Dual PanelIda S
1Makudang-kudang pamimpin wong Israele pada rauh nakenang ring tiang, indik pakarsan Ida Sang Hyang Widi Wasa.
2Irika Ida Sang Hyang Widi Wasa raris ngandika ring tiang, sapuniki:
3“Ih manusa, anake ene suba pada nyerahang kenehne teken arca-arcane muah maang dewekne dandana baan arca-arcane ento buat ngae dosa. Apake ia ngaden Ulun lakar nyaurin ia?
4Ane jani ngraosja teken ia, tur orahang teken ia, sabdan Ida Sang Hyang Widi Wasa Sang Maha Luur ane katiba teken ia, kene: Sakancan wong Israele ane suba nyerahang keneh teken arca-arcane, tur baanga dewekne dandana baan arcane ento buat ngae dosa, laut teka matakon teken nabine, ia lakar maan pasaut uli Ulun, nah ento pasaut ane suba kapastiang buat arca-arcannyane ane liu ento.
5Sakancan arca-arcane ento suba ngranayang wong Israele pada tungkas teken Ulun, nanging majalaran uli pasaut Ulune ene, Ulun ngajap-ajap ia apang ia buin mabalik astiti bakti teken Ulun.
6Wireh keto ane jani orahang teken wong Israele, sabdan Ulune Sang Hyang Widi Wasa Sang Maha Luur kene: Mabalikja tur kutangja arca-arcan kitane ane cemer ento.
7Yening ada satunggaling wong Israel wiadin satunggaling wong sunantara ane nongos di tengah pasamuan wong Israele, ane tungkas teken Ulun tur nyungsung arca, laut teka matakon teken nabine, Ulun Sang Hyang Widi Wasa, ane lakar ngicen ia pasaut.
8Ulun lakar nglawan ia. Ulun lakar nadiang ia conto. Ulun lakar mesuang ia uli pasamuan kaulan Ulune, apanga kita nawang, mungguing Ulun ene Ida Sang Hyang Widi Wasa.
9Yening ada nabi ane ngapus maang ia pasaut ane palsu, maka sujatinne Ulun, Sang Hyang Widi Wasa, ane suba ngapus. Ulun lakar ngaadang ia uli di pantaran wong Israele.
10Nabi muah anake ane matakon ento, makadadua lakar nampi pasisip ane patuh.
11Ulun nyalanang unduke ene, buat nyaga wong Israele apanga eda ia ngutang Ulun muah ngletehin dewekne majalaran dosa-dosannyane. Ia lakar dadi kaulan Ulune muah Ulun lakar dadi Widinnyane.” Kadi asapunika sabdan Ida Sang Hyang Widi Wasa Sane Maha Luur.
Nuh,
12Ida Sang Hyang Widi Wasa ngandika ring tiang, sapuniki:
13“Ih manusa, yening ada panegara ane ngae dosa di ayun Ulune muah tusing satia tuu teken Ulun, Ulun lakar ngamengang tangan Ulune, tur nyirnayang pasediaan bebekelannyane. Ulun lakar nedunang sayah gede, tur ngamatiang manusa muah burone makejang.
14Dipradene anake makatetelu ento: Nuh, Daniel muah Ayub ada nongos ditu, kamelahannyane tuah nyidayang ngrahayuang deweknyane dogen.” Kadi asapunika sabdan Ida Sang Hyang Widi Wasa Sane Maha Luur.
15“Wiadin Ulun lakar nekaang buron galak-galak buat ngamatiang rakyate tur nadiang gumine ento madurgama, kanti tusing ada anak ane bani ngliwat ditu.
16Tur yadianja jlemane ane tetelu ento bareng nongos ditu, sasajaane Ulun Ida Sang Hyang Widi Wasa Sang Maha Luur, Widi ane nyeneng mastiang mungguing anake tetelu ento tusing lakar nyidaang ngrahayuang nyen-nyen, diapinja pianakne padidi. Ia tuah nyidayang ngrahayuang idupne padidi dogen, tur gumine ento lakar dadi tegal melakang.
17Wiadin Ulun lakar ngadakang siat di gumine ento, tur nekaang sanjata ane mawisesa buat nyapuh rakyat muah burone makejang,
18yadianja anake tetelu ento ada ditu. Sasajaane Ulun, Ida Sang Hyang Widi Wasa Sang Maha Luur, Widi ane nyeneng mastiang mungguing anake ento tusing nyidayang ngrahayuang pianakne, sajabaning uripne padidi.
19Yening Ulun niwakang grubug teken gumine ento, tur sajeroning pidukan Ulune, Ulun liu mancut angkihan, ngamatiang jlema muah buron,
20yadianja Nuh, Daniel muah Ayub nongos ditu, sasajaane Ulun Ida Sang Hyang Widi Wasa Sang Maha Luur, Widi ane nyeneng, mastiang mungguing ia tusing nyidayang ngrahayuang pianakne. Kapatutannyane tuah nyidayang ngrahayuang dewekne padidi dogen.”
21Sapuniki sabdan Ida Sang Hyang Widi Wasa Sane Maha Luur: “Ulun lakar nibakang ukuman ane paling berat teken kota Yerusalem, patpat liunne, nah ento: Siat, sayah gede, buron galak-galak muah grubug, buat nyirnayang jlema muah burone makejang.
22Yening ada anak ane nyidayang enu idup tur ngluputang pianakne, iwasinja ia, yen ia teka maranin kita. Iwasinja ambate corahnyane, tur pracayaja mungguing ukuman ane tibakang Ulun teken kota Yerusaleme ento adil.
23Sasubane ento kita lakar nawang mungguing sakancan ane laksanayang Ulun ento ada dadalane ane beneh.” Kadi asapunika sabdan Ida Sang Hyang Widi Wasa Sane Maha Luur.