Dual PanelPidab
1Dane Musa kasarengin antuk panglingsir bangsa Israele, raris ngandika ring bangsane punika, sapuniki: “Tinutinja sakancan prentah sane rauhang tiang ring parasemeton ring rahinane puniki.
2Rikala semeton nglintangin Tukad Yordane, tur ngranjing ring jagat sane kapaicayang ring semeton antuk Ida Sang Hyang Widi Wasa, Widin semeton, semeton patut nyujukang makudang-kudang batu sane ageng-ageng raris plester antuk luluh.
3Suratangja sakancan pidabdab miwah paurukane puniki ring batune punika. Rikalaning semeton sampun ngranjing ring jagate sane gemuh landuh, sane kajanjiang ring semeton antuk Ida Sang Hyang Widi Wasa, Widin leluur semetone,
4samaliha semeton sampun magenah ring dauh Tukad Yordane, jujukangja batu-batune punika ring duur Gunung Ebale tur plester antuk luluh, sakadi sane prentahang tiang ring semeton ring rahinane puniki.
5Irika semeton patut ngwangun pamorboran aturan, sane malakar antuk batu-batu sane durung naenin keni tampak prabot besi.
6Santukan sakancan pamorboran aturan sane kakardi buat maturan ring Ida Sang Hyang Widi Wasa, Widin semetone, patut kakardi antuk batu sane sukla. Ring pamorboran aturane punika semeton patut ngaturang aturan semetone sane maborbor.
7Irika taler semeton patut ngaturang tur ngajengang aturan karahayuan semetone saha masuka rena ring ayun Ida Sang Hyang Widi Wasa, Widin semetone.
8Ring batune sane maplester punika, suratangja saha terang sabilang akecap pidabdab Ida Sang Hyang Widi Wasa.”
9Dane Musa kasarengin antuk parapandita suku Lewine, ngandika ring sakancan bangsa Israele, sapuniki: “Pirengangja atur tiange, duh bangsa Israel. Ring rahinane puniki semeton sampun dados kaula druen Ida Sang Hyang Widi Wasa, Widin semetone.
10Duaning punika tinutinja Ida Sang Hyang Widi Wasa tur agemja sakancan pidabdab Idane, sane aturang tiang ring parasemeton ring rahinane puniki.”
Temah
11Wus punika Dane Musa raris ngandika ring bangsa Israel, sapuniki:
12“Sasampune semeton nglintangin Tukad Yordane punika, rikala mertane kuncarang, suku-suku sane patut ngadeg ring duur Gunung Gerisime, inggih punika suku Simeon, Lewi, Yehuda, Isakar, Yusup miwah Benyamin.
13Samaliha rikalaning temahe kuncarang, suku-suku sane jaga ngadeg ring Gunung Ebale, inggih punika: Suku Ruben, Gad, Aser, Sebulon, Dan miwah Naptali.
14Raris suku Lewine patut ngucapang baose puniki antuk suara jangih, asapuniki:
15‘Ida Sang Hyang Widi Wasa nemah sakancan anake sane ngardi arca batu, taru wiadin logam tur saking silib nyungsung arcane punika. Ida Sang Hyang Widi Wasa menggah piduka marep ring indik nyungsung arcane punika.’ Sawatek bangsane punika patut masaur manuk: ‘Amin.’
16‘Ida Sang Hyang Widi Wasa nemah sakancan anake sane nenten bakti ring meme bapanipune.’ Bangsane punika patut masaur manuk: ‘Amin.’
17‘Ida Sang Hyang Widi Wasa nemah sakancan anake sane ngisidang baledan tanah sesamannyane.’ Bangsane punika makasami patut masaur manuk: ‘Amin.’
18‘Ida Sang Hyang Widi Wasa nemah sakancan anake sane nandan anak buta ka genahe sane iwang.’ Bangsane punika makasami patut masaur manuk: ‘Amin.’
19‘Ida Sang Hyang Widi Wasa nemah sakancan anake sane ngrampas hak wong sunantara, anak ubuh-ubuh miwah anak balu-balu.’ Bangsane punika makasami patut masaur manuk: ‘Amin.’
20‘Ida Sang Hyang Widi Wasa nemah sakancan anake sane nganistayang bapannyane malantaran ipun matemu semara ngajak salah tunggil somah bapanipune.’ Bangsane punika makasami patut masaur manuk: ‘Amin.’
21‘Ida Sang Hyang Widi Wasa nemah sakancan anake sane masanggama ngajak sato.’ Bangsane punika makasami patut masaur manuk: ‘Amin.’
22‘Ida Sang Hyang Widi Wasa nemah sakancan anake sane matemu semara ngajak nyama wiadin nyama kualonnyane sane luh.’ Bangsane punika makasami patut masaur manuk: ‘Amin.’
23‘Ida Sang Hyang Widi Wasa nemah sakancan anake sane matemu semara ngajak matuannyane sane luh.’ Bangsane punika makasami patut masaur manuk: ‘Amin.’
24‘Ida Sang Hyang Widi Wasa nemah sakancan anake sane ngamademang anak saking silib.’ Bangsane punika makasami patut masaur manuk: ‘Amin.’
25‘Ida Sang Hyang Widi Wasa nemah sakancan anake sane nanggap upah buat ngamademang anake sane tan padosa.’ Bangsane punika makasami patut masaur manuk: ‘Amin.’
26‘Ida Sang Hyang Widi Wasa nemah sakancan anak sane nenten satinut ring sakancan pidabdab miwah paurukan Ida Sang Hyang Widi Wasa.’ Bangsane punika makasami patut masaur manuk: ‘Amin.’”