Dual PanelIndik
1Anake punika tumuli nandan tiang, kakurine sane ring jaba sane magenah ring sisi kangin pakarangan Perhyangan Agunge. Kurine punika muneban,
2tur Ida Sang Hyang Widi Wasa ngandika ring tiang, sapuniki: “Kurine ene lakar tetep enu mubetan tur tusing lakar taen kampakang. Tusing ada manusa ane kalugra macelep di kurine ene, sawireh Ulun Sang Hyang Widi Wasa, Widin Israele, ane suba mentas di kurine ene. Ento awanane kurine ene tetep enu mubetan.
3Tuah sang prabu ane sedekan enu madeg ratu ane dadi kema, buat ngajengang ajengan ane suci di ayun Ulune. Ia patut macelep muah pesu di kurine ngliwatin balene gede ane di tengah.”
Pidab
4Sasampune punika, anake punika tumuli ngajak tiang ka arepan Perhyangan Agunge nglintang ring kurine sane baler. Riwau tiang matolihan, panggihin tiang Perhyangan Agung Ida Sang Hyang Widi Wasa punika kalikub antuk galang dumilah teja wedanan Idane. Irika tiang bah makakeb ring tanahe,
5tur Ida Sang Hyang Widi Wasa tumuli ngandika ring tiang, sapuniki: “Ih manusa, melahang nlektekang sakancan paundukan ane tepukin muah dingeh kita. Ulun lakar ngorahin kita unduk pidabdab muah sopacaran Perhyangan Agunge. Melahang pesan ngingetang, nyen ane kalugra pesu mulih di Perhyangan Agung muah nyen ane tusing kalugra.
6Orahang teken wong Israele ane brontak ento, mungguing Ulun, Ida Sang Hyang Widi Wasa Sang Maha Luur, tusing enu buin kangen teken paundukan-paundukan ane cemer ane suba laksanaanga ento.
7Ia suba ngletehin Perhyangan Agung Ulune, malantaran ia suba maang wong dura negara ane tusing masunat, anak ane tusing astiti bakti teken Ulun, macelep ka Perhyangan Agunge dikalane muluk muah getih aturane katurang di ayun Ulune. Sawireh keto kaulan Ulune suba ngusakang prajanjian Ulune, malantaran sakancan laksanannyane ane cemer.
8Ia suba pada tusing ngamanggehang upacara-upacara ane suci di Perhyangan Agung Ulune, nanging tungkalikane ia suba nunden anak dura negara nyalanang unduke ento.
9Ulun Sang Hyang Widi Wasa Sang Maha Luur, ngumumang mungguing tusing ada wong sunantara ane tusing masunat, tusing ada anak ane tusing astiti bakti teken Ulun ane dadi macelep ka Perhyangan Agung Ulune, yadiastu ia wong sunantara ane nongos di pantaran wong Israele.”
Wong
10Ida Sang Hyang Widi Wasa ngandika ring tiang, sapuniki: “Ulun lakar nyisipang wong Lewine, ane bareng-bareng ngajak wong Israele ane lenan pada nilas Ulun tur nyungsung arca-arca.
11Ia dadi ngayahin Ulun ka Perhyangan Agung, buat nyaga kuri muah nabdabang gegaene di Perhyangan Agung. Ia dadi nampah wewalungan ane anggona aturan maborbor muah aturan matampah baan rakyate tur ia patut ngayahin rakyate.
12Nanging, sawireh ia suba nyalanang pangastiti teken arca-arcane ento pabuat wong Israele, tur majalaran unduke ento ia nuntun rakyate ngae dosa, dadinne Ulun Sang Hyang Widi Wasa Sang Maha Luur suba masumpah mungguing ia patut kasisipang.
13Ia tusing wenang dadi pandita buat ngayahin Ulun wiadin maekin barang-barang ane suciang Ulun, wiadin macelep ka Tongose Ane Maha Suci. Keto pasisip pabuat laksana-laksanannyane ane cemer ento.
14Ulun netepang ia buat ngarap gegaen ane kasar ane patut kalaksanayang di Perhyangan Agunge.”
Parap
15Ida Sang Hyang Widi Wasa Sane Maha Luur ngandika sapuniki: “Tuah parapandita suku Lewi ane uli katurunan Sadoke dogen ane nerusang saking satia tuu ngayahin Ulun di Perhyangan Agung dugas wong Israele ane lenan pada matinggal uli sig Ulune. Sawireh keto ane jani tuah ia dogen ane patut ngayahin Ulun muah tangkil di ayun Ulune buat ngaturang muluk muah getih aturane.
16Tuah ia dogen ane lakar macelep ka Perhyangan Agung Ulune buat ngayahin di pamorboran aturan Ulune muah nyalanang pangubaktine di Perhyangan Agunge.
17Dikalan ia macelep ka kurine ngungsi natar Perhyangan Agung ane di tengahan, ia patut nganggo panganggo ane malakar aji kain lenen. Dikalan iane nyalanang darma kapanditan di natar Perhyangan Agunge ane di jeroan, ia tusing dadi nganggo panganggo ane malakar aji wol.
18Apanga ia tusing pesu peluh, ia patut nganggo sorban kain lenen muah jaler kain lenen, nangingke tusing masabuk.
19Satonden iane pesu ka natare ane dijaba sig tongos rakyate, ia patut nglukar panganggonne ane anggona nyalanang darma kapanditan di Perhyangan Agunge, laut ngejang panganggone ento di kamar-kamare ane suci. Ia patut nyaluk panganggo ane lenan, apanga panganggonnyane ane suci ento tusing kanti ngusakang rakyate.
20Parapanditane tusing dadi magundul wiadin mabok lantang. Ia patut nyukur bokne amun patutne.
21Satonden macelep ka natare ane di tengah, parapanditane tusing pesan dadi nginum anggur.
22Parapanditane tusing pesan dadi nyuang anak luh sapihan, ia tuah dadi nganten ngajak anak bajang Israel wiadin nyuang baluan panditane ane lenan.
23Parapanditane patut ngurukang kaulan Ulune binan paundukan ane suci muah ane tan suci, unduk ane suci manut sopacaraning agama muah ane leteh.
24Yening ada wetu prakara, parapanditane patut nibakang tetepasan manut pidabdab-pidabdab Ulune. Ia patut ngamanggehang rerainane manut pidabdab muah sopacaran Ulune, tur patut ngamanggehang muah nyuciang dina Sabate.
25Parapanditane tan wenang ngletehin deweknyane, malantaran ia maekin anak mati, sajabaning sawan salah tunggal wong tuannyane, pianaknyane, nyamannyane muani wiadin nyamanne eluh ane enu daa.
26Sasubane ia buin suci, ia patut ngantiang pitung dina makelonne.
27Sasubane keto mara ia dadi buin macelep ka natar Perhyangan Agunge ane di tengah laut ngaturang aturan buat nyuciang dewekne apanga ia dadi buin ngayah di Perhyangan Agung. Ulun Sang Hyang Widi Wasa Sang Maha Luur ane suba ngandika ene.
28Parapanditane ento tusing maan duman cecatu. Ulun ene ane dadi cecatunnyane. Ia tusing patut maan duman cecatu di Israel. Ulun ene ane dadi cecatu pagelahannyane.
29Sakancan aturan gandum, aturan panyupat dosa muah aturan panaur danda ento dadi pangupa jiwan parapanditane. Buina ia patut nampi sawatek ane kasuciang pabuat Ulun di Israel.
30Parapanditane patut nampi sakancan pamupon ane simalu ane paling melaha muah ane len-lenan ane katurang di ayun Ulune. Sabilang rakyate ngae roti ane lebeng simalu patut aturanga teken panditane makadadi aturan, tur mertan Ulune lakar nedunin pumahan anake ento.
31Parapanditane tan wenang naar kedis wiadin buron ane mati iba-ibana wiadin ane sarap buron lenan.”