umah semetone. Yening sane nerbeang rauh ngrereh wewalungane punika, rarisang waliang ring ipun.
3Kadi asapunika taler margiangja paindikan sane kadi asapunika yening semeton manggihin keledae, pangangge wiadin barang sane dados druen sesaman semetone sane ical.
4Yening semeton manggihin keledae wiadin banteng druen sesaman semetone bah ring margine, sampunangja semeton mapi-mapi tan uning nanging tulunginja mangunang keledaene punika ngantos ipun mrasidayang malih majujuk.
5Anake istri sampunang mapangangge sakadi anak lanang, tur anak lanang sampunang mapangangge sakadi anak istri. Ida Sang Hyang Widi Wasa Widin semetone bendu ring anake sane malaksana kadi asapunika.
6Yen saget semeton manggihin sebun kedis madaging ina ngeem taluh wiadin panakipune ring tarune wiadin ring tanahe, sampunang juka inan kedise punika.
7Semeton dados ngejuk panakipune, nanging inanipune banggayang ipun ngeleb mangdane semeton prasida panjang umur tur muponin gemuh landuh.
8Yening semeton makarya umah anyar (sane maraab beton dangsah), semeton patut nagingin trali milehan ring sisin raabe punika, kenginan semeton nenten jaga kapetegenin danda pati yening wenten anak ulung saking raabe punika kantos ipun padem.
9Sampunangja semeton nandur entik-entikan sane tiosan ring abian anggur semetone. Yen semeton nglaksanayang indike punika, semeton nenten jaga kalugra ngalap upon-upon anggur miwah upon-upon bibit sane lianan punika.
10Sampunangja semeton ngakitang keledae ngajak banteng.
11Sampunangja semeton ngangge sane malakar antuk wol miwah benang kapas sane katunun dados asiki.
12Daginginja oncer tanggun panganggen semetone makapatpat.”
Pidab
13“Menawita wenten anak lanang ngambil anak luh daa, tur sajeroning makudang-kudang rahina, ipun raris nenten demen ring anake luh punika,
14duaning punika ipun raris ngadu ada nalih anake luh punika, baosang ipun mungguing anake luh punika nenten genten dawege ambil ipun.
15Yening kadi asapunika, wong tuan anake luh punika patut ngaturang panganggen panganten sane keni kecritan rah, ring pangadilan ring ajeng parapamimpin kotane irika, makadados bukti kagentenan anake luh punika.
16Bapan anake luh punika patut matur ring parapamimpin kotane sapuniki: ‘Titiang sampun malilayang pianak titiange bajang nganten sareng ring ipun, nanging sane mangkin ipun tan demen ring pianak titiange.
17Ipun sampun ngadu ada nalih pianak titiange, ipun maosang mungguing pianak titiange nenten genten dawege ambil ipun. Nanging niki buktinipun mungguing pianak titiange punika sawiakti genten. Indayang aksi panganggen pangantennyane sane keni kecritan rah puniki.’
18Parapamimpin kotane punika patut ngejuk tur nigtig anake lanang punika.
19Ipun taler patut keni danda satus bidang jinah perak tur jinahe punika raris kaserahang ring bapan anake luh punika. Santukan anake lanang punika sampun ngusakang wastan satunggiling anak luh genten ring Israel. Sapanglanturipun anake luh punika patut tetep dados somahipune, tur ipun nenten dados malasang anake luh punika sapanjang umuripune.
20Nanging yening dedalihanipune punika sawiakti patut tur nenten wenten bukti mungguing daane punika kantun genten rikala ipun nganten,
21Parapamimpin kotane punika patut ngajak daane punika medal saking umah bapanipune, tur irika sawatek anake lanang ring kotane irika patut ngencur ipun antuk batu kantos ipun padem. Anake luh punika sampun nglaksanayang paindikan sane ngranayang kimud ring pantaran bangsan iragane, malantaran ipun sampun naenin matemu semara sadurung ipun nganten, sakantun ipun nongos jumah bapanipune. Malantaran cara kadi asapunika semeton nyirnayang kajaatane punika.
22Yening wenten anak lanang katangehan matemu semara ngajak anak luh kurenan anak lianan, ipun makakalih patut kapademang. Malantaran cara sane kadi asapunika semeton patut nyirnayang kajaatan punika.
23Yening ring kota wenten anak muani katangehan matemu semara ngajak anak bajang, sane sampun magegelan ngajak anak lianan,
24ipun makakalih patut kejuk kajak ka jabaan kotane, tur irika ipun kencur antuk batu ngantos padem. Daane punika patut ngemasin padem, santukan ipun nenten jerit-jerit ngidih tulung, yadiastun ipun nuju wenten ring kota, tur wenten anak mrasidayang miragiang jeritanipune. Kadi asapunika taler anake muani punika patut ngemasin padem, santukan ipun sampun matemu semara ngajak anak bajang sane sampun magegelan. Malantaran cara sane kadi asapunika semeton patut nyirnayang kajaatane punika.
25Yening ring pategalan wenten anak bajang sane sampun magegelan ngajak anak lianan, kaplegandang antuk anak muani, kenginan wantah anake muani punika sane patut kapademang.
26Nanging anake bajang punika patut banggayang sakadi asapunika, santukan tan wenten iwangipune sane patut masinipun padem. Paindikane punika pateh sakadi anake ngamuk tur ngamademang anak lianan.
27Anake muani punika mlegandang anak bajang sane sampun magegelan ring pategalane, yadiastu anake bajang punika jerit-jerit nunas tulung, nanging tan wenten anak sane mrasidayang nulungin ipun.
28Yening wenten anak muani mlegandang anak bajang sane durung magegelan,
29anake muani punika patut nyerahang jinah perak seket bidang ring bapan anake bajang punika makadados basan pupur, tur anake bajang punika patut ambil ipun makadados somahipune, santukan ipun sampun mlegandang anake luh punika. Ipun tan dados malasang somahipune sakantune ipun urip.
30Sampunangja wenten anak sane nganistayang bapanipune, malantaran ipun matemu semara ngajak salah tunggil somah bapanipune.”