Dual Panel1Ida Sang Hyang Widi Wasa masabda sapuniki: “Ih manusa, ledja cakepane ene. Sasubane keto kemaja ngraos teken wong Israele.”
2Irika tiang raris ngenggangang bungut tiange, tur Ida raris maicayang cakepane punika buat jaga led tiang.
3Ida ngandika sapuniki: “Ih manusa, ledja cakepan ane paicayang Ulun teken kita ene! Waregang basang kitane aji cakepane ene.” Tiang tumuli ngeled cakepan punika, tur rasannyane manis waluya sakadi madune.
4Sasampune punika Ida Sang Hyang Widi Wasa raris ngandika sapuniki: “Ih manusa, kemaja tekain wong Israele tur orahang teken ia, apaja ane suba sabdayang Ulun teken kita.
5Ulun tusingja ngutus kita maranin bangsa ane nganggon basa asing ane sukeh, nanging Ulun ngutus kita maranin bangsa Israel.
6Yening Ulun ngutus kita maranin bangsa-bangsane ane gede, ane ngraos nganggo basa ane sukeh-sukeh ane tuara tawang kita, sinah ia lakar madingehang raos kitane.
7Nanging tusing ada wong Israele ane lakar nyak madingehang munyin kitane, malahan ia tusing nyak madingehang sabdan Ulune. Ia ajaka makejang pada bengkung.
8Ane jani Ulun lakar nadiang kita bengkung muah kenyat patuh buka iane.
9Ulun lakar nadiang kita kukuh bakuh buka batu kaange tur katos buka berliane, edaja kita takut teken jlemane ane brontak ento.”
10Ida Sang Hyang Widi Wasa malih ngandika kadi asapuniki: “Ih manusa, melahang pesan madingehang tur ingetangja sakancan ane sabdayang Ulun teken kita.
11Sasubane keto kemaja alih nyaman kitane ane tunggal bangsa, ane di paselongan. Ditu orahang teken ia, mungguing Ulun Sang Hyang Widi Wasa Sang Maha Luur masabda teken ia, yadian ia nyak madingehang munyin kitane, yadian tusing.”
12Sasampune punika Roh Ida Sang Hyang Widi Wasa raris ningtingang tiang, tur tiang miragi suara makuug jangih pisan ring ungkur tiange, sapuniki: “Pujija kaluihan Ida Sang Hyang Widi Wasa ring suargan sane ring luur.”
13Tiang miragi suaran kampid-kampid satone punika makaplug ring ambarane, miwah gredegan suaran roda-rodane punika jangih pisan, waluya sakadi linuh.
14Kawisesan Ida Sang Hyang Widi Wasa raris nedunin tiang maduluran kakuatan sane ageng, tur rikala Roh Idane makta tiang makaon, manah tiange rumasa sebet miwah sedih.
15Irika tiang raris rauh ring Tel-Abib, ring sisin Tukad Kebare, genah anake maselong. Irika tiang magenah pitung rahina suenipun, kaliput antuk paindikan sane sampun panggihin miwah piragi tiang.
Ida S
16Sasampun lintang pitung rahina, Ida Sang Hyang Widi Wasa raris ngandika ring tiang, sapuniki:
17“Ih manusa, Ulun nadiang kita pajagaan buat bangsa Israele. Kita patut nekedang teken ia, sakancan pawuwus ane paicayang Ulun teken kita.
18Yening Ulun ngwarah-warahang mungguing ada anak corah makire mati, nanging kita tusing nyak matinget ia, apanga ia ngesehin bikasne, apanga ia prasida ngrahayuang uripne, ditu ia lakar mati sajeroning dosannyane, tur Ulun lakar mategenin kita buat matinnyane ento.
19Nanging yen kita matinget anake ane corah ento, tur ia tusing nyak suud ngae dosa, ia masih lakar mati sajeroning dosannyane, sakewala urip kitane lakar luput.
20Yening ada anak patut ngawitin buin malaksana corah, tur Ulun ngaba ia sig tongose ane baya, ditu ia lakar mati yening kita tusing matinget anake ento. Ia lakar mati malantaran dosannyane. Ulun tusing lakar ngingetang laksanannyane ane ayu, tur Ulun lakar mategenin kita buat matinnyane ento.
21Yening kita matinget anak ane patut apanga ia tusing ngae dosa, tur ia madingehang munyin kitane laut ia tusing ngae dosa, ditu ia lakar tetep enu idup, tur urip kitane masih lakar kaluputang.”
Nabi
22Tiang ngrasayang kawisesan teja wedanan Ida Sang Hyang Widi Wasa, tur tiang miragi Ida ngandika ring tiang, sapuniki: “Bangunja, laut kemaja pesu ka lebake. Ulun lakar ngandika teken kita ditu.”
23Sasampune punika tiang raris mamargi medal ka lebake, tur irika tiang ngeton kaluihan Ida Sang Hyang Widi Wasa, sakadi sane sampun panggihin tiang ring sisin Tukad Kebare. Tiang raris sumuyud sumungkem,
24nanging Roh Ida Sang Hyang Widi Wasa raris ngencegin tiang, tumuli mangunang tur nyujukang tiang. Ida Sang Hyang Widi Wasa, masabda ring tiang sapuniki: “Kemaja mulih, tur kurungja iban kitane jumah meten.
25Ih manusa, kita lakar kategul aji tali tur kita lakar tusing nyidayang pesu magubugan.
26Ulun lakar ngawanang kita kolok, apanga kita tusing nyidayang matinget bangsane ane brontak ene.
27Sasubane keto Ulun lakar buin masabda teken kita muah ngilangang kolok kitane tur kita patut ngorahang teken ia, mungguing Ulun Sang Hyang Widi Wasa Sang Maha Luur ane masabda. Makudang-kudang anak uli pantarannyane lakar madingehang munyin kitane, nanging ada masih ane tusing lakar ngrunguang kita, sawireh ia ento bangsa ane brontak.”