Dual Panel1sane kadi asapuniki: “Ih manusa, bangun tur majujukja! Ulun lakar masabda teken kita.”
2Risedek sang sabda ngandika ring tiang, irika Roh Ida Sang Hyang Widi Wasa ngencegin tiang, tumuli mangunang tiang ngantos tiang majujuk. Tiang tumuli miragi sang sabda nglanturang pangandika kadi asapuniki:
3“Ih manusa, Ulun ngutus kita buat maranin wong Israele. Ia suba pada brontak tur nungkasin Ulun kanti kayang jani, patuh buka laksanan leluurnyane.
4Ia ajaka makejang bengkung pesan tur tusing ngajiang Ulun, ento awanane Ulun ngutus kita, buat ngorahin ia, mungguing Ulun Sang Hyang Widi Wasa Sang Maha Luur masabda teken ia.
5Yadian jlemane ane brontak ento nyak madingehang munyin kitane yadian tusing, ditu ia lakar pada nawang, mungguing di pantarannyane suba ada nabi.
6Nanging kita, ih manusa, eda pesan kita takut teken ia, wiadin teken sakancan paundukan ane orahanga. Ia lakar nglawan tur nganistayang kita satmaka kita nongos di pantaran cledune. Nanging entegangja kenehe, edaja takut teken jlemane ane brontak ento muah teken sakancan paundukan ane orahanga.
7Kita patut ngorahang teken ia, unduk ane lakar sabdayang Ulun teken kita, yadian ia nyak madingehang yadian tusing. Ingetangja mungguing ia ento jlema ane brontak.
8Ih manusa, padingehangja sabdan Ulune teken kita. Edaja kita brontak buka iane. Enggangangja bibih kitane, laut daarja, barang ane lakar paicayang Ulun teken kita.”
9Irika tiang raris manggihin wenten tangan menjuh ring tiang, tur tangane punika ngambel cakepan.
10Tangane punika raris mukak cakepan punika. Irika panggihin tiang mungguing, cakepan punika bek matulis. Ring cakepan punika sinurat kidung pandulame, sesambatan miwah pangasih-asih.