Dual PanelIndik
1“Sane mangkin semeton aturin tiang milih, punapike semeton milih merta, punapi temah. Yening sakancan paindikane punika sampun nibenin semeton tur semeton magenah ring pantaran bangsa-bangsane, ring genah-genah semetone sampun kasambragang antuk Ida Sang Hyang Widi Wasa, Widin semetone, semeton jagi eling ring pepilihan sane aturang tiang ring semeton.
2Yening semeton miwah katurunan semetone jaga mawali ka ayun Ida Sang Hyang Widi Wasa, tur saguluking kayun satinut ring pituduh Idane sane rauhang tiang ring semeton ring rahinane puniki,
3kenginan Ida Sang Hyang Widi Wasa, Widin semetone pacang asung lugraha ring semeton. Ida pacang ngwaliang semeton saking bangsa-bangsane, genah semetone kasambragang tur Ida pacang malih nadosang semeton kerta raharja.
4Yadiastun semeton sampun kasambragang kantos rauh ka tanggun gumine sane pinih doha, Ida Sang Hyang Widi Wasa, Widin semetone jaga munduhang semeton sareng sami tur ngwaliang semeton,
5mangdane semeton malih mrasidayang nruenang tanah sane pecak kagenahin antuk leluur semetone. Samaliha Ida pacang ngawinang semeton kerta raharja tur endah-gumendah langkungan ring sane karasayang antuk leluur semetone.
6Semeton miwah katurunan semetone jaga kicen pakayunan sane satinut mangda semeton jaga astiti bakti ring Ida saking saguluking kayun semetone, tur semeton prasida tetep magenah ring tanahe punika.
7Ida Sang Hyang Widi Wasa jaga malikang sakancan temahe punika mangda nibenin meseh semetone sane geting ring semeton, miwah sane mrakosa semeton.
8Semeton malih pacang satinut ring Ida, tur ngagem sakancan pituduh Idane sane rauhang tiang ring semeton ring rahinane puniki.
9Ida Sang Hyang Widi Wasa pacang ngawinang semeton mapikolih ring saluiring pakibeh semetone. Semeton pacang katah madue oka miwah ingon-ingon, tur pategalan semetone jaga mupuang pamupu matikel-tikelan. Ida pacang ledang nadosang semeton kerta raharja, sakadi Ida ledang rikala nadosang leluur semetone kerta raharja.
10Nanging semeton patut sairing ring Ida tur tuon ngagem sakancan pidabdab Idane sane sinurat ring cakepan paurukan Idane puniki. Semeton patut mawali ring Ida saking saguluking kayun semetone.
11Pituduh sane rauhang tiang ring semeton ring rahinane puniki, boyaja abot wiadin tan prasida antuk semeton nglaksanayang.
12Nentenja tegeh ring langite genah pituduhe punika, tur semeton nentenja kantos mataken: Sapasirake sane jaga munggah tur makta pidabdabe punika tedun ring iraga mangdane iraga mrasidayang miragiang tur ninutin pidabdabe punika?
13Samaliha nentenja magenah ring selat segara. Semeton nenten kantos mataken: Sapasirake sane jaga malayar nglintangin segarane punika tur makta pituduhe punika ring iraga, mangdane iraga prasida miragiang tur ninutin pituduhe punika?
14Nentenja kadi asapunika. Pituduhe punika wenten iriki ring genah semetone. Semeton uning ring pituduhe punika. Duaning punika, sane mangkin tinutinja pituduhe punika!
15Ring rahinane puniki semeton aturin tiang milih sane becik wiadin sane kaon, urip wiadin padem.
16Yening semeton astiti bakti ring Ida Sang Hyang Widi Wasa, Widin semetone, tur ngagem sakancan pidabdab Idane, sane rauhang tiang ring semeton ring rahinane puniki, kenginan semeton pacang kerta raharja, tur dados bangsa sane ageng. Ida Sang Hyang Widi Wasa, Widin semetone pacang ngamertanin semeton ring tanah sane jaga aug semeton.
17Nanging yening semeton tempal tur nenten nyak miragiang, samaliha sampun kadaut buat nyungsung widi sane lianan,
18semeton jagi kasirnayang. Kadi asapunika tiang mapakeling semeton mangkin iriki. Semeton nenten pacang panjang umur ring jagat dauh Tukad Yordane sane jaga aug semeton punika.
19Sane mangkin semeton aturin tiang milih punapi urip, punapi padem, punapi mertan Ida Sang Hyang Widi Wasa, punapi temah Idane. Tiang nunas mangda akasa miwah pretiwine nyaksinin papilihan semetone punika. Pilihja uripe punika.
20Astiti baktija ring Ida Sang Hyang Widi Wasa, Widin semetone. Sairingja, tur satia tuuja ring Ida, kenginan semeton miwah katurunan semetone pacang muponin panjang umur ring jagat sane sampun janjiang Ida ring leluur semetone, Dane Abraham, Dane Ishak miwah Dane Yakub.”