Alkitab Mobile SABDA
[VER] : [BAUZI]     [PL]  [PB] 
 <<  1 Korintus 14 >> 

1Iho dam bake deeli meedam bohu vuusdam bak lam bisi iho modi tombalehe im am bak. Labihàmu im vàmtea lam uho a voomule. Abo mahate keàtedi meedam bohu vuusdale. Lahana gi im lada lamota a modemule. Uho laha Ala bake, “Am Aha Nutabe Neàna labe iba nehi modi vizi teudi im Abada meedase. Iba nehi modi vizi teudi im Abada meedase,” laham bak laba mahate labihasu Ala bake tom gagodale. Labi uho labihasu tom gagodam di lam bisi uho Ala bake tom gagu modi vizemda gi im nidi nim am tame. “Alat aha Abadat vameadaha im lam iba modi ozobohudi fi gatei fa dam bake ahate vameaidase,” laham bak lam uho bisi Ala bake tom gagu uba vizemda neàda vàmtea am bak.

2Eho gi neham bak ozome uba labi gagoho bak. Meit Alam Aha Nutabe Neàna labe aba modi vizi teudi aho naedat it aim biem dae vameadam di lam ba dam bake im vameadam vabak. Gi Ala bake vameadam bak. Neham bak. Meit ba ame dae lam aim di ba vi ozobohudem vabak. Alam Aha Nutabe Neàna labe ame da laba modi vizehe labe Am gi Alat Ahamo modi vastehe im am aha labe futodam bak. Labiha labe meit ame dae lam aim di ba vi ozome ozobohudem vabak.

3Lahana meit Alam Aha Nutabe Neàna labe aba modi vizi teudi im Alat aha Abada labe gagohoda lam aho aime ozobohudi fi gatei fa dam bake ahate vameaidamda labe im aba aho gagohoda lam gi dam daeti uloho labe damat aidam bak. Labi damat ame im lam aidume vi ozoha, “Im lam fa im ahu vei neàdedume teudedamna mode? Iba vabededamna mode? Im ahu amu dehabaedam bak lam modi fa seti im ahu asimdedume neàdedamna mode?” lahame ozobohudemna am bak.

4Meit Alam Aha Nutabe Neàna labe aba modi vizi teudi aho naedat it aim biem dae vameadam di lam gi ahamo aba it vabededume neàdem bak meeda. Lahana dat meida Alam Aha Nutabe Neàna labe aba modi vizi teudi im Alat Aba Aho gagohoda lam aho aime ozobohudi fi gatei fa dam bake ahate vameaidamda labe im aba aho gagohoda lam gi dam daeti uloho labe amti Kristus bake tu vuzehi vahi meedam dam totbaho laba vabededume modi neàdedam bak.

5Eho ozom, Alam Aha Nutabe Neàna labe uba modi vizedume teudi uho naedat it aim biem dae vameadamta neàte. Em ba malem vabak. Lahana Alam Aha Nutabe Neàna labe uba modi vizedume meedamna bisi eho uledi ozomda gi neham bak. Alat aha Abadat vameadaha im lam Alam Aha Nutabe Neàna labe uba modi vizedume uho aime ozobohudi fi gatei fa dam bake ahate vameaidam bak lam bisi eho uledi ozomda am bak. Neham labe labihaha bak. Dat labihamda lam amti Kristus bake tu vuzehi vahi meedam dam totbaho laba bisi modi vabededume neàdedamda am bak. Dat aho naedat it aim biem dae vameadamda lam ba aba aho lab meedaha bak labet modi amti vahehe dam totbaho laba vabededume neàdedam vabak. Lahana ame da labe aho naedat it aim biem dae lab vameadam di lam Alam Aha Nutabe Neàna labe aba neo modi vizi teudi ahamo it ozobohudi fa am dam totbaho laba ahate vameadume dam lam vabededume neàdedameam làhà am fa gi dat amuda lamti uloho bak.

6Emti vahi Kristus bake tu vuzehi meedam dam oa, uho ozom, Alam Aha Nutabe Neàna labe eba modi vizi teudi gi eho naedat it aim biem dae uba li vameadameam làhà eho uba vabededume um neàdedào? Vabà! Eho gi labihasu uba le vameadameam làhà um ba vabededume neàdedaha vabak. Eho uba li gi nehame meedamta um fa neàdedam bak. Alam Aha Nutabe Neàna labe eba modi vizi em ozobohudi fi gatei Alat dam bake vastehe im lam eba modi fi zeam bitoi eho fa uba li vameadam bak modeo, Alat aha Abadat vameadaha im lam eho aime fa uba li vameadam bak modeo, Alat eba neha, “Im nim ve dam bake vameadale,” lahame eba modi em ozobohudi fi gatei eho uba li vahokedam bak modeo, gi labihasu uba li meedamta uba vabededume um fa neàdedam bak am bak.

7Eho etei lab gagoho im lam eho nehi vouhodase. Dae modemna ahebu abo mabso feume ladeem dae meedamna ee gagom suling lahamna modeo, labi na etehàso modealahana damat vi voiame ladeem dae meedamna ee gagom kecapi lahamna modeo, ame na lam damat git vou sikimeam làhà, “Ana ladeem dae mode?” laham bak ba vi ozom vabiem bak. Lahana gi iademe vou sikim labet damat, “Ana ladeem dae mode?” lahame aime ozobohudem bak. Bak lamti meit Alam Aha Nutabe Neàna labe aba modi vizi teudi aho naedat it aim biem dae vameadam di damat aim biem bakti ulohote.

8Labi laha meit omaso visoi iademe omeem vabameam làhà ba dam bak iuba esuhuda ba akati aime fa vahe vaheme ozobohudi ot beluiam bak ahumdi vou faoe? Ba labiham vabiem bak.

9Uho laha meit naedat it aim biem dae faasi vameadameam làhà ba ame dae lam amat ba vi aime ozobohude. Ba labiham biem bak. Oma dae lam gi ostame bak iuba futoi le setem bak. Gi ame im lam iademe gagom labe damat aime vi ozobohudem bak.

10Uho neham bak vi ozodale. Im dam bak niba esuhuda debu ahebu dae tamehona ahaladi ahaladiaho. Lahana ame dae lam ba ozom biemnat modem vabak. Meit dae abada dam abadate vameadam di lam ba aim biem vabak. Abo gi ozobohudem tadem bak.

11Labiham labe meit li eba im vameadam di eho ame im lam aisome modemeam làhà dae lam gi dam mei dae modem labe em aim vabiem bak. Ame da lamti emti gi ot bahagikiahana ozomom labe labihaha bak.

12Um laha labihaha bak. Meit Alam Aha Nutabe Neàna labe aba modi vizi teudi aho naedat it aim biem dae uba faasi vameadameam làhà um ba laha aim vabiem bak. Labihàmu uho neha, “Alam Aha Nutabe Neàna labe iba nehi modi vizi teudi meedase,” lahame vizelo àhàkedameam làhà gi nehasu Ala bake gagoidale. “Alam Aha Nutabe Neàna labe Aho iba modi vizi teudi iho gi imti Kristus bake tu vuzehi vahi meedam dam totbaho laba modi neàdedamna lamota iba modi vizi teudedale,” lahame gagoidale.

13Eho etei lab gagoho bak lam gi neham bak ozome uba labi gagoho bak. Meit Alam Aha Nutabe Neàna labe aba modi vizi teudi aho naedat it aim biem dae faasi vameadam di ame da labe laha Ala bake nehame tom gagodale. “Ai Ala oa, Oho laha eba modi vizi teudi eho naedat it aim biem dae lab vameadaha bak lam Oho eba neo modi vizi ame dae lam em naedat ehemo it ozobohudi fa dam bake ahate iademe dam daeti ulohona fà vameadase,” laham bak lam laha Ala bake labihasu vi ozome tom gagodale.

14Eho gi neham bak vi ozome uba labi gagoho bak. Alam Aha Nutabe Neàna labe eba modi vizi teudi eho naedat it aim biem dae faasi Ala bake tom gagodam di lam em ahu ba vi tau ozobohudi ame im lam Ala bake vameadam vabak. Gi Alam Aha Nutabe Neàna labe Ahamo eba modi vizi teudi em ahat ahamo vameadam bak.

15Labihameam làhà em akati mode? Làhà eho gi fa dae behàsdese! Neha: Alam Aha Nutabe Neàna labe eba modi vizi teudi eho naedat it aim biem dae ahat ahamo faasi Ala bake tom gagodam bak lam meeda. Labi laha em naedati dam totbaho lamti iho aim neà bak laba vi ozome em ahulat vi tau ozobohudem dae lam Ala bake faasi tom gagodam bak laha meeda. Labi laha Alam Aha Nutabe Neàna labe eba modi vizi teudi eho naedat it aim biem dae ahat ahamo faasi ladeedam bak meeda. Labi laha em naedati dam totbaho lamti iho aim neà bak laba vi ozome em ahulat vi tau ozobohudem dae laha faasi ladeedam bak meeda. Em gi labihadalo modem bak.

16Eho gi neham bak ozome uba labi gagoho bak. Uho vahi Ala bake vou baedam di lam um dam meidavat Alam Aha Nutabe Neàna labe aba modi vizi teudi aho naedat it aim biem dae am ahat ahamo faasi, “Neàte,” lahame Ala bake vou baedam di lam dam laba tau nusualadaha dam lam ame im lam aime vi ozom biemda alimda lam ba ame lab vou baedam dae lam, “Lo. Imbote,” lahame vi tau vou baedam vabiem bak. Ame da labe aho lab vou baedam dae lam fa aim biem labe labihaha bak.

17Uho meidavat Ala bake lab vou baedam bak lam neàta neàt. Lahana uho lab meedam bak lam em mali uba labi vameadaha vabak. Lahana dat gi tau nusuhuda alimda labe uho lab vameadam dae lam vi aim biehe labe ba ame lab meedam bak labet aba modi vabiedume neàdem vabak. Eho gi labiham bak vi ozome uba labi gagoho bak.

18Eho ozoha, Alam Aha Nutabe Neàna labe meia modi vizi teudi naedat it aim biem dae faasi vameadam bak lam bisi modi ba vi vizi vi vizedamda em am bak. Labihadàmu eho gi Ala bake, “Am abo neàte,” lahame vou baedam bak. Lahana eho ozoha, um gi fota vizedume meedam bak.

19Labihadamnàme emti Kristus bake tu vuzehi vahi meedam dam totbahoti iho fa bakamta vazisi Ala bake vou baedam di lam ebe eho bisi vi ozome uledi meedam bak gi nehadam bak. Dam gi nusualadaha dam biem bak labna zohàme eho vi vahokedam bak laba vi ozome dae gi zohobuna abo damat aim bibada vameadam bak lam bisi ebe eho uledi meedam bak am bak. Em ba ame Alam Aha Nutabe Neàna labe eba modi vizi teudi eho naedat it aim biem dae bohulana abo damat aim biem dae abo dam bake vabiedume fa neàdem biem dae lam vameadam bak lam em ba bisi uledi meedam vabak.

20Emti vahi Kristus bake tu vuzehi meedam dam oa, data koe diat im ahulat vi ozome meedam bak lamti ulohona a vi meedamule. Uho vedi nehi ozo, “Alam Aha Nutabe Neàna labe uba modi vizi teudi uho naedat it aim biem dae faasi vameadam damat modem labe Alam im lam ahebu um ab modi ozobohudi neàdeham tame,” lahame labihasu ozome daetbadam labe um gi data koe diat im ahulat vi ozom bakti ulohona meedam bak. Um gi, “Datati ulohona meedase,” lahame àhàkemeam làhà gi data etei faahada im biehebuda abo, “Fai bak neame?” lahame vi ozom vabiemda lamti uloholi faina a meedamule. Gi fa dam busao ahulat iademe vi ozome meedam bakti ulohona meedale.

21Aham di iube Yahudi dam labe im tai ahamda labe iho Alat gagoho im mu voedahemu Alat ame dam laba neha, “Ba diamut Eho uledi uba fakemoholehe dam labe fa uba nehi beome itaholedam bak ehete,” lahame Alat ame dam laba vou faovoem dae gagu esuhu bak ehe bak. Alat lab ozoho bak lam dat ahamda Yesayat Alat Vameadaha Im Toedahana laba nehi toedume esuhu bak. “Làhà Em gi um Israel dam bake dam bahagikida uho aim biem dae vameadam dam lamohoda, ‘Im Ebeda vou vameatedale,’ lahame bak ubuda laba oudume omsu tame. Lahamnàme um ba im Ebeda aidam moudume meeda tame.”

22Lahame Yesayat labihasu toedume esuhemu eho nehi ozo. Alam Aha Nutabe Neàna labe meia modi vizi teudi naedat it aim biem dae faasi vameadam bak lam gi dam Kristus bake tu vuzehem vab dam laba modi iho ame bak lam aame ozo, “Oo, bak lam ana im feà meedamnat mode?” lahame labi fet aame àvodemnat modem bak. Ba dam Kristus bake tu vuzehehe dam laba modi iho fet aame àvodemnat modem vabak. Lahana Alat aha Abadat vameadaha im lam Alam Aha Nutabe Neàna labe meia modi ozobohudi fi gatei fa dam bake ahate vameaidam bak lam gi dam Kristus bake tu vuzehi vahi meedam dam labe iho aime ozo, “Làhà Alat iba aame ozahit deeli im neà bakta meedam Ala ame?” lahame labi fet aime vi ozobohudemnat modem bak. Ba dam Kristus bake tu vuzehem vab dam laba modi iho fet aame ozobohudemnat modem vabak.

23Eho etei lab gagoho bak lam um biem bake eho fa uba nehi vouhodalo mozo. Uho Kristus bake tu vuzehi vahi meedam dam labe uho Ala bake vou baedalo modemu bakamta vazisi meedume modeha Alam Aha Nutabe Neàna labe uba modi vizedume um ahebu naedat it aim biem dae lam ab faasi vameadamam. Labi ame di lam Kristus bake tu vuzehi im Abada meedaha vab dam modeo, dam ame im lam vi ozome ozobohudem biem dam labe modeo, ame dam labe uho lab meedam bak laba vi oli aameam làhà gi àvodi neha, “Um baka ana im meedam damat mode? Um gi ahusobuli ostame meedam dam taia?” lahame uba labi gagom bak.

24Lahana labiham vabameam uho bakamta vazisi meedume modeha Alat aha Abadat vameadaha im lam Alam Aha Nutabe Neàna labe uba modi vizedume uho aime ozobohudi fi gatei fa dam bakda daeti ulohona fa dam bake ahate faasi vameadameam làhà ame di labe dat Kristus bake tu vuzehi im Abada meedaha vabda labe modeo, dat ame im lam vi ozome ozobohudem biemda labe modeo, ame da labe vi oli uho lab vameadam dae lam vi aimeam làhà ab vi ozobohudemam bak. “Làhà em faina meedam dàt mode?” laham bak lam it ozome ab ozobohudemam bak.

25Labi ame da labe uho lab gagodaha im zi lam aidume vi ozo, “Eho im lada lam fai bak modehe. Eho im lada lam fai bak modehe,” lahame labi vi ozodume aba aho am ahu ad iuba vastehe im lam ahebu ab modi fa tombalemam taia? Labi aho lab vastehe im lam ahebu modi tombalehemu aho fa vei ladi am ahu adat vei iedi Ala bake, “Am abo feàte,” lahame ab faasi vou baedamam bak. Vou baedam labe damat vou faodahit ame da labe ab gagodamam. “Lo. Uho lab meedam bak lam Alat uba tau vuusdam labe uho meedalo,” lahame ahate uba labi gagodam bak.

26Emti vahi Kristus bake tu vuzehi meedam dam oa, uho bak ubuda laba bakamta vazisi Ala bake vou baedalo modem di uho gi nehame meedam dam taia? Meit Alat aba modi vizi teudi aho ladeem dae ladeelo ozoda. Labi meit Alat aba neha, “Im nim dam bake nehasu vahokedale,” lahame Alat aba modi ozobohudi aho fa dam bake vahokedalo ozoda. Labi meit Alat aba modi am ahu ad iuba modi ozobohudi fi gatem im aho fa dam bake ahate vameadalo ozoda. Labi meit Alam Aha Nutabe Neàna labe aba modi vizi teudi aho naedat it aim biem dae faasi vameadalo ozoda. Labi meit Alam Aha Nutabe Neàna labe aba modi vizi teudi dat meida labe aho naedat it aim biem dae vameadam bak lam modi ozobohudi fa dam bake vameadalo ozoda. Labihada. Labihadamta labiha. Lahana ame bak lam meedam di lam bisi vi ozome iademe meedam bak gi neham bak. Umti Kristus bake tu vuzehi vahi meedam dam ahebu modi neàdedume im ahu vei teudedam bak laba uho vi ozome ame baket ahala modidale. Bisi uhumo modi neàdi um ahu vei teudem bak lamota vi ozome ame baket a meedamule.

27Uho gi nehale. Uho bakamta vazisi Ala bake vou baedalo modem di lam Alam Aha Nutabe Neàna labe uba modi vizi teudi uho naedat it aim biem dae faasi vameadam bak lam uba modi vizi teudemeam làhà dam behàsu modeo, dam làtela modeo, modem neàte. Labi ame bak meedam di gi nehasu meedale. Amu nasi dat vàmtea labe aba modi vizehe im lam nasi vameadume neàdi fa neo dat meida labe im aba modi vizeheda faasi vameada. Labihadale. A amediat faasi vameadume dahobuedamule. Labi laha ame lab vameadam im lam meit Alam Aha Nutabe Neàna labe aba modi vizi teudi ame naedat it aim biem dae lam modi fa ozobohudi fi gateheda labe ame im lam dam bakda daet iademe ahate dam bake fa vameadale. Ba ame im lam gi vou esum vabak.

28Uho bakamta vazisi Ala bake vou baedalo modem di lam ame naedat it aim biem dae lam modi fa ozobohudi fi gatei fa dam bakda daet iademe ahate dam bake fa vameadamda vabalemeam làhà dam Alam Aha Nutabe Neàna labe iba modi vizi teudi iho naedat it aim biem dae lam dam bake faasi vameadalo àhàkem dam lam nasi dae vabalele. Gi dam ihimo ame dae lam im ahu ad nibe Ala bake vameadamta neàte.

29Labi laha uho bakamta vazisi Ala bake vou baedalo modem di lam dam totbaho Alam Aha Nutabe Neàna labe iba modi vizi teudi iho abo Alat aha Abadat vameadaha im aime im ahu modi ozobohudi fi gatei fa dam bake ahate vameaidam dam lam laha labiha. Dam behàsu modeo, làtela modeo, labihasu dam bake vameadamta neàte. Labi gi nusualadaha dam labe dogoit iademe vou faodam labe, “Ame dae lam Alat dam laba modi vizi dam labe labihasu vameadào? Alat dam laba modi vizehe vabna dam labe gi giomim vameadào?” laham bak lam gi nusu vou faodamta neàte.

30Labi vou faodameilahit Alat dat meida laba neo modi im Abada meida ame da labe am ahu ad iuba modi ozobohudi fi gatei fa ahate dam bake vameadalo modemeam làhà dat amu duzu ahate vameadamda lam nasi fa dae abada teohet vabali vou faode. Labi dat etei modi vizeheda labe im abada fà vameadase.

31Uho labihasu iademe meedalo ozodameam làhà gi dat meida labe im abada amu nasi modeme neàdi fa neo dat meida labe im abada mode. Labi neo meit im abada mode. Gi labihadume ame dam lam ahebu uloholi neàdem bak am tame. Ame bak lam dam totbaho ahebu ibi iho meit Alam im vameadam bak lam aime im ahu teudedam bak am tame.

32Neham bak. Dam totbaho Alam Aha Nutabe Neàna labe iba modi vizi teudi iho Alat aha Abadat vameadaha im lam aime im ahu modi ozobohudi fi gatei fa dam bake ahate vameaidam dam labe ibi iho ame im lab vameadam di lam ihimo naedamat fa teohet dae vabali fa faasi vameada. Teohet dae vabali fa faasi vameada. Gi labihadam meo damat modem bak.

33Iho Ala bake vou baedalo oedume meedam di labe dam ahebu meit im aba aho ozohoda meeda. Meit im aba aho ozohoda meeda. Labihasu im ahala modidume dahobuedam bak lam Alat ba ozome deelem vabak. Gi iademe dat vàmtea modi vàmtea modidam bak lam Alat Aba Aho deelem bak am bak. Dam Kristus bake tu vuzehi vahi meedam dam abo Alam damali im vamdesu meedam dam num debu iudu iumti num debu iudu iumti labihasu ibi iho modi baleàlehe bak lam uho laha ame bak labet meedale.

34Dam Ala bake vou baedalo bakamta vazisi oedume meedam di lam lahi ba dae bum kai. Gi daleà vou faodam bak. Ba meia im vameadam vabak. Gi am dat fa aba im gagom dateli ozahit uledi am im aime meedam tadem bak. Ame bak lam Yahudi dam labe ibi iho gagu fi hasi vàmadi esuhu im am bak.

35Labi laha ame bak lam meedam di lahi labe iho aihi im zoho vabiemeam làhà fa num bake le esdam di meit ahamo am date vi gagu aiale. Dam vahi Ala bake vou baedalo modem di lahit fa gagu vi ailo modem bak lam ba neà vabak.

36Eho etei lab vameadaha im zi lam um Korintus dam akati im lam meedam mu modela? Làhà Alam Im Neàna ahamte faasi vou vameatedaha bak lam uho ahamte alimeat faasi vou vameatedahe? Làhà Alam im neàna lam vou vameatedaha di lam gi uhumo aime novahe? Vabà! Um git ozoho.

37Uho meit nehameam, “Alam Aha Nutabe Neàna labe eba modi vizi teudi eho Alat aha Abadat vameadaha im aime ozobohudi fi gatei fa dam bake ahate vameaidamda meida em am bak,” lahame labi gagomda modeo, labi, “Alam Aha Nutabe Neàna labe eba modi vizi teudi eho nehi meedamda meida em am bak,” lahame labi gagomda modeo, labihamda ehelemeam làhà ame da labe laha ebe eho uba lab toedaha im lam ahebu, “Imbote! Paulusat iba nib toedaha im nim gi Alat aba gagu am im dedateli toedaha imot modem bak,” lahame laha tu vuzehi gagodale.

38Lahana ame da labe ebe eho lab toedaha im lam, “Alat eba gagu toedaha vabak,” lahame tu vuzehem momeam làhà iho nehi ozo, “Làhà Alam Aha Nutabe Neàna labe ba ame da laba modi vizi teudehe vabak,” lahame im ab ozobohudemam bak. Labihàmu ame da labe aho vameadam im lam ba a aime tu vuzehemule. Gi ailahigeàmu voole.

39Labihàmu uho Ala bake tom gagodam di lam uho neha, “Eba nehi modi vizi teudele. Eba nehi modi vizi teudele,” labihasu modelo àhàki Ala bake tom gagodam di lam gi, “Alat aha Abadat vameadaha im lam Alam Aha Nutabe Neàna labe uba modi vizi ozobohudi fi gatei fa dam bake ahate vameaidam bak lam uba modi vizi teudele,” lahame tom gagodale. Lahana dam totbaho Alam Aha Nutabe Neàna labe modi vizi teudi ame dam labe iho naedat it aim biem dae faasi vameadam bak lam a malemule.

40Lahana uho Ala bake vou baedalo oedam di ame lab meedam bak lam ahebu gi iademe vamdesu vou meedale.


  Share Facebook  |  Share Twitter

 <<  1 Korintus 14 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel