Dual PanelRatun
1Ring tanggal apisan, sasih sane kaping roras, taun sane kaping roras sajeroning tiang maselong, Ida Sang Hyang Widi Wasa ngandika ring tiang, sapuniki:
2“Ih manusa, baangja raja Mesire patinget ane seken. Tekedang pawarah-warah Ulune ene teken ia, kene: Kita matingkah buka singane di pantaran bangsa-bangsane, nanging kita waluya buka buaya ane cebar-cebur di tengah tukade. Kita ngubek yehe aji batis kitane tur mutekang yeh tukade kanti cara endut.
3Dikalan parabangsane mapunduh ajaka liu, Ulun lakar ngejuk kita aji jaring Ulune, tur nglugrain parabangsane ento maid jaringe ento ka sisi.
4Ulun lakar mantigang kita di tanahe laut nekaang sakancan kedis muah satone di gumine buat ngamah kita.
5Ulun lakar ngebekin gunung-gunung muah lebake aji bangken kitane ane berek.
6Ulun lakar ngecorang getih kitane kanti maliah-liah di gunung-gununge muah ngebekin tukad-tukade.
7Dikalane Ulun nyirnayang kita, Ulun lakar nukub langite muah ngilangang bintang-bintange. Suryane lakar mengkeb di duur guleme tur bulane tusing masinar.
8Ulun lakar ngaadang sakancan galang langite tur nyabatang gumin kitane sig peteng dedete. Ulun Sang Hyang Widi Wasa Sang Maha Luur ane suba masabda buka keto.
9Liu bangsa-bangsane lakar pada marasa keweh, dikalan Ulune nyebar orta unduk karusakan kitane di sakuub gumine ane tonden tawang kita.
10Unduk ane tibakang Ulun teken kita ento lakar ngawanang liu bangsa-bangsane pada tengkejut baan jejehne. Dipanemayan uug kitane, sakancan ratu muah bangsane ento pada jejeh ngetor ngingetang idupne suang-suang.”
11Ida Sang Hyang Widi Wasa Sane Maha Luur ngandika ring raja Mesire, sapuniki: “Iba bakal ngarepin pedang raja Babele.
12Ulun lakar nglugrain paraprajurit, uli bangsa-bangsa ane angkara murka ngaud pedangne tur ngamatiang rakyat kitane makejang. Sakancan rakyat kitane muah saananing ane sumbungang kita makejang lakar kasirnayang.
13Ubuhan kitane lakar matiang Ulun di tongosne nginem yeh di tibuane. Tusing enu buin ada jlema wiadin ubuh-ubuhan ane mutekang yeh.
14Ulun lakar nepinin yeh kitane degdeg tur ening, tur nepinin tukad-tukad kitane membah saha banban. Ulun Sang Hyang Widi Wasa Sang Maha Luur ane suba masabda.
15Dikalan Ulune nadiang gumi Mesire tongos pangutangan ane suung mangmung, tur nyirnayang sakancan ane nongos ditu, ditu ia pada lakar nawang mungguing Ulun ene Ida Sang Hyang Widi Wasa.
16Patingete ane seken ene lakar dadi kidung kaduhkitan. Paraluh-luh bangsa-bangsane lakar pada ngidungang kidunge ento, buat mangenang gumi Mesire muah rakyate makejang. Ulun Ida Sang Hyang Widi Wasa Sang Maha Luur ane suba masabda buka keto.”
Pati
17Ring tanggal limolas, sasih sane kaping pisan taun sane kaping roras sajeroning tiang maselong, Ida Sang Hyang Widi Wasa, ngandika ring tiang, sapuniki:
18“Ih manusa, mapangenanja buat rakyat Mesire ane liu ento. Entungangja ia ka pati loka bareng-bareng ngajak bangsa-bangsa ane mawisesa ane lenan.
19Orahang teken ia kene: ‘Apake kita ngaden dewek kitane melahan teken anake ane lenan? Kita lakar pada ngungsi ka pati loka, tur medem ditu di pantaran jlemane ane tan pawidi.’
20Rakyat Mesire lakar bah ngajak anake ane mati di pasiatan. Pedange suba sedia lakar ngamatiang ia ajaka makejang.
21Parapahlawan ane kabinawa muah paraanake ane masiat maruang teken wong Mesire lakar pada mapag tekan wong Mesire di pati loka. Ia ajaka makejang pada masuryak kene: ‘Paraanake ane tan pawidi ane mati di pasiatan suba pada teka mai, tur dini pada pajlempang.’
22Gumi Asure suba ditu, kiter baan kuburan paraprajuritnyane. Prajurit-prajurite ento makejang mati di pasiatan,
23tur kuburannyane sig tongos ane paling daleme di pati loka. Paraprajuritne makejang mati di pasiatan, tur kuburannyane ngiter kubur gumi Asure, yadiastun ia taen nengkejutang gumin anake idup.
24Gumi Elame masih ada ditu, kilehin baan kuburan paraprajuritnyane. Prajurit-prajurite ento makejang mati di pasiatan, tur ia tan pasunat pada ngungsi ka pati loka. Dugase enu idup ia pada nyebar katakutan, nanging ane jani ia pada bah mati tur nandang kimud.
25Gumi Elame bah di pantaran anake ane mati di pasiatan tur kuburan paraprajurite pada ngiter ia. Ia ajaka makejang tan pasunat, makejang mati di pasiatan. Dugase enu idup ia nyebar katakutan, nanging ane jani ia pada bah mati tur nandang kimud muah nampi paundukan ane patut tampine teken anake ane mati di pasiatan.
26Gumi Mesek muah Tubale masih ada ditu, kiter baan kuburan paraprajuritne. Ia ajaka makejang tusing masunat tur makejang mati di pasiatan, yadiastun ia taen nengkejutang anake ane idup.
27Sawannyane pada kaupakara luih buka sawan paraprawirane ane nguni, ane ngungsi pati loka saha sregep magegaman. Pedangne kapejang beten sirahne muah tamengne di duur awakne. Paraprawirane ento taen mawisesa pesan buat nengkejutang anake ane idup.
28Keto undukne wong Mesire lakar bah nylempang di pantaran anake ane tusing masunat ane mati di pasiatan.
29Gumi Edome masih ditu ajaka parapamrentahnyane. Ia ajaka makejang prajurit ane mawisesa, nanging ane jani ia bah di pati loka ngajak anak ane tusing masunat, ane mati di pasiatan.
30Parapangerane ane uli kaja makejang pada ada ditu, tur keto masih wong Sidone. Kawisesannyane taen nyebar katakutan, nanging jani ia pada ngungsi pati loka saha nandang kimud ngajak anake ane mati di pasiatan, tur bah mati tan pasunat. Ia pada bareng-bareng nandang kimud ngajak anake ane ngungsi ka pati loka.”
31Pangandikan Ida Sang Hyang Widi Wasa Sane Maha Luur, sapuniki: “Dikalan raja Mesire nepukin unduk anake ane mati di pasiatan, ento lakar nglipurang ia muah wadua balannyane.
32Ulun nadiang raja Mesire buat nengkejutang anake ane idup, nanging ia muah wadua balannyane lakar kamatiang tur bah mati ngajak sakancan anake ane tan pasunat ane mati di pasiatan.” Sapunika sabdan Ida Sang Hyang Widi Wasa Sane Maha Luur.