Dual PanelKalui
1Ring langit-langit sane ring duur tenggek sato-satone sane makampid punika wenten panggihin tiang sane marupa sakadi singasana sane malakar antuk sesocan lasuardi.
2Ida Sang Hyang Widi Wasa raris ngandika ring anake sane mapangangge kain lenen punika, sapuniki: “Kemaja macelep di selagan roda-rodane ane di beten sato-satone ento, laut bekinja liman kitane aji baa ane ngendih. Sasubane keto laut sambehang baane ento sig kotane.” Irika raris panggihin tiang anake punika mamargi.
3Rikala anake punika ngranjing, sato-satone sane makampid punika sedek majujuk bedelod Perhyangan Agunge, tur raris wenten mega nglikub natar Perhyangane sane ring jero.
4Galang dumilah teja wedanan Ida Sang Hyang Widi Wasa tumuli metu saking sato-satone punika, raris mamargi ngungsi lawang Perhyangan Agunge. Sasampune punika megane tumuli nglikub Perhyangan Agunge, tur natar Perhyangane kalikub antuk galang dumilah.
5Suaran kampid sato-satone punika kapiragi ngantos rauh ring natar Perhyangane sane ring jaba. Suaranne waluya sakadi suaran Ida Sang Hyang Widi Wasa Sane Maha Kuasa.
6Rikala Ida Sang Hyang Widi Wasa ngandikayang anake sane mapangangge kain lenen punika ngambil geni akidik saking selagan rodane sane wenten ring sor satone punika, anake punika raris mamargi, tumuli majujuk ring sisin salah tunggal roda-rodane punika.
7Salah tunggal sato-satone punika ngenjuhang limannyane ngambil baa akidik, tumuli kagenahang ring liman anake sane mapangangge kain lenen punika. Anake punika raris ngambil baane punika tumuli makaon.
8Asing-asing satone punika panggihin tiang maderbe sane marupa sakadi lima ring sor kampidnyane suang-suang.
9Tiang taler manggihin wenten roda-roda patpat, sane rupan ipun pateh, sane magenah ring sabilang samping sato-satone punika. Roda-rodane punika masinar sakadi sesocan, pakantenanipun waluya rodane sane asiki wenten ring tengah rodane sane lianan.
10(10:9)
11Yening sato-satone punika mamargi ipun mrasidayang mamargi nyatur arah tur ipun nenten buat malih makipekan. Ipun sareng sami mamargi sinarengan ngungsi genah sane tuju ipun, tur ipun nenten malih mabading.
12Awak, tundun, lima, kampid miwah roda-rodannyane sami bek madaging mata.
13Roda-rodane puniki pateh sakadi roda-roda sane pecak panggihin tiang, dawege tiang manggihin wahyu sane pangawit.
14Asing-asing satone punika maderbe mua patpat. Muanipune sane kaping pisan marupa banteng, sane kaping kalih marupa manusa, sane kaping tiga marupa singa miwah muanipune sane kaping pat marupa garuda.
15(Sato-satone punika pateh sakadi sane pecak panggihin tiang ring sisin Tukad Kebare.) Yening satone punika munggah ka ambarane
16tur mamargi, roda-rodane punika tetep kantun nyarengin ipun. Rikala ipun ngebatang kampidipune jaga makeber, roda-rodane punika kantun manggeh nyarengin ipun.
17Yening satone punika mararian, rodane punika taler mararian. Yening satone punika makeber, rodane punika taler mamargi nyarengin ipun, santukan roda-rodane punika kawawa antuk sato-satone punika.
18Sasampune punika galang dumilah teja wedanan Ida Sang Hyang Widi Wasa tumuli matilar saking lawang Perhyangan Agunge, raris mamargi ngungsi genahe ring duur sato-satone punika.
19Irika panggihin tiang sato-satone punika ngebatang kampid-nyane raris makeber munggah saking tanahe, tur roda-rodane punika taler nyarengin ipun. Ipun mararian ring gapuran Perhyangan Agunge sane bedangin, tur galang dumilah nyunarin ipun.
20Irika tiang uning, mungguing sato-satone punika pateh sakadi sato-satone sane pecak panggihin tiang ring sor Widin Israele ring Tukad Kebare.
21Asing-asing satone punika maderbe mua patpat, kampid patpat miwah sane marupa sakadi lima wenten ring sor kampidipune suang-suang.
22Muanipune, pakantenannyane pateh pisan sakadi sane pecak panggihin tiang ring sisin Tukad Kebare. Asing-asing satone punika mamargi ngarepang tur mameneng.