Dual PanelWAHYU
1Nuju tanggal lima, sasih sane kaping nem, sasampun nem taun suenipun tiang maselong, parapamimpin wong Yehudane sane ring paselongan pada malinggih sareng-sareng tiang ring umah tiange. Tan dumade, kawisesan Ida Sang Hyang Widi Wasa Sane Maha Luur raris ngencegin tiang.
2Tiang tumuli tumenga tur manggihin wahyu sane marupa sakadi manusa sane ngendih murub. Saking wangkong nganedunang ragannyane kanten sakadi geni, tur saking wangkong ngamunggahang ragannyane masinar sakadi prunggu sane makilap.
3Anake punika ngenjuhang sane marupa sakadi tangan, tumuli nyambak bok tiange. Sasampune punika, sajeroning wahyune punika, Roh Ida Sang Hyang Widi Wasa tumuli ngangkat tiang tegeh pisan ring ambarane, raris kabakta ka Yerusalem. Ida makta tiang ka natar sane ring jero, ring gapuran Perhyangan Agunge sane sisi kaler. Irika wenten arca sane ngawinang Ida Sang Hyang Widi Wasa duka.
4Irika tiang ngeton galang dumilah, sane nyinahang teja wedanan Widin Israele, pateh sakadi sane sampun panggihin tiang daweg ring sisin Tukad Kebare.
5Ida Sang Hyang Widi Wasa masabda ring tiang, sapuniki: “Ih manusa iwasinja marep kaja.” Tiang raris marep kaler, tur irika nampek ring genah pamorboran aturane sane ring genahe ngranjing ka gapurane, wenten panggihin tiang arca sane ngawinang Ida Sang Hyang Widi Wasa duka pisan.
6Ida Sang Hyang Widi Wasa ngandika ring tiang, sapuniki: “Ih manusa, apake kita nepukin unduke ane ditu? Iwasinja unduk ane cemer ane laksanayanga baan wong Israele dini, nah keto ia ngentungang Ulun sayan ngejohang uli sig tongos Ulune ane suci. Kita lakar nepukin paundukan ane cemeran buin teken unduke ene.”
7Ida makta tiang ka genah ngranjing ka natare sane ring jabaan, tumuli Ida matujuhang ring tiang bolong sane wenten ring temboke.
8Ida ngandika sapuniki: “Ih manusa, palinggahinja bolong temboke ento.” Tiang tumuli malinggahin, tur irika palinggahin tiang wenten jelanan.
9Ida ngandika ring tiang sapuniki: “Kemaja macelep, laut iwasinja unduk ane corah muah cemer ane laksanayanga ditu.”
10Irika tiang raris ngranjing tur nlektekang. Temboke punika kabekin antuk gambar-gambar ula miwah sato-sato sane cemer lianan miwah barang-barang sane lianan sane kasungsung antuk wong Israele.
11Parapamimpin wong Israele sareng pitung dasa wenten irika, minakadinipun Dane Yaasanya okan Dane Sapan. Dane suang-suang pada ngagem pasepan menyan, tur andus menyannyane sami malepuk.
12Ida Sang Hyang Widi Wasa raris mataken ring tiang, sapuniki: “Ih manusa, apake tepukin kita unduk ane gaena baan pamimpin wong Israele di tongos ane pingit ene? Ia pada mabakti di kamare ane bek misi gambar. Ia pada mapineh kene: ‘Ida Sang Hyang Widi Wasa tusing nyingak iraga. Ida suba nilar gumine ene.’”
13Sasampune punika Ida Sang Hyang Widi Wasa ngandika ring tiang sapuniki: “Kita lakar nepukin ia nglaksanayang paundukan ane cemeran teken ento.”
14Sasampune punika Ida raris makta tiang ka gapuran Perhyangan Agunge sane baler, tur Ida ngedengang ring tiang, wenten anak luh-luh sane mangelingin Dewa Tamus sane padem.
15Ida mataken sapuniki: “Ih manusa, apake kita nepukin unduke ento? Kita lakar nepukin unduk ane cemeran teken totonan.”
16Sasampune punika Ida raris makta tiang ka natar Perhyangan Agunge sane ring jero. Irika nampek ring margine sane jaga ngranjing ka genahe sane suci, ring selagan pamorboran aturane kalawan margine buat ngranjing, wenten anak muani-muani sawatara sareng slae diri. Ipun pada ngurinin genahe sane suci, sarwi sumungkem marep kangin, nyumbah surya sane wau endag.
17Ida Sang Hyang Widi Wasa raris ngandika ring tiang, sapuniki: “Ih manusa apake kita nepukin unduke ento? Wong Yehudane ene tonden lega, yen tuah nglaksanayang sakancan unduke ane cemer, ane suba tepukin kita dini muah ngambekang kawirosan milehan di sakuub gumine. Nanging ia pasti mai ka Perhyangan Agung nglaksanayang unduke ento, tur ngawanang Ulun sayan nyangetang duka. Iwasinja, kenken ia nganistayang Ulun, sajeroning ia ngawanang sakit kayun Ulune.
18Ia lakar pada ngrasayang kawisesan pidukan Ulune. Ulun tusing ngenuang muah madalem ia. Ia lakar pada gelur-gelur sasida-sidayan ngastawa teken Ulun. Nanging Ulun tusing lakar madingehang pangastawannyane.”