Dual PanelKota
1Sasampune punika tiang miragi Ida Sang Hyang Widi Wasa ngandika saha jangih sapuniki: “Ih watek ane lakar ngukum kotane ento, maija! Abaja sanjatan kitane.”
2Tan pararapan jeg raris wenten anak sareng nemnem rauh saking gapuran Perhyangan Agunge sane ring jaba kaler, tur suang-suang pada ngagem sanjata. Anake sareng nemnem punika kasarengin antuk anak lanang adiri sane mapangangge kain lenen saha makta prabot kanggen nulis. Anake punika sareng sami pada rauh tur ngadeg ring sisin genah pamorboran aturane sane malakar prunggu.
3Sasampune punika galang dumilah teja wedanan Widin Israele, raris munggah saking satone sane makampid sane ipidan punika, tumuli ngranjing ka Perhyangan Agung. Ida Sang Hyang Widi Wasa ngandikain anake sane mapangangge kain lenen punika, sapuniki:
4“Kemaja majalan milehan di kota Yerusalem. Pingetinja gidat sakancan anake ane nandang sedih muah keweh, majalaran sakancan paundukan ane cemer ane kalaksanayang di kotane ento.”
5Irika tiang raris miragi Ida Sang Hyang Widi Wasa ngandika ring anake sane lianan, sapuniki: “Tututinja ia milehan, tur matiangja. Eda pesan ada ane enuanga muah padalema.
6Matiangja anake ane tua, bajang, luh muah muani, meme muah pianak-pianakne. Nanging eda pesan plegendahanga sakancan anake ane misi pinget di gidatne. Kawitinja uli Perhyangan Agung Ulune.” Irika raris anake punika ngawitin ngamademang ngawitin saking parapamimpin sane wenten ring Perhyangan Agunge irika.
7Ida Sang Hyang Widi Wasa ngandika ring anake punika sapuniki: “Letehinja Perhyangan Agunge. Bekinja natare aji bangke. Jalanangja buka keto.” Irika ipun raris ngawitin ngamademang jadmane sane wenten ring kota.
8Risedek amati-mati punika kalaksanayang, tiang kantun padewekan kewanten irika. Tiang ngentungang dewek saha makakeb ring tanahe sarwi jerit-jerit sapuniki: “Duh Ratu Sang Hyang Widi Wasa Sane Maha Luur, punapike Palungguh IRatu kalintang duka ring kota Yerusaleme, kantos Palungguh IRatu jaga ngamademang sakancan wong Israele sane kantun irika?”
9Ida Sang Hyang Widi Wasa masaur sapuniki: “Wong Israel muah wong Yehudane suba ngae dosa ane berat pesan. Ia ajaka makejang sruron teken unduk amati-mati di sakuub gumine ene, tur suba ngebekin kota Yerusaleme aji kajaatan. Ia suba ngorahang mungguing Ulun, Sang Hyang Widi Wasa suba nilar guminnyane, muah tusing macingak teken ia.
10Nanging Ulun lakar tusing madalem ia. Ulun lakar nibakang teken ia, paundukan ane patuh buka ane laksanayanga marep teken anak lenan.”
11Sasampune punika anake sane mapangangge kain lenen punika, raris mawali saha nguningayang ring Ida Sang Hyang Widi Wasa, sapuniki: “Titiang sampun nglaksanayang sapatitah druene.”