Dual PanelSang
1Ida Sang Hyang Widi Wasa ngandika ring tiang sapuniki:
2“Ih manusa, uman-umanja Gog kepalan pamrentah bangsa Mesek muah Tubale di tanah Magog. Uman-umanja ia,
3tur orahang teken ia, mungguing Ulun Sang Hyang Widi Wasa Sang Maha Luur ane dadi musuhne.
4Ulun lakar malikang ia, tur masang sangket di cadikne, laut maid ia pesu ngajak sakancan pasukannyane. Wadua balannyane ento, luire pasukan ane negakin jaran ane mapanganggo seragam, ajaka liu pesan, tur asing-asing prajuritnyane pada ngaba tameng muah sanjata pedang.
5Anak uli Persia, Sudan muah Libia pada marengin ia, tur makejang pada ngaba tameng muah nganggo topi waja.
6Sawatek jlemane sura dira uli gumin Gomer miwah Bet-Togarmane ane bedaja makejang pada marengin ia, aketo masih anake ane uli makudang-kudang bangsa ane lenan.
7Orahinja ia apanga ia sayaga tur sawatek pasukane masih apanga tundena sayaga buat nuut prentahne.
8Sasubane maletan makudang-kudang taun, Ulun lakar nguduhang ia ngebug gumi ane rakyatne kamulihang uli pantaran makudang-kudang bangsane, tur ia suba pada nongos ditu saha tuara takut teken paperangan. Ia lakar ngebug pagunungan Israele, ane suba laad suung mangmung makelo pesan, nanging ane jani tongosina baan rakyate sajeroning kerta raharja.
9Ia muah wadua balannyane muah makudang-kudang bangsa ane marengin ia lakar magegebug buka angin ribute, laut nglikub gumine ento buka ambune.”
10Sapuniki sabdan Ida Sang Hyang Widi Wasa Sane Maha Luur ring Sang Prabu Gog: “Yen suba teka panemayannyane, ditu lakar metu pepineh kitane ane jaat.
11Kita lakar makeneh ngebug gumi ane tan padaya, ane rakyatne idup muponin kerta raharja, sajeroning kota-kota ane tusing matembok panyengker muah ane tusing ngelah benteng.
12Kita lakar ngrampas muah nyarahin rakyate ane nongos di kota-kota ane laad taen uug. Ia suba kapunduhang uli pantaran bangsa-bangsane, tur ane jani ia suba ngelah ubuh-ubuhan muah arta brana, buina ia nongos di pempatan gumine.
13Rakyat Seba muah Dedane muah sudagar ane uli kota-kota Spanyol lakar matakon teken kita, kene: ‘Apake jerone munduhang wadua balan jerone laut magegebug, buat lakar ngrampas muah majejarah? Apake jerone makeneh maan perak muah mas, ubuh-ubuhan muah arta brana laut magedi ngaba jejarahane ento?’”
14Duaning punika Ida Sang Hyang Widi Wasa Sane Maha Luur raris ngutus tiang buat ngrauhang sabdan Idane ring Sang Prabu Gog sapuniki: “Ane jani, sedekan kaulan Ulune Israel muponin idup saha kerta raharja, kita lakar pesu
15uli tongos kitane ane joh bedaja mimpin wadua bala ane kuat tur liu pesan, nah ento prajurit-prajurit ane uli makudang-kudang bangsa, tur makejang pada negakin jaran.
16Kita lakar ngebug kaulan Ulune Israel buka angin ribute nempuh gumine ento. Yen suba teka panemayannyane, Ulun lakar ngutus kita ngebug gumin Ulune, buat ngedengang teken bangsa-bangsane, nyen sasajaane Ulun ene muah buat ngedengang kasucian Ulune, masrane pakardin Ulune malantaran kita.
17Kita ene ane suba sabdayang Ulun imaluan, dugase Ulun mawarah-warah majalaran paraparekan Ulune, paranabin Israele, mungguing didinane ane lakar teka, Ulun lakar ngajak anak adiri buat ngebug gumi Israele.” Ida Sang Hyang Widi Wasa Sane Maha Luur sampun ngandika kadi asapunika.
Ukuma
18Ida Sang Hyang Widi Wasa Sane Maha Luur ngandika kadi asapuniki: “Dikalan Goge ngebug gumi Israel, Ulun lakar duka pesan.
19Sajeroning pidukan Ulune ane murub, Ulun ngwarahang mungguing didinane ento lakar ada linuh gede pesan di gumin Israele.
20Sakancan be muah kedise, sakancan burone gede cenik muah sakancan manusane di mrecapada lakar pada jejeh ngetor teken Ulun. Gunung-gununge lakar rubuh, abing-abinge lakar apih muah sakancan temboke lakar bah tur uug.
21Ulun lakar nengkejutang Gog aji bencana ane mlegendah. Ulun Sang Hyang Widi Wasa Sang Maha Luur ane suba masabda buka keto. Wadua balannyane lakar pada mabalik saling sempal aji pedang nglawan timpalne.
22Ulun lakar nyisipang ia aji grubug muah aji saling kecorang getih. Ulun lakar nyriokang ujan bales pesan muah ujan es, api muah welirang teken ia muah teken wadua balannyane makamuah teken makudang-kudang bangsane ane maruang teken ia.
23Keto caran Ulune lakar ngedengang teken sakancan bangsane, mungguing Ulun ene maraga luih muah suci. Ditu ia lakar pada nawang, mungguing Ulun ene maraga luih muah suci, tur ia pada lakar nawang, mungguing Ulun ene Sang Hyang Widi Wasa.”