Dual Panel1“Akasa miwah pretiwine, pirengangja baos tiange, becikang mirengang paindikan sane uningayang tiang.
2Paurukan tiange jagi ngetel sakadi ketelan sabehe, tur marupa sakadi damuh ring pretiwine. Baos tiange jaga ngripis sakadi sabehe nibenin tetandurane sane wau mentik, tan bina sakadi sabeh grimis nibenin padange sane lumlum.
3Tiang jaga muji parab Ida Sang Hyang Widi Wasa, tur kaulan Idane jaga nuturang kagungan Idane.
4Ida Sang Hyang Widi Wasa maraga pasayuban semetone sane maha kuasa. Ida maraga sampurna miwah adil ring saluiring pamargin Idane. Widin semetone maraga satia tuu tur sujati Ida ngamargiang sane patut miwah jujur.
5Nanging semeton nenten satia tuu, nenten pantes dados kaulan Idane, bangsa sane kakaput antuk dosa miwah kalintang bobab.
6Ih bangsa sane nambet miwah tan maderbe pangrasa, kadi asapunikake semeton jaga mambek pamantuka ring Ida Sang Hyang Widi Wasa? Ida punika maraga ajin semetone, Ida sane ngardi semeton. Ida sane nadosang semeton satunggiling bangsa.
7Elingangja ring masane sane sampun lintang, masane sane nguni-nguni. Takenangja ring ajin semetone, mangda dane nuturang ring semeton, paindikan-paindikan sane sampun lintang punika. Tunasangja ring paralingsire, mangda dane nyritayang paindikane sane sampun lintang.
8Ida Sane Maha Luur ngedumang tanah pusaka ring parabangsane. Ida ngamastiang genah bangsane suang-suang tur Ida ngedumang ring asing-asing bangsa dewa asiki-asiki.
9Nanging katurunan Dane Yakub selik Ida dados padruen Idane.
10Ipun keniang Ida ngumbara ring tegal melakange, tegal melakang sane suung, tur kapuput antuk angin. Ida nyayubin ipun tur matiningin ipun sakadi Ida matiningin ragan Idane ngraga.
11Tan bina sakadi paksi garudane ngurukang pianakipune makeber, pianakipune katinggahang becik-becik ring kampidipune sane kebat. Ida Sang Hyang Widi Wasa nyaga Israel mangda sampunang kantos labuh.
12Ida Sang Hyang Widi Wasa ngraga sane nantan kaulan Idane, tan wenten dewa sunantara sane mitulungin.
13Ida nglugrain ipun mrentah tanah pagunungan, tur ipun nunas upon-upon sane mentik ring pategalane. Ipun molih madu alas ring gunung batune, tur punyan saitun ipune mentik lanus ring tanahe sane mabatu-batu.
14Banteng miwah kambingipune ngwedalang susu akeh pisan. Ipun maderbe biri-biri, kambing miwah banteng sane pinih becik, gandum sane pinih becik miwah anggur sane pepilihan.
15Kaulan Ida Sang Hyang Widi Wasa sayan sugih, nanging duraka. Ipun mokoh tur uleg-ulegan antuk dedaaran. Ipun nilar Ida Sang Hyang Widi Wasa sane ngardi ipun, tur nulak Juru Rahayunipune sane maha kuasa.
16Indik ipune nyungsung dewa-dewa, ngawinang Ida Sang Hyang Widi Wasa menggah. Indik sane jaat sane laksanayang ipun, ngawinang Ida duka.
17Ipun maturan ring widi-widi sane boya widi, widi sane nenten naenin kuningin antuk leluuripune, widi-widi sane nenten naenin kasungsung antuk bangsa Israele.
18Ipun lali ring Widinipune, Juru Rahayunipune sane maha kuasa, sane sampun ngicen ipun urip.
19Rikala Ida Sang Hyang Widi Wasa ngaksi paindikane punika, Ida tumuli menggah tur nulak pianak-pianakipune luh miwah muani.
20Sapuniki sabdan Idane: ‘Ulun lakar suud nulungin ia. Ulun lakar ngaksi kenken lakar panadinne, bangsa ane bengkung muah tusing satia ento.
21Ia ngaenang Ulun duka malantaran arca-arca ane gaena ento, buina iri ati teken ane tuara widi adanina widi. Wireh keto, Ulun lakar mrabotang bangsa ane tusing pantes madan bangsa buat ngaenang ia gedeg. Ulun lakar ngaenang ia iri ati, majalaran bangsa ane belog.
22Pidukan Ulune lakar ngendih murub buka apine tur ngeseng saananing ane ada di gumine kanti nganteg ka gumine ane sibeten, muah masmi dasar gununge.
23Ulun lakar nibenin ia baan bencana ane tan papegatan, tur Ulun lakar nibakang sakancan panah Ulune marep teken ia ajaka makejang.
24Ia lakar mati ulihan seduk muah gelem panes. Ia lakar mati ulihan grubug ane gede. Ulun lakar nglebang sato alas buat nyarap ia, muah lelipi ane mupas buat lakar nyotot ia.
25Siate lakar ngadakang pati di jalan-jalane, muah anake ane jumahne lakar tangkeb wisia. Bajang-bajange luh muah muani, aketo masih rare-rare wiadin anake tua cakluk, makejang lakar mati.
26Ulun makeneh nyirnayang ia kanti basmi kerta, apanga eda kanti ada anak ane lakar inget teken ia.
27Nanging Ulun tusing nglugrain musuh-musuhnyane nyumbungang awak ngaden ibanne ane suba ngalahang kaulan Ulune, sawireh sujatinne Ulun ane ngenyagang kaulan Ulune.’
28Bangsa Israel punika bangsa sane nenten maderbe pepineh. Ipun nenten pisan maderbe kawicaksanan.
29Ipun nenten mrasidayang ngrasayang napi awinan ipun kaon. Ipun nenten uning ngresepang paindikan sane sampun mamargi.
30Napi awinan ipun sareng siu kakaonang antuk anak adiri, miwah anak alaksa kakaonang antuk jadma sareng kekalih? Ida Sang Hyang Widi Wasa, Widinnyane, sampun nilar ipun, Widinnyane sane mawisesa sampun nyerahang ipun makasami.
31Meseh-mesehipune sami sampun pada uning, mungguing dewanipune niri sujatinipun tan pabayu, nenten mawisesa sakadi Widin Israele.
32Meseh-meseh Israele jaat sakadi Sodom miwah Gomorane, sakadi wit anggure sane ngwetuang woh anggur sane pait tur nglengehin.
33Sakadi toyan anggure sane kakardi antuk upas lelipi.
34Ida Sang Hyang Widi Wasa eling ring paindikan sane sampun kalaksanayang antuk meseh-mesehipune. Ida nyantosang dauh sane becik buat jaga nyisipang ipun.
35Ida Sang Hyang Widi Wasa jaga ngwales tur nyisipang ipun. Wenten masannyane ipun jagi labuh. Masanipune jagi nemu sengkala sampun nampek.
36Ida Sang Hyang Widi Wasa jaga mebasang kaulan Idane, rikala Ida nyingak mungguing ipun sampun tan pabayu. Ida pacang kawelas arsa ring jadmane sane astiti bakti ring Ida, rikala Ida ngaksi nenten wenten anak sane nulungin ipun.
37Irika Ida Sang Hyang Widi Wasa jaga mataken ring kaulan Idane sapuniki: ‘Dija ia dewa-dewane ane mawisesa ane cagerang kita?
38Kita suba maang dewa-dewane ento naar muluk-muluk aturan kitane, buina kita ngaturang anggur apang inuma. Ane jani tunden ia mai buat nulungin kita. Tunden ia malaib buat ngrahayuang kita.
39Ulun ene, tuah Ulun ngraga ane maraga Widi. Tusing ada buin Widi ane lenan, Ulun ane ngamatiang muah Ulun ane nguripang, Ulun ane natunin muah Ulun ane ngwasang. Tusing pesan ada anak ane nyidayang mapas pakardin Ulune.
40Saking sujati tuah Ulun ene maraga Widi ane nyeneng. Ulun manjerang tangan Ulune sarwi masumpah,
41mungguing Ulun lakar nyangih klewang Ulune ane ngendih tur Ulun nyingak apang kadilane kalaksanayang. Ulun lakar ngwales musuh-musuh Ulune muah nyisipang anake ane geting teken Ulun.
42Panah Ulune lakar liaba baan getihnyane muah pedang Ulune lakar ngamatiang sakancan anake ane tempal teken Ulun. Anake ane masiat nglawan Ulun, aukudko tusing ada ane lakar padalem Ulun. Yadian ia suba matatu wiadin katawan ia masih lakar mati.’
43Ih parabangsa, ajiangja kaulan Ida Sang Hyang Widi Wasa. Ida nyisipang sakancan anake sane ngamademang kaulan Idane. Ida nibakang pangwales ring musuh-musuhnyane tur Ida ngampurayang dosa-dosan kaulan Idane.”
44Dane Musa miwah Dane Yosua okan Dane Nun ngidungang kidunge punika, kantos bangsa Israele prasida miragiang kidunge punika.
Pitek
45Sasampune Dane Musa puput ngwarahang paurukan Ida Sang Hyang Widi Wasa ring bangsa Israel,
46dane raris ngandika sapuniki: “Elingangja, semeton patut nglaksanayang saananing pituduhe sane sampun aturang tiang ring semeton ring rahinane puniki. Wali-walininja malih nuturang ring oka-okan semetone, mangda ipun saking satia tuu sairing ring sakancan paurukan Ida Sang Hyang Widi Wasa.
47Paurukane puniki boyaja baos sane puyung, nanging sane dados urip semetone. Tinutinja makasami, kenginan semeton jaga muponin panjang umur ring jagat sane jaga aug semeton ring dauh Tukad Yordane.”
48Ring rahinane punika taler Ida Sang Hyang Widi Wasa masabda ring Dane Musa sapuniki:
49“Kemaja majalan ka Pagunungan Abarime di tanah Moab ane marep-arepan klawan kota Yerikone. Menekja ka muncuk Gunung Nebone, tur iwasinja tanah Kanaane, ane lakar paicayang Ulun teken bangsa Israel.
50Kita lakar mati di muncuk gununge ento, buke belin kitane Harun suba mati di muncuk Gunung Hore,
51sawireh kita makadadua tusing satia teken Ulun. Kita suba tusing ngajiang Ulun di arepan bangsa Israele, dugase kita di tongos yeh klebutane di Meriba, paek teken kota Kadese, di tegal melakang Sine.
52Kita lakar nepukin tanahe ento uli joh, nanging kita tusing masuk ka gumine ane paicayang Ulun teken bangsa Israele.”