Alkitab Mobile SABDA
[VER] : [BALI]     [PL]  [PB] 
 <<  Yehezkiel 11 >> 

Kota

1Roh Ida Sang Hyang Widi Wasa tumuli ngangkat tur makta tiang ka gapuran Perhyangan Agunge sane bedangin. Irika nampek ring gapurane wenten panggihin tiang anak lanang-lanang sareng slae, minakadinipun Dane Yaasanya okan Dane Asur miwah Dane Pelaca okan Dane Benaya sane pinaka dados parapamimpin bangsane.

2Ida Sang Hyang Widi Wasa ngandika ring tiang sapuniki: “Ih manusa, jlemane ene pada ngae rerincikan dursila tur nuturin kotane ene aji pitutur ane jele.

3Ia ngraos kene: ‘Iraga enggal buin nyujukang umah. Kotane ene buka payuke, tur iraga buka bene ane malablab di payuke. Nanging payuke ento nyayubin iraga uli sig apine.’

4Ih manusa, wireh keto, ane jani cacadja ia.”

5Roh Ida Sang Hyang Widi Wasa, tumuli ngwawa tiang, tur Ida Sang Hyang Widi Wasa ngandikayang tiang mangda ngrauhang pawuwus punika ring rakyate, sapuniki: “Ih wong Israel, Ulun nawang apa ane orahang kita muah apa ane rencanayang kita.

6Kita suba ngamatiang jlema liu pesan dini di kotane kanti jalan-jalane bek misi bangke.

7Sawireh keto, kene sabdan Ulun Sang Hyang Widi Wasa Sang Maha Luur, teken kita. Kotane ene saja dadi payuk, nanging encenke benne? Singja lenan, nah ento sakancan bangken jlemane ane suba matiang kita. Kita tusing lakar enu dini. Ulun lakar ngentungang kita pesu uli di kota.

8Kita tusing bani teken pedang, nanging Ulun lakar nekaang anak ngaba pedang buat nyiatin kita.

9Ulun lakar ngaadang kita uli di kota, laut nyerahang kita teken wong sunantara. Ulun suba nibakang danda pati teken kita,

10tur kita bakal mati di pasiatan di gumin kitane padidi. Sasubane keto anake makejang lakar nawang, mungguing Ulun ene Ida Sang Hyang Widi Wasa.

11Kotane ene tusing lakar nyayubin kita, buka payuke nyayubin bene ane malablab. Ulun lakar nyisipang kita dijaja kita nongos di gumi Israele.

12Kita lakar nawang, mungguing Ulun ene Ida Sang Hyang Widi Wasa. Sanun kitane ngamanggehang pidabdab bangsa-bangsane ane di kiwa tengen kitane, kita lempas teken pidabdab Ulune muah tusing satinut teken sapatitah Ulune.”

13Risedek tiang kantun ngwedar pangwakia, Dane Pelaca raris jeg seda. Tiang raris sumungkem sarwi nyerit sapuniki: “Duh Ratu Sang Hyang Widi Wasa Sane Maha Luur, punapike Palungguh IRatu jaga ngamademang sakancan jadmane sane kantun ring Israel?”

Janji

14Ida Sang Hyang Widi Wasa raris ngandika ring tiang sapuniki:

15“Ih manusa, jlemane ane nongos di Yerusalem pada ngraosang kita muah nyaman kitane wong Israel ane di paselongan. Ia pada ngraos kene: ‘Nyamane ane di paselongan, joh pesan baana mabakti ka ayun Ida Sang Hyang Widi Wasa. Ia suba pada nyerahang warisan tanahe ene teken iraga.’

16Ane jani orahangja teken nyaman kitane ane maselong, sabdan Ulune ene. Mula tuah Ulun ane ngutus ia nongos di pantaran bangsa-bangsane ane joh tur nyambehang ia di gumine ane lenan. Nanging lakar ada masanne Ulun lakar marengin ia di gumine ane ungsina ento.

17Sawireh keto, orahangja teken ia sabdan Ulune, Sang Hyang Widi Wasa Sang Maha Luur ene. Ulun lakar munduhang ia uli di gumi tongos Ulune nyambehang ia, tur Ulun lakar ngulihang tanah Israele teken ia.

18Yen ia suba mabalik kema, ditu ia patut ngaadang sakancan arca ane leteh muah cemer ane ada ditu.

19Ulun lakar maicayang keneh muah pepineh ane anyar teken ia. Ulun lakar ngaadang kenehne ane bengkung buka batune, tur lakar maicayang teken ia keneh ane astiti bakti.

20Sasubane keto ia lakar ngamanggehang pidabdab Ulune muah saking satia tuu ninutin sapatitah Ulune. Ia lakar dadi kaulan Ulun muah Ulun lakar dadi Widinnyane.

21Nanging Ulun lakar nyisipang jlemane ane demen nyungsung arca-arca ane leteh muah cemer ento. Ulun lakar ngukum ia majalaran laksanannyane.” Kadi asapunika pangandikan Ida Sang Hyang Widi Wasa Sane Maha Luur.

Kalui

22Sato-satone punika ngawitin makeber tur roda-rodane punika taler nyarengin ipun. Galang dumilah teja wedanan Widin Israele wenten ring duuripune.

23Sasampune punika galang dumilahe punika raris nilar kotane, raris mamargi ngungsi gunung sane dangin kotane punika.

24Sajeroning wahyu punika, Roh Ida Sang Hyang Widi Wasa raris ngangkat tiang, tumuli makta tiang mawali ring genah anake sane maselong ring panegara Babel. Sasampune punika, wahyune punika raris sirna.

25Tiang tumuli nuturang ring anake sane maselong irika sakancan paindikan sane sampun kapakantenang antuk Ida Sang Hyang Widi Wasa ring tiang.


  Share Facebook  |  Share Twitter

 <<  Yehezkiel 11 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel