Dual PanelNabi
1Ida Sang Hyang Widi Wasa masabda sapuniki: “Ih manusa, kemaja nyemak pedang ane mangan, laut cukurja jenggot muah bok kitane makejang aji pedange ento. Sasubane keto laut timbang bok kitane ento aji dacin dadiang telung tanding.
2Sasubane kotane suud kakurung, tunjelja bok kitane ento apahteluan di kota. Dikalane kita majalan pesu ka jabaan kotane tektekja bok kitane buin apahteluan. Ane buin apahteluan, sambehang sig angine, tur Ulun lakar ngepung boke ento aji pedang Ulune.
3Jemak bok kitane ento abedik, laut kaput di keliman jubah kitane.
4Sasubane keto, laut buin pesuang buin abedik, tumuli entungang sig apine, tur depang ia puun. Uli ditu apine lakar sambeh nilap bangsa Israele.”
5Ida Sang Hyang Widi Wasa Sane Maha Luur ngandika sapuniki: “Iwasinja kota Yerusaleme! Ulun ngejang ia di basan tengah gumine, tur panegara ane len-lenan pada ngiter ia.
6Nanging kota Yerusaleme ento brontak nglawan sapatitah Ulune muah ngedengang ibanne mungguing ia jaatan teken bangsa-bangsane ane lenan, tur sangetan ia nglawan bandingang teken panegara-panegarane ane ngiter ia. Kota Yerusaleme tungkas teken sapatitah Ulune muah tusing nyak ngamanggehang pidabdab Ulune.
7Ane jani padingehangja ih Yerusalem, sakancan ane sabdayang Ulun, Sang Hyang Widi Wasa Sang Maha Luur. Sawireh iba tusing nyalanang pidabdab-pidabdab Ulune muah tusing ngamanggehang sapatitah Ulune, iba suba ngedenang kakewehan ibane, bandingang teken bangsa-bangsane ane di kiwa tengen ibane. Iba suba nuutang adat-istiadat bangsa-bangsane ane lenan.
8Sawireh keto Ulun Sang Hyang Widi Wasa Sang Maha Luur, jani masabda teken iba mungguing Ulun dadi musuh ibane. Ulun lakar nibakang tetepasan teken iba, apang tepukina teken sakancan bangsane.
9Malantaran sakancan laksanan ibane ane getingin Ulun, Ulun lakar ngukum Yerusalem, aji ukuman ane tonden taen tibakang Ulun, muah tusing taen buin lakar tibakang Ulun ukuman ane buka keto.
10Pamragatne, parawong tua di Yerusalem lakar pada ngamah pianakne, muah pianak-pianakne lakar pada ngamah wong tuannyane. Sisanne ane enu idup, lakar sambehang Ulun milehan.”
11Ida Sang Hyang Widi Wasa Sane Maha Luur, ngandika sapuniki: “Sawireh Ulun ene Sang Hyang Widi Wasa ane nyeneng, tur iba suba ngletehin Perhyangan Agung Ulune aji sakancan laksana ane corah muah cemer, Ulun lakar tusing kangen buat nguugang iba.
12Rakyat ibane apahteluan lakar mati di kota ulihan nandang sakit muah sayah. Ane buin apahteluan lakar kasempal aji pedang di jabaan kotane. Sisanne ane buin apahteluan lakar sambehang Ulun sig angine, tur lakar uber Ulun aji pedang.
13Iba lakar ngrasayang bebendun Ulune, kanti pakayunan Ulune rumasa purna. Yen suba sakancan paundukane ento kasidan, ditu iba lakar nawang, mungguing Ulun Sang Hyang Widi Wasa ane suba masabda teken iba, sawireh Ulun sakit ati teken kalinyokan ibane.
14Asing-asing anak uli di pantaran bangsa-bangsane ane di kiwa tengen ibane, ane ngliwat dini, lakar ngedesemin iba tur ngejohang deweknyane.
15Yening Ulun duka muah bendu teken iba tur nyisipang iba, sakancan bangsa-bangsane ane ngiter iba lakar pada karesresan. Ia lakar pada seneb ngiwasin iba tur ia ngewerin iba.
16Ulun lakar ngaenang apanga iba kapegatan bekel tur nepang iba nandang seduk. Iba lakar naanang basang layah, satmaka buka panahe ane lanying ane katiwakang buat nyirnayang iba.
17Ulun lakar nekaang sayah muah sato galak buat ngamatiang pianak-pianak ibane. Buina Ulun lakar nekaang grubug, kawirosan muah perang lakar ngamatiang iba. Ulun Ida Sang Hyang Widi Wasa ane suba masabda buka keto.”