Dual PanelLebak
1Tiang ngrasayang kakuasan teja wedanan Ida Sang Hyang Widi Wasa ngliab dewek tiange, tur roh Idane raris ngajak tiang medal ka satunggaling lebak tur lebake punika bek madaging tulang.
2Ida nuntun tiang milehan ring lebake punika, tur irika panggihin tiang tulang akeh pisan ring lebake punika tur tulang-tulange punika sami tuh latuh.
3Ida raris ngandika ring tiang, sapuniki: “Ih manusa, apake tulang-tulange ene nyidayang buin idup?” Pasaur tiange, sapuniki: “Duh Ratu Sang Hyang Widi Wasa Sane Maha Luur wantah Palungguh IRatu sane ngwikanin.”
4Ida raris ngandika sapuniki: “Ramalangja tulang-tulange ene. Tunden tulang-tulange ane tuh ento madingehang sabdan Ida Sang Hyang Widi Wasa.
5Orahang teken ia, mungguing Ulun Sang Hyang Widi Wasa Sang Maha Luur, masabda teken ia kene: Ulun lakar mapaica angkihan teken iba tur buin ngidupang iba.
6Ulun lakar mapaica uat, isi, tur ngaput iba aji kulit. Ulun lakar mapaica angkihan teken iba tur buin ngidupang iba. Ditu iba lakar nawang, mungguing Ulun ene Sang Hyang Widi Wasa.”
7Duaning punika tiang raris ngramal sakadi sane sampun kapituduhang ring tiang. Sedekan tiang mabaos, raris wenten suara pakrotok piragi tiang, tur tulang-tulange punika raris matepan dados asiki.
8Risedek tiang nureksain indike punika, tulang-tulange punika raris kakaput antuk uat miwah isi, tur sapanglanturipun antuk kulit. Nanging ipun durung madaging angkihan.
9Ida Sang Hyang Widi Wasa raris ngandika ring tiang, sapuniki: “Ih manusa, ramalangja angine. Orahang teken angine, mungguing Ida Sang Hyang Widi Wasa Sang Maha Luur nitahang ia, apanga ia mampeh uli nyatur arah, buat mabayonin jlema-jlemane ane tonden mangkihan ene, apanga ia pada idup buin.”
10Duaning punika tiang raris ngramal sakadi sane sampun kapituduhang ring tiang. Irika angkihane raris ngrangsukin jadma-jadmane sane durung mangkihan punika, tur ipun raris pada murip tur raris bangun. Geboganipune akeh pisan, cukup buat ngwangun pasukan wadua bala.
11Ida Sang Hyang Widi Wasa ngandika ring tiang sapuniki: “Ih manusa, bangsa Israele waluya tulang-tulange ene. Ia pada ngorahang ibanne tuh latuh, tusing ngelah pangajap-ajap muah tusing ada ane nyandang cagerang dimani wekas.
12Sawireh keto, ramalangja kaulan Ulune Israel, tur orahang teken ia, mungguing Ulun Sang Hyang Widi Wasa Sang Maha Luur lakar ngagah kuburannyane. Ulun lakar mesuang tur ngamulihang ia ka tanah Israel.
13Dikalan Ulune ngagah kuburan tongos kaulan Ulune matanem tur mesuang ia, ditu ia lakar nawang mungguing Ulun ene Sang Hyang Widi Wasa.
14Ulun lakar mapaica angkihan teken ia, buin ngidupang ia, laut nglugrain ia nongos di guminnyane padidi. Ditu ia lakar pada nawang mungguing Ulun ene Sang Hyang Widi Wasa. Ulun suba majanji mungguing Ulun lakar nglaksanayang unduke ene, tur Ulun ngarsayang unduke ento. Ulun Sang Hyang Widi Wasa ane suba masabda buka keto.”
Yehud
15Ida Sang Hyang Widi Wasa malih ngandika ring tiang, sapuniki:
16“Ih manusa, nyemakja tungked kayu abesik, laut tulisin tungkede ento kruna kene: ‘Kaprabon Yehuda’. Suba keto buin jemak tungked ane lenan, tur tulisin kruna ‘Kaprabon Israel’.
17Sasubane keto gisija tungkede makadadua ento, atepang tanggunne apanga ia ngenah buka tungkede abesik.
18Yen bangsan kitane matakon teken kita apa artin unduke ento,
19orahang teken ia mungguing Ulun Sang Hyang Widi Wasa Sang Maha Luur lakar ngambil tungkede ane nglawatang Israel, laut ngejang ia dadi abesik ngajak tungkede ane nglawatang Yehuda. Aji tungkede makadadua ento, Ulun lakar ngardi tungked abesik, tur tungkede ento lakar gambel Ulun.
20Gisija tungkede ento makadadua apanga tepukina baan rakyate.
21Sasubane keto, orahang teken ia, mungguing Ulun Sang Hyang Widi Wasa Sang Maha Luur lakar ngajak ia pesu uli pantaran bangsa-bangsa tongos iane ngumbara, laut munduhang ia dadi abesik tumuli ngamulihang ia ka guminnyane padidi.
22Ulun lakar munduhang ia dadi bangsa abesik di guminnyane, di pagunungan Israel. Ia lakar ngelah raja tuah aukud buat mrentah ia, tur ia tusing buin kaepah dadi duang bangsa wiadin kasibak dadi duang kaprabon.
23Ia tusing enu buin ngletehin dewekne aji arca-arca ane cemer, wiadin ngusakang dewekne aji dosa. Ulun lakar mebasang ia uli sakancan solah ane ngawanang ia madosa muah alpaka teken Ulun. Ulun lakar nyuciang ia. Ia lakar dadi kaulan Ulune tur Ulun lakar dadi Widinnyane.
24Satunggaling ratu ane buka parekan Ulune Daud ane lakar dadi ratunnyane. Ia lakar kaprentah baan pamrentah abesik, tur ia lakar satia ninutin pidabdab Ulune.
25Ia lakar nongos di gumi ane paicayang Ulun teken parekan Ulune Yakub, nah ento di tanah sig tongos paraleluurnyane. Ia lakar nongos ditu sakayang-kayang, keto masih pianak-pianak muah sakancan katurunannyane. Satunggaling ratu ane buka parekan Ulune Daud lakar mrentah ia kanti salawas-lawasne.
26Ulun lakar ngardi pasubaya ngajak ia ane makadadi pikukuh karahayuannyane salawas-lawasne. Ulun lakar ngrajegang ia tur ngawanang ia endah-gumendah. Buina Ulun lakar ngadegang Perhyangan Agung Ulune di guminnyane buat salawas-lawasne.
27Ulun lakar malingga ditu marengin ia. Ulun lakar dadi Widinnyane, tur ia lakar dadi kaulan Ulune.
28Dikalan Ulune ngadegang Perhyangan Agung Ulune ditu di pantarannyane ngantos salawas-lawasne, ditu parabangsane lakar pada nawang, mungguing Ulun Sang Hyang Widi Wasa suba nyelik bangsa Israele dadi kaulan Ulun ngraga.”