Dual PanelSang
1Ida Sang Hyang Widi Wasa ngandika ring tiang, sapuniki:
2“Ih manusa, kita nongos di pantaran jlemane ane brontak. Ia pada ngelah mata, nanging ia tusing ngenot. Ia pada ngelah kuping nanging ia tusing ningeh, sawireh ia ento jlema brontak.
3Ane jani, ih manusa, kemaja gaenang iban kitane buntelan abesik, patuh buka buntelan pangungsine, laut majalanja sanune lemah. Depang sakancan anake nepukin kita makaad ngungsi ka tongose ane lenan. Sing saget jlemane ane brontak ento lakar nepukin kita.
4Sanune lemah, kaputja buntelan kitane satmaka buka anake ane maselong, apanga ia pada nepukin kita. Sasubane keto depang ia mabalih kita majalan makaad buka anake ane lakar maselong.
5Dikalan iane ngiwasin kita, pongpongja tembok umah kitane, laut pesuangja buntelan kitane uli bolong temboke ento.
6Depang ia ngiwasin kita dikalane kita negen buntelan kitane buat majalan ka petenge, tur tekepja matan kitane, apanga kita tusing nyidayang nepukin, kija lakar pangungsin kitane. Unduke ane jalanang kita ento lakar dadi patinget buat wong Israele.”
7Irika tiang raris nglaksanayang saluiring sane kapituduhang antuk Ida Sang Hyang Widi Wasa ring tiang. Ring rahinane punika tiang ngaput buntelan asiki, sakadi sane biasa kabakta antuk pangungsine, tur ring sore punika, rikalaning sampun ngawitin wengi tiang raris mongpong tembok antuk liman tiange, tumuli tiang medal. Rikala tiang kapabalih antuk jadmane sareng sami, tiang raris negen buntelan tiange tumuli mamargi makaon.
8Benjangne Ida Sang Hyang Widi Wasa ngandika ring tiang sapuniki:
9“Ih manusa, ane jani wong Israele ane brontak ento lakar matakon teken kita, unduk ane laksanayang kita ento.
10Orahang teken ia unduk ane sabdayang Ulun Sang Hyang Widi Wasa Sang Maha Luur, teken ia. Pawuwuse ene katiba teken sang pangeran ane mrentah di Yerusalem muah teken sakancan jlemane ane nongos ditu.
11Orahang teken ia, mungguing unduk ane laksanayang kita ento, makadadi lawat paundukan ane lakar nibanin ia ajaka makejang. Ia lakar dadi pangungsi tur katawan.
12Sang pangeran ane mrentah ia lakar negen buntelannyane dipetenge, laut malaib ngentasin bolongan temboke ane gaena baan rakyate. Ia lakar nekepin matannyane, tur tusing tepukina kija lakar pangungsinnyane.
13Nanging Ulun lakar ngebatang jaring Ulune tur nyaring ia aji jaringe ento. Sasubane keto Ulun lakar ngaba ia ka kota Babel, tur ditu ia lakar mati, nanging ia tusing nepukin gumine ento.
14Sakancan paraprakanggo, pangabih muah pangawalnyane lakar sambehang Ulun milehan nyatur arah, tur rakyate lakar pada ngruruh ia buat lakar matianga.
15Dikalan Ulune nyambehang ia di pantaran bangsa-bangsane muah di gumi sunantarane, ditu ia lakar nawang mungguing Ulun ene Ida Sang Hyang Widi Wasa.
16Ulun lakar ngenuang ia abedik, luput uli pasiatan, uli sayah muah grubug, apanga ditu di pantaran bangsa-bangsane ia lakar marasa kenken cemer laksanannyane, laut ia ngresep, mungguing Ulun ene Ida Sang Hyang Widi Wasa.”
Ciri
17Ida Sang Hyang Widi Wasa ngandika ring tiang sapuniki:
18“Ih manusa, yen kita madaar, ngejerja, tur ngetorja dikalan kitane nginum yeh.
19Orahang teken bangsane makejang, kene pawuwus Ida Sang Hyang Widi Wasa Sang Maha Luur, ane katiba teken wong Yerusaleme ane enu nongos di guminnyane, mungguing ia lakar ngejer dikalannyane madaar muah jejeh ngetor dikalannyane nginem yeh. Guminnyane lakar suung mangmung, sawireh sakancan jlemane ane nongos ditu tusing ngelah pidabdab.
20Kota-kotane ane jani bek misi jlema, ento lakar kasirnayang tur gumine ento lakar kadadiang tegal melakang. Sasubane keto ia lakar nawang mungguing Ulun ene Ida Sang Hyang Widi Wasa.”
Seson
21Ida Sang Hyang Widi Wasa raris ngandika ring tiang, sapuniki:
22“Ih manusa, apa kranane wong Israele setata ngorahang sesonggane ene: ‘Suba makelo pesan rasanne, nanging ramalane tusing masih kasidan’?
23Ane jani orahang teken ia unduk ane lakar nikayang Ulun, Sang Hyang Widi Wasa Sang Maha Luur, numplek teken unduke ento. Ulun lakar mragatang sesonggane ento. Ulun tusing ledang yen sesonggane ento buin korahang di Israel. Nanging orahang teken ia kene: Panemayannyane suba teka muah ramalane ento lakar kasidan.
24Di pantaran wong Israele tusing enu lakar ada wahyu-wahyu ane palsu muah ramalan ane mimpas.
25Ulun, Sang Hyang Widi Wasa Sang Maha Luur, lakar ngandika teken ia, tur unduk ane nikayang Ulun ento lakar kasidan, tur tusing buin kasangkeang. Sanun kitane idup, ih kita parapembrontak, Ulun lakar nglaksanayang unduk ane suba sabdayang Ulun teken kita. Ulun suba masabda buka keto.” Sapunika sabdan Ida Sang Hyang Widi Wasa Sane Maha Luur.
26Ida Sang Hyang Widi Wasa raris ngandika ring tiang sapuniki:
27“Ih manusa, wong Israele ngaden, mungguing wahyu ane warah-warahang kita ento, numplek teken paundukan ane enu joh.
28Wireh keto, orahang teken ia, mungguing Ulun Sang Hyang Widi Wasa Sang Maha Luur, ngandika buka kene: Tusingja buin masangke, unduk ane suba nikayang Ulun ento lakar kasidan. Ulun Sang Hyang Widi Wasa Sang Maha Luur ane suba masabda buka keto.”