Dual PanelWAHYU
1Duk punika nuju tanggal dasa, ring taun sane anyar, inggih punika taun sane kaping slae sasampune tiang kaselong miwah ring taun sane kaping patbelas, sasampun kota Yerusaleme kakaonang. Duk rahinane punika tiang ngrasayang kawisesan teja wedanan Ida Sang Hyang Widi Wasa, tur Ida ngajak tiang makaon.
2Sajeroning ngrasayang wahyu, Ida Sang Hyang Widi Wasa ngajak tiang ka tanah Israel tur irika tiang kagenahang ring gununge sane tegeh. Ring arepan tiange wenten panggihin tiang umah-umah akeh mapunduh sane pakantenanipun sakadi kota.
3Ida ngajak tiang nganampekin kotane punika, tur irika panggihin tiang wenten anak lanang adiri sane masinar dumilah sakadi temagane. Anake punika makta tali sepat miwah taru sikut tur ngadeg ring sinalih tunggil kuri pamedale.
4Anake punika raris mabaos ring tiang sapuniki: “Ih manusa, iwasinja. Melahang madingehang tur tlektekang apang melah sakancan ane edengang manira teken kita. Sawireh ento ane dadi awanane kita kajak mai, kita patut ngorahang teken bangsa Israele, saluiring ane tepukin kita.”
Kuri
5Sane panggihin tiang, inggih punika Perhyangan Agunge miwah tembok panyengker sane ngiter Perhyangane punika. Anake punika raris ngambil taru sikutnyane, sane tigang meter panjangnyane, raris nyikut temboke punika. Temboke punika tigang meter tegehipun miwah tigang meter tebelipune.
6Sasampune punika anake punika raris ngungsi kuri pamedale sane marep kangin. Dane munggah ring undage tumuli nyikut pamedale. Pamedale punika tigang meter lantangnyane.
7Ring jabaan kuri punika wenten margi sane ring kiwa tengennyane madaging kamar pajagaan tetiga. Asing-asing kamare punika mrepat, tigang meter panjang miwah linggahipun, tur tembok panyelengnyane kalih tengah meter tebelnyane. Ring jabaan kamar pajagaane punika wenten margi tigang meter panjangipun, sane ngungsi ka kamar sane marep ka Perhyangan Agunge.
8Anake punika raris nyikut kamare punika, kakeniang petang meter panjangnyane. Tanggun kamare punika makadados tanggun margi pamedale sane pinih nampek ring Perhyangan Agunge, tur tanggun temboknyane punika ameter tebelipun.
9(40:8)
10(Kamar pajagaane sane ring kiwa tengen margine punika sami pateh sikutipune, sapunika taler tembok panyelengnyane sami pateh tebelipune.)
11Sasampune punika, anake punika raris nyikut linggah margine ring gapurane punika. Linggahnyane ring jero wenten nem meter tengah tur ring jabaan gapurane linggahipun limang meter.
12Ring arepan asing-asing kamar pajagaane punika wenten tembok andap, sane tegehipun seket sentimeter miwah tebelipun taler seket sentimeter. (Kamar-kamare punika linggahipun tigang meter mrepat.)
13Sasampune punika anake punika raris nyikut dohipun ngawit saking durin tembok kamare sane asiki rauh ring durin tembok kamare sane asikian, nglintang ring margine punika tur kakeniang dohipun wenten roras meter atengah.
14Kamar sane paling sitanggu punika pamedalnyane marep ka natare. Kamare punika raris kukur wenten dasa meter linggahipun.
15Gebogan panjang margin pamedale makasami, ngawit saking temboke sane ring jabaan gapurane rauh ring tanggun kamar sane sitanggu, wenten slae meter.
16Ring bagian jabaan tembok sakancan kamare punika wenten jendela, kadi asapunika taler ring tembok-tembok panyelenge punika. Ring tembok bagian tengah sane marep ka margine punika mukir antuk gambar wit korma.
Natar
17Anake punika raris ngajak tiang nglintang ring pamedale ngungsi natare ring jaba. Irika wenten kamar tigang dasa akehipun sane marep ka tembok sane ring jaba, tur ring arepannyane wenten palemahan sane matukub antuk batu.
18Kamar-kamare punika sami kawangun ngilehin natare punika. Natare sane ring jaba puniki endepan ring natare sane wenten ring jeroan.
19Ring genahe sane tegehan, wenten gapura sane ngungsi ka natare sane ring jeroan. Anake punika nyikut doh kuri sane makakalih punika, kakeniang wenten seket meter.
Kuri
20Sasampune punika anake lanang punika tumuli nyikut kurine sane sisi kaler sane ngungsi ka natare sane ring jaba.
21Kamar pajagaane tetiga sane wenten ring sabilang sisin margine, tembok-tembok panyelengnyane miwah kamar sane ageng makasami asah sikutipune ring sane wenten ring kuri sane bedangin. Panjang pamedale punika wenten slae meter miwah linggahipune wenten roras atengah meter.
22Kamar sane ageng, jendela-jendela miwah ukir-ukiran wit kormane sami pateh sakadi sane wenten ring kurine bedangin. Irika wenten undag pepitu sane nuju kurine punika, tur tanggun kamare sane ageng marep ka natare.
23Ring arepan kurine punika selat natare punika, bedelod wenten kuri sane ngungsi ka natare sane ring jeroan, sane pateh sakadi kurine sane sisi kangin. Anake punika tumuli nyikut doh kurine sane ring sisi kaler klawan sane bedelod punika, kakeniang seket meter dohipun.
Kuri
24Wusan punika, anake punika tumuli ngajak tiang ka sisi bedelod, tur irika tiang manggihin kuri sane lianan. Dane nyikut kurine punika, tur sikutnyane pateh ring kuri-kurine sane lianan.
25Ring kamar-kamar kurine punika taler wenten jendela-jendela sakadi ring kamare sane lianan. Panjang pamedalnyane wenten slae meter tur linggahnyane wenten roras atengah meter.
26Wenten undag pepitu sane nuju ka kurine punika miwah kamar agengnyane taler magenah ring tanggun pamedale punika, saha marep ka natare. Tembok-tembok sane ring tengahne, sane marep ka margine makasami madaging ukir-ukiran wit korma.
27Iriki, taler wenten kuri sane ngungsi ka natare sane ring jeroan. Anake punika nyikut doh kurine punika klawan kurine sane ngungsi ka natare ring jeroan punika, wenten seket meter dohipun.
Natar
28Anake punika ngajak tiang nglintang ring kurine sane bedelod raris ngranjing ka natare sane ring jeroan. Dane nyikut pamedale punika tur sikutnyane sakadi pamedale sane wenten ring temboke sane ring jaba.
29Kamar-kamar pajagaannyane, kamar agengnyane, tembok-temboknyane sane ring tengahan, makasami pateh rupa miwah sikutnyane ring sane wenten ring kuri-kurine sane lianan. Kamar-kamar kurine punika taler pateh madaging jendela. Panjangnyane wenten slae meter, tur linggahnyane wenten roras atengah meter.
30(40:29)
31Kamar agengnyane marep ring natare sane lianan miwah temboknyane sane nuluh margine punika madaging ukir-ukiran wit korma. Samaliha wenten undag akutus ngungsi kurine punika.
Natar
32Anake punika ngajak tiang nglintang ring kurine bedangin raris ngranjing ka natare sane ring jeroan. Dane nyikut kurine punika, tur sikutnyane pateh ring sikut kurine sane lianan.
33Sikut kamar-kamar pajagaannyane, kamar agengnyane miwah tembok-temboknyane sane ring tengahan, pateh sakadi sane wenten ring kurine sane lianan. Samaliha madaging jendela sapunika taler kamarnyane sane ageng. Panjang margin pamedale makasami wenten slae meter, tur linggahipun wenten roras atengah meter.
34Kamarnyane sane ageng punika marep ka natare sane ring jaba. Tembok-temboke sane nuluh margine punika sami mukir antuk wit korma. Samaliha wenten undag akutus sane ngungsi kurine punika.
Natar
35Sasampune punika, anake punika raris ngajak tiang ka pamedal kurine sane baler. Dane nyikut pamedale punika, tur sikutnyane pateh ring pamedale sane lianan.
36Pateh sakadi tembok pamedale sane lianan, tembok pamedale punika taler madaging kamar-kamar pajagaan, temboke ring tengah sane mukir, kamar ageng miwah jendela milehan. Panjangnyane wenten slae meter miwah linggahnyane roras tengah meter.
37Kamarnyane sane ageng punika marep ka natare sane ring jaba. Temboke sane nuluh margine punika mukir antuk wit korma. Samaliha wenten undag akutus sane ngungsi ka kurine punika.
Wewan
38Ring natare sane ring jaba wenten amben sane katepang ring kurine sane ring jeroan, ring sisi balernyane. Ambene punika mabukak marep ka kamare ageng sane marep ka natare, tur irika anake pada ngumbah wewalungan sane pacang kangge aturan maborbor.
39Ring kamare ageng punika wenten meja patpat sane magenah kekalih-kekalih ring bilang sisin kamare punika. Ring mejane punika anake pada nampah wewalungan sane pacang kanggen aturan, yadian aturan maborbor, yadian aturan panebus dosa, wiadin aturan panaur pasilih.
40Ring jabaan kamare ageng punika taler wenten meja patpat sane pateh sakadi punika, magenah kekalih-kekalih ring bilang samping margine ngranjing ring kurine sane baler.
41Makasami wenten meja kutus akehipun, buat genah anake nampah wewalungan sane jaga kanggen aturan, inggih punika patpat ring kamare ageng miwah patpat ring jaba ring natare.
42Mejane patpat sane ring ambene punika, sane kanggen nyawisang aturane sane jaga maborbor malakar antuk batu tebihan. Tegehnyane wenten seket sentimeter miwah lumbang daunnyane wenten tigang benang sentimeter mrepat. Sakancan prabote sane kanggen nampah wewalungan aturane punika kagenahang ring meja-mejane punika.
43Ring tepin mejane punika makaileh kadagingin tepi sane lumbangipun pitu atengah sentimeter. Sakancan ulame sane jaga kanggen aturan makasami kagenahang ring mejane punika.
44Sasampune punika, dane raris ngajak tiang ngranjing ka natare sane ring jeroan. Irika wenten kamar mabukak kekalih sane asiki marep kelod ring sisin pamedale sane baler miwah sane lianan marep kaler ring sisin pamedale sane bedelod.
45Anake punika maosang ring tiang, mungguing kamare sane marep kelod punika pabuat parapanditane sane ngayah ring Perhyangan Agunge,
46tur kamar sane marep kaler punika pabuat parapanditane sane ngayah ring genah pamorboran aturane. Sakancan panditane, makasami katurunan Dane Sadok. Wantah dane kewanten saking katurunan suku Lewi sane kalugra tangkil ring ayun Ida Sang Hyang Widi Wasa, buat ngaturang ayah ring Ida.
Natar
47Anake punika raris nyikut natare sane ring jeroan, linggahnyane wenten seket meter mrepat. Perhyangan Agunge magenah ring sisi kauh tur ring arepan Perhyangane wenten genah pamorboran aturan.
48Sasampune punika, dane raris ngajak tiang ngranjing ka rongan Perhyangan Agunge. Dane raris nyikut margine ngranjing punika dohnyane wenten kalih atengah meter miwah linggahnyane wenten pitung meter, tur madaging tembok sabilang samping, sane tebelnyane ameter tengah.
49Wenten undag-undag sane ngungsi ka rongane punika. Linggah rongane punika wenten dasa meter tur dohnyane wenten nem meter. Irika wenten pilar kekalih ring bilang samping rongane punika.