Dual PanelWAHYU
1Nuju tanggal lima, sasih sane kaping pat, taun sane kaping tigang dasa, tiang Pandita Yeheskiel, okan Dane Busi, wenten sinarengan ring parawong Yehudane sane maselong ring sisin Tukad Kebare, ring Babel. Irika tiang ngeton langite mampakan tur tiang ngeton wahyun Ida Sang Hyang Widi Wasa.
2(Duk punika sampun limang taun suenipun Ida Sang Prabu Yoyakin kaselong.)
3Irika ring Babel, ring sisin Tukad Kebare, tiang miragi Ida Sang Hyang Widi Wasa masabda ring tiang, tur tiang rumasa kalikub antuk kawisesan Idane.
4Riwau tiang tumenga, raris panggihin tiang wenten angin baret rauh saking kaler. Samaliha wenten kilap makebiar saking guleme sane tebel, tur langite ring kiwa tengen guleme punika masinar galang. Ring genah kilape makebiar, irika wenten makelepan sakadi prunggu sane makilap.
5Ring tengah angin ribute punika wenten panggihin tiang rerupan sakadi manusa petang diri,
6nanging ipun suang-suang pada maderbe mua patpat miwah kampid patpat.
7Buntutipune sami leser, tur madaging kuku sakadi kukun bantenge. Buntutnyane punika sami makilap sakadi prunggu sane makosot.
8Sajawining mua miwah kampid, ipun suang-suang taler maderbe lima patpat sakadi liman manusa, tur asing-asing lima punika magenah ring sor kampidnyane suang-suang.
9Asing-asing rerupane punika ngebatang kampidipune kekalih, kantos tanggu-tanggunnyane makaplug, tur ipun ngwangun genah sane mrepat. Yening ipun mamargi ipun mamargi sinarengan, tur ipun nenten buat malih makipekan.
10Muannyane makapatpat punika mabina-binayan, inggih punika sane ring arep mamua manusa, sane ring tengen mamua singa, sane ring kiwa mamua banteng miwah sane ring ungkur mamua garuda.
11Kampid-kampidipune kekalih pada kebatang ipun munggah, kantos makaplug ring tanggun kampid timpalipune, tur kampidipune sane malih kekalih anggen ipun nekep dewekipune.
12Muanipun patpat marep nyatur arah, punika awinan rikala ipun mamargi sinarengan ipun nyidayang mamargi sakita karepipune, tur ipun nenten buat malih malipetan.
13Ring basan tengah rerupane punika wenten rerupan sakadi obor, sane geninnyane ngendih murub, tur saking genine punika metu kelepan kilap.
14Sato-satone punika malaib-laiban mrika-mriki becat pisan, waluya sakadi kilape.
15Rikala tiang nganengneng satone patpat punika, raris wenten panggihin tiang roda patpat nganteg ring tanahe ring samping asing-asing satone punika.
16Rupan rodane makapatpat punika pateh, sami pada ngendih makilap sakadi sesocan, tur wangunipune satmaka sakadi wenten roda ring tengah roda-rodane punika.
17Punika awinannya ipun mrasidayang mamargi ngungsi nyatur arah, saha nenten buat malih malipetan.
18Sibeh roda-rodane punika bek madaging mata.
19Yening sato-satone punika mamargi, roda-rodane punika taler mamargi nyarengin ipun, tur yening sato-satone punika matingtingan saking tanahe, roda-rodane punika taler sareng matingtingan.
20Sato-satone punika mamargi, manut kitannyane, tur roda-rodane punika taler sareng mamargi mrika, santukan sato-satone punika sane ngwawa roda-rodane punika.
21Duaning punika, sabilang sato-satone punika mamargi wiadin mararian, wiadin matingtingan saking tanahe, roda-rodane punika taler mamargi kadi asapunika.
22Ring duur tenggek sato-satone punika wenten sakadi langit-langit malengkung, sane malakar antuk kristal sane dumilah.
23Irika ring sor langit-langite punika, sato-satone pada majujuk tur pada ngebatang kampidnyane kekalih ring timpalnyane sane ring sampingipune, miwah kampidnyane sane kekalih kanggen ngangkebin dewekipune.
24Rikala ipun makeber, tiang miragi suaran kampidipune, waluya sakadi kerugan segarane, sakadi kuugan suaran bala waduane, tan bina sakadi kuugan sabdan Ida Sang Hyang Widi Wasa Sane Maha Kuasa. Rikala ipun wusan makeber, kampidipune banggayang ipun nglenteng,
25nangingke kantun wenten suara rauh saking duur langit-langite sane ring duur tenggekipune.
26Ring duur langit-langite punika wenten kanten sakadi singasana malakar antuk sesocan samrud, tur ring singasanane punika wenten anak malinggih sane pakantenannyane sakadi manusa.
27Anake punika rupannyane sakadi prunggu sane dumilah ring tengah genine. Anake punika masinar milehan maduluran sinar sane galang dumilah,
28sane nglawatang warnan bianglalahe. Kadi asapunika galang dumilah sane nyinahang teja wedanan Ida Sang Hyang Widi Wasa.
Ida S
Rikala tiang ngeton indike punika, tiang raris nyumbah sumungkem. Sasampune punika tiang raris miragi sabda,