Dual PanelMerta
1“Yening semeton astiti bakti ring Ida Sang Hyang Widi Wasa, Widin semetone, tur satia tuu nglaksanayang sakancan pituduh Idane sane rauhang tiang ring semeton ring rahinane puniki, Ida pacang nadosang semeton bangsa sane agengan ring sakancan bangsa sane lianan ring jagate.
2Astiti baktija ring Ida Sang Hyang Widi Wasa, Widin semetone, janten semeton jaga muponin sakancan mertane puniki:
3Ida Sang Hyang Widi Wasa jaga ngamertanin kota-kota miwah pategalan semetone.
4Ida Sang Hyang Widi Wasa pacang ngamertanin semeton malantaran Ida mapaica pianak, asil bumi, biri-biri miwah banteng akeh ring semeton.
5Ida Sang Hyang Widi Wasa pacang ngamertanin pamupon gandum semetone miwah ajeng-ajengan sane kardi semeton antuk pamupone punika.
6Ida Sang Hyang Widi Wasa jaga ngamertanin sakancan pakardin semetone.
7Ida Sang Hyang Widi Wasa jaga ngaonang sakancan meseh semetone, rikalaning ipun ngebug semeton. Ipun jaga ngebug semeton saking margi sane asiki, nanging ipun jagi malaib pablesat nyatur arah saking ajeng semetone.
8Ida Sang Hyang Widi Wasa jagi ngamertanin pakaryan semetone tur ngebekin gudang semetone antuk gandum. Ida pacang ngamertanin semeton ring jagat sane jaga paicayang Ida ring semeton.
9Yening semeton astiti bakti ring Ida Sang Hyang Widi Wasa, Widin semetone, tur nglaksanayang sakancan pituduh Idane, Ida pacang nadosang semeton kaulan Idane, sakadi sane sampun janjiang Ida.
10Samaliha sakancan bangsane ring mrecapada pacang uning mungguing Ida Sang Hyang Widi Wasa sampun nyelik semeton dados kaulan Idane, tur ipun sareng sami jaga ajerih ring semeton.
11Ida Sang Hyang Widi Wasa jaga akeh mapaica pianak, ingon-ingon miwah asil bumi ring semeton, ring jagat sane sampun janjiang Ida ring leluur semetone, buat jaga kapaicayang ring semeton.
12Ida pacang nedunang sabeh rikala masan ipun saking genah panyimpenannyane sane bek maliah ring langite, tur ngamertanin sakancan pakaryan semetone, mangdane semeton prasida maselangang ring bangsa-bangsa sane akeh, nanging semeton nenten pacang nyelang ring isapasira jua.
13Ida Sang Hyang Widi Wasa Widin semetone pacang nadosang semeton pamimpin ring pantaran bangsa-bangsane, tur semeton nenten jaga dados pangiring. Yening semeton saking tuu ninutin sakancan pituduh Idane, sane aturang tiang ring semeton ring rahinane puniki, semeton setata jaga mapikolih tur nenten naenin pocol.
14Nanging sampunang pisan semeton tempal ring titah Idane malantaran cara sane kadi asapunapi jua. Sampunang semeton nyungsung miwah ngaula ring widi-widi sane lianan.”
Pikol
15“Nanging yening semeton tempal ring Ida Sang Hyang Widi Wasa, Widin semetone, tur nenten satia tuu nglaksanayang sakancan pituduh miwah pidabdab Idane sane aturang tiang ring semeton ring rahinane puniki, kenginan sakancan temahe puniki pacang nibenin semeton:
16Ida Sang Hyang Widi Wasa pacang nemah kota-kota miwah pategalan semetone.
17Ida Sang Hyang Widi Wasa pacang nemah sakancan pamupon gandum semetone miwah ajeng-ajengan sane kardi semeton antuk gandume punika.
18Ida Sang Hyang Widi Wasa pacang nemah semeton kantos semeton wantah akidik muponin pianak, asil bumi, banteng miwah biri-birin semetone.
19Ida Sang Hyang Widi Wasa pacang nemah sakancan pakardin semetone.
20Yening semeton malaksana dursila miwah tungkas ring Ida Sang Hyang Widi Wasa, Ida pacang nedunang bencana, karuetan miwah kamewehan ring saluiring paindikan sane laksanayang semeton, ngantos semeton digelis winasa tur sirna kerta.
21Ida pacang nedunang grubug mawanti-wanti ring semeton, ngantos tan wenten ring pantaran semetone sane kantun ring jagate sane pacang aug semeton punika.
22Ida Sang Hyang Widi Wasa jaga ngukum semeton antuk pinakit-pinakit sane nglalahin, antuk pinakit beseh miwah panes dingin. Ida pacang nedunang panes banteng, miwah angin nglinus buat ngusakang upon-upon semetone. Sakancan bencana puniki pacang nibenin semeton, ngantos semeton padem.
23Nenten jaga wenten sabeh, tur tanah semetone jaga dados katos sakadi batu.
24Makadados silur sabeh punika Ida Sang Hyang Widi Wasa pacang nedunang sabeh abu miwah sabeh bias kantos semeton sirna.
25Ida Sang Hyang Widi Wasa pacang mapaica kamenangan ring meseh-meseh semetone nglawan semeton. Semeton jaga ngebug ipun saking margine asiki, nanging semeton jaga malaib pablesat nyatur arah saking arepanipune, tur sakancan bangsane ring mrecapada jaga tengkejut rikala miragi paindikan sane nibenin semeton.
26Rikalaning semeton padem, paksi miwah sato alase jaga rauh buat neda sawan semetone, tur nenten wenten anak sane jaga ngulah ipun.
27Ida Sang Hyang Widi Wasa pacang ngukum semeton antuk busul, sakadi sane kardi Ida ring wong Mesire. Ida pacang ngawinang ragan semetone benyah antuk berung. Semeton pacang kakaput antuk koreng pabrengkeng sane nenten mrasidayang katambanin.
28Ida Sang Hyang Widi Wasa pacang ngawinang semeton buduh, buta miwah bingung.
29Semeton pacang patigabag sakadi anake buta rikalaning tengai tepet, tur semeton nenten mrasidayang nyingakin margi. Ring saluiring pakaryan semetone, semeton nenten pacang mapikolih. Semeton tan mari pacang kaprakosa miwah karampas, tur tan wenten anak sane pacang nulungin semeton.
30Semeton pacang kapagelanang ngajak anak bajang, nanging anak lianan sane jaga nganten ngajak gegelan semetone punika. Semeton pacang nyujukang umah, nanging semeton nenten pacang naenin nongosin umahe punika. Semeton jaga nandur wit anggur, nanging semeton nenten jaga naenin ngajengang wohipune.
31Banteng semetone jaga katampah ring arepan semetone, nanging semeton nenten jaga ngajengang benipune. Keledaen semetone jaga kapaid ring arepan semetone, tur nenten jaga kawaliang ring semeton. Biri-birin semetone jaga kaserahang ring meseh-meseh semetone, tur nenten wenten anak sane jaga nulungin semeton.
32Ring arepan semetone oka-okan semetone lanang istri jaga kaserahang ring wong sunantara buat dados panjak. Nyabran rahina panyingakan semetone jaga bengul buat ngrereh okan semetone, nanging tan wenten pikenohipun, duaning ipun nenten jaga mawali.
33Wong sunantara jaga ngambil sakancan pamupon tetanduran semetone, sane tandur semeton saking tuyuh. Semeton nenten muponin punapa-punapi, nanging semeton tan mari kaprakosa miwah kala-ala.
34Kasangsaran semetone punika jaga ngawinang semeton buduh.
35Ida Sang Hyang Widi Wasa pacang ngebekin cokor semetone antuk berung sane nenten mrasidayang was. Semeton jaga kabekin antuk busul ngawit saking sirah rauh ring cokor semetone.
36Ida Sang Hyang Widi Wasa pacang ngutang semeton miwah ratun semetone ka jagat sunantara, jagat sane nenten uningin semeton, miwah paraleluur semetone. Irika semeton jaga nyungsung dewa-dewa sane kakardi antuk taru miwah batu.
37Bangsa sane wenten ring jagat genah semetone kasambragang antuk Ida Sang Hyang Widi Wasa jagi pada tengkejut manggihin indik semetone punika. Irika semeton jagi kanistayang miwah kanggen kakedekan.
38Semeton akeh pacang nyambehang bibit, nanging pamuponipun wantah akidik, santukan tetanduran semetone pacang amah balang.
39Semeton pacang nandur punyan anggur, tur becikang semeton miara nanging semeton nenten pacang ngalap buahipune wiadin nginum toyanipune, santukan wit tarune punika telas kateda antuk uled.
40Punyan saitune jagi mentik milehan ring tanah semetone, nanging semeton nenten jaga madue minyak saitun, santukan woh saitune punika jaga aas.
41Semeton jaga madue oka lanang wadon, nanging semeton jaga kelangan oka-okan semetone punika, santukan ipun jaga kajarah dados tawanan perang.
42Sakancan taru miwah tetanduran semetone jaga telas amah merana.
43Wong sunantara sane madunungan ring jagat semetone, sayan ngagengang kakuasanipune, nanging kakuasan semetone sayan rered.
44Ipun jaga maselangang jinah ring semeton, nanging semeton nenten madue punapa-punapi sane paselangang semeton ring ipun. Pamuputipun, ipun jaga dados pamrentah semetone.
45Sakancan bencanane puniki jaga ngrauhin tur nibenin semeton, kantos semeton sirna, santukan semeton tan astiti bakti ring Ida Sang Hyang Widi Wasa, Widin semetone, miwah nenten nglaksanayang sakancan pidabdab sane paicayang Ida ring semeton.
46Indike punika makasami jaga dados bukti ukuman Ida Sang Hyang Widi Wasa sane katiba ring semeton miwah ring katurunan semetone salami-laminipun.
47Ida Sang Hyang Widi Wasa ngamertanin semeton ring sakancan pakibeh semetone, nanging semeton nenten nyak nyungsung Ida antuk manah liang miwah suka rena.
48Duaning punika semeton jaga ngaula ring meseh-meseh sane pacang karauhang antuk Ida Sang Hyang Widi Wasa, buat nglawan semeton. Semeton pacang nandang bedak layah tur malalung, miwah tan madue punapa-punapi. Ida Sang Hyang Widi Wasa jaga mrakosa tur ngala-ala semeton, kantos semeton sirna.
49Ida Sang Hyang Widi Wasa jaga ngrauhang bangsa saking tanggun gumine pacang nglawan semeton, inggih punika bangsa sane raosipune nenten karesep antuk semeton. Bangsane punika jaga nyander semeton sakadi paksi garuda.
50Bangsane punika pacang gemes tur nenten pacang madalem sapasira jua, anak alit wiadin anak odah.
51Ipun jagi nelasang ingon-ingon semetone miwah pamupon tanah semetone. Ipun nenten jaga numanang gandum, anggur, minyak saitun, banteng miwah biri-birin semetone, mawanan semeton pacang padem kaluen.
52Ipun pacang anglurug sakancan kota sane wenten ring jagat sane pacang kapaicayang ring semeton antuk Ida Sang Hyang Widi Wasa, Widin semetone, samaliha tembok-tembok banteng sane tegeh-tegeh sane andelang semeton, sami pacang rubuh.
53Rikalaning meseh-meseh semetone nglurug kota-kotan semetone, semeton nenten mrasidayang mapineh ulihan semeton seduk, kantos semeton pacang ngajengang oka-okan semetone ngraga, sane sampun kapaicayang ring semeton antuk Ida Sang Hyang Widi Wasa, Widin semetone.
54Yadian sang sulinggih sane kalintang wicaksana tur darma sadu, taler jaga nenten mrasidayang mapikayun rikalaning kotane punika kakurung, kantos dane pacang ngajeng okan danene, santukan dane nenten madue ajeng-ajengan sane lianan. Dane nenten pacang kayun maicayang ajeng-ajengan danene punika ring semeton miwah rabin danene sane tresnain dane, wiadin ring oka-okan danene sane kantun.
55(28:54)
56Yadian anak istri sane kalintang wicaksana tur darma sadu, miwah kalintang sugih kantos dane nenten naenin medal kija-kija jaga malaksana pateh sakadi asapunika. Rikalaning imeseh ngurung kotannyane, dane jaga nenten mrasidayang mapikayun ulihan nandang kaluen kantos saking silib jaga ngajengang okan danene sane wau embas rauh ring arin-arinnyane. Dane nenten ngedumang ajeng-ajengan danene punika ring rabin danene sane tresnain dane miwah ring oka-okan danene.
57(28:56)
58Yening semeton nenten saking satia tuu ngagem sakancan paurukan Ida Sang Hyang Widi Wasa sane sinurat ring cakepane puniki, miwah yening semeton nenten ngluihang Ida Sang Hyang Widi Wasa, Widin semetone sane luih tur ngangobin,
59Ida pacang ngrauhang pinakit sane nenten mrasidayang kasegerang, miwah grubug sane raat sane nenten pacang wusan-wusan ring semeton miwah katurunan semetone.
60Ida pacang ngrauhang malih apisan pinakit sane raat sane pecak nibenin wong Mesir, sane sampun uningin semeton. Punika jaga tibakang Ida ring semeton, tur semeton nenten mrasidayang seger.
61Ida taler pacang nedunang sawatek soroh pinakit miwah grubug sane nenten kakecap ring cakepan pidabdab miwah paurukan Ida Sang Hyang Widi Wasa puniki, tur semeton pacang kasirnayang.
62Yadiastu gebogan semetone akeh sakadi bintange ring langite, wantah akidik kewanten semeton sane pacang kantun, santukan semeton tan astiti bakti ring Ida Sang Hyang Widi Wasa, Widin semetone.
63Sakadi Ida ledang mapaica pamupu sane maliah-liah ring semeton miwah nadosang cacakan semetone sayan maweweh-weweh, sakadi asapunika taler Ida pacang ledang jaga nyirnayang semeton miwah ngawinang semeton uug. Semeton pacang kabancut saking jagat sane pacang aug semeton punika.
64Ida Sang Hyang Widi Wasa pacang nyambragang semeton ring pantaran bangsa-bangsa sane saking tanggun gumine asiki ngantos ka tanggunnyane sane lianan. Irika semeton jaga nyungsung widi-widi sane malakar antuk batu miwah taru, widi-widi sane durung naenin sungsung semeton miwah leluur semetone.
65Ring dija-dija semeton nenten jaga polih sutrepti, samaliha nenten jaga wenten sane keni kawastanin druen semetone. Ida Sang Hyang Widi Wasa jaga nglikub semeton antuk katakutan, kabimbangan miwah kabingungan.
66Urip semetone setata wenten ring sajeroning baya. Rahina wengi semeton pacang kalikub antuk manah resres, tur semeton tansah rumasa ajerih pacang padem.
67Manah semetone pacang kalikub antuk katakutan ngeniang ring saluiring paindikan sane panggihin semeton. Nyabran semengan semeton ngajap mangda gelis wengi, nyabran wengi semeton ngajap mangda gelis semengan.
68Ida Sang Hyang Widi Wasa pacang ngwaliang semeton malih ka Mesir makapalan, yadiastun tiang sampun maosang mungguing semeton nenten pacang naenin malih mrika. Irika semeton pacang ngindayang ngadol dewek semetone dados panjak ring meseh-meseh semetone, nanging nenten wenten anak sane nyak numbas.”