Dual PanelPanga
1Ida Sang Hyang Widi Wasa masabda ring tiang sapuniki:
2“Ih manusa, kengkenang mandingang punyan anggure teken punyan kayune ane lenan? Kengken kamelahan carang-carang punyan anggure yen bandingang teken punyan kayune ane di alase?
3Nyidayangke kita ngunayang punyannyane dadi lakar? Nyidayangke kita ngae pangantungan, buat ngantungang prabot, aji punyannyane ento?
4Sasajaane ia tuah melah anggon ngendihang api, buina yen tanggu-tanggunne suba puun tur untengne sedeng ngendiha nyidayangke kita nganggon lakar?
5Sujatinne kayune ento tan paguna, yadianko satondennyane puun. Ane jani apine morbor tur muunang kayune ento, dadinne nyangetang buin tan pagunannyane.”
6Sane mangkin sapuniki sabdan Ida Sang Hyang Widi Wasa Sane Maha Luur: “Patuh buka punyan anggure ane bakatang di alase tur katunjel, aketo masih Ulun lakar nyemak anake ane nongos di Yerusalem,
7laut lakar ngukum ia. Ia suba malaib nglidin apine ane abesik, nanging ane jani api masih ane lakar muunang ia. Yen Ulun ngukum ia, kita lakar nawang, Ulun ene Ida Sang Hyang Widi Wasa.
8Ia suba tusing satia tuu teken Ulun, ento awanane Ulun lakar nadiang gumine ento dadi tegal melakang.” Kadi asapunika sabdan Ida Sang Hyang Widi Wasa Sane Maha Luur.