Dual Panel1Yesusat neo ame dam zi laba nehame vi vahokeda. “Uho Alat Aba Aho ozome esuhu im lam meedam di uho neha, ‘Iho im neà bak meedam labe damat fà iba aame vou baedase,’ laham bak a vi ozome meedamule. Uho labi modemeam làhà im Ai asum ahobada iube ba uba ame bak laba ozome neà bak baleà vouhodam vabak.
2Labihàmu dam na vab dama na lolo modem di nasi a ahate nehi fet vameadume fi demule. ‘Eho etei modelo modem bak nim um nasi aadamale,’ lahame a fet vameadume fi demule. Gi ohomo ozome daleà lodale. Neham bak. Ahobat neàdi meedam dam labe iho Alat iba gagohona meedalo modem di ame Yahudi damat ihimo fi hasi bakamta vahi Alat vameadaha im ahamda dogoit aidam bakti im meiti meedam num laba olem di ba daleà meedam vabak. Vedi, ‘Dam dua bak iba fà aame vou baedase,’ lahame ame num laba oli meedam meot. Labi laha na ot loidam bak tomba laba lam di gi ame baket meedam damat modem bak. Ame dam ahobat neàdi meedam dam labe ibi iho meedam bakti ulohona a meedamule. Uho Eho etei uba gagolo modem im imboda nidi nim nasi aimale. Ame dam labe im dam totbahot iba fa vou baedaha bak labet modi im Ai Ala labe ba ame dam labe iho meedaha bak gohali ame baleà vouhodam vabak. Dam giida labe ame bak lam aame fa ame dam totbaho laba vou baedaha labe gi ame na baleà vouhom bak ab vaham bak. Ba iho vamna vabak.
3Lahana uho dam na vab dama na lodam di gi daleà lodale. Dam totbaho aim bak laba ahate a vameadume lodamule.
4Uho labi modem labe uho lab meedaha bak lam gi aa lohona ozomomnat modem bak. Lahamnàme im Ai asum ahoba iuba azim Ala labe dam bakda meedaha im ahebu aame ozobohudem tadem Alat modem labe uho lab daleà modehe bak lam laha vi aame ozobohudehe labe ba biem vabak. Fa uba ame bak gohali ame baleà vouhou uba neà bak mode tame,” lahame Yesusat ab vahokedaham.
5Im lada lam vahokedume neàdi Yesusat neo nehame vi vahokeda. “Uho Ala bake tom gagolo modem di a, ‘Damat fà iba aame vou baedase,’ laham bak laba vi ozome damat aasdam bak laba duzu Ala bake tom gagodamule. Damat vedi nehada. ‘Damat fà iba aame vou baedase,’ lahame vi ozome Ala bake tom gagodalo modem di ame dam labe iho nehi deelehat meedam meote. Yahudi damat ihimo fi hasi bakamta vahi Alat vameadaha im ahamda dogoit aidam bakti im meiti meedam num laba olem di modeo, damat lailaiam bak laba duzum di modeo, abo dam dua bak odosdam bak laba le duzu Ala bake tom gagodam meo bak. Ame dam ahobat neàdi meedam dam labe ibi iho meedam bakti ulohona uho a meedamule. Uho Eho etei uba gagolo modem im imboda nidi nim nasi aima. Ame dam labe im dam totbahot iba fa vou baedam bak labet modi im Ai Ala labe ba ame dam labe iho lab tom gagoho bak lam ba ame baleà vi vouhom vabak. Lab modehe bak aahemu gi ab neàdeham bak. Ame dam labe damat iba vou baedaha im lam gi ab aime neàdeham bak.
6Lahana uho Ala bake tom gagodalo modem di gi nehale. Num ubuda oli num bumat doo adda iuba neo oli doo it baguamdi im Ai iho aam biem Ala laba aa tom gagodale. Labiham labe im Ai iho aa meedaha bak ozobohu labe iba ba ame bak laba gohali ame baleà vouhodam bak.
7Labi uho Ala bake tom gagodalo modem di a gi ame im vàmtea amu gago. Ba neo vi gago. A labihadamule. Dam Ala bake tu vuzehi meedaha vab dam labe iho labihadam meot. Abo ibi iho vuusdam ostam alalehena laba vou baedam di abo im bohulana vou baedam bak. Ame dam labe vedi nehi vi ozo, ‘Iho buuna tom gagodameam ibi iho vuusdam alalehena labe ba iba aim vabak. Abo bohulana tom gagodamehamdem labe iba aim bak am bak,’ lahame vi ozodam damat modem bak.
8Uho dam labe meedam bak lam a vi tau meedamule. Gi modeme vanamai voom imot modem bak. Neham bak. Im im gagom bak ehena iho im Ai Ala bake tom gagoho vabna Ahamo nasi fet ozobohudi esum Alat modem bak. Labihaha bak.
9Labihàmu uho Ala bake tom gagodalo modem di gi nehi tom gagodale. ‘Ai asum ahoba iuba azim Ala oa, Im dam bakda ahebu ee Oboda vousai, “Om abo feàte,” lahame tom vou baedase.
10Om fa Boehàdateboli iba dam bakdate deeli vame fa Om damali Oho Iba vuusu im vahokedam bak lam nasi faasi meedale. Labiham labe im Obo Oho ozohoda lam ahebu iho uledi meedase. Abo asum ahoba iuba Oba tau azim dam zi labe iho Obo Oho ozoho bak meedam bak lamti ulohona iho laha bak adba niba neo ame baket meedase.
11Labi im idoalem bake àmna iba dihasi lu àme neàde. Labi neo dihasi vi lu àme neàde. Labihadale.
12Labi meit iba fai bak meedam bak lam iho gi ozahigeàmu fa vei neàdedam bak lamti ulohona Oho laha iba iho faina meedam bak lam gi ozahigeàmu fa vei neàdedale.
13Labi naat iba, “Iho fai bak modem uledeo?” laham bak im ahu modi ozolo vabidam di iho bedi uledem vabak laba Oho modi esule. Labi laha abo Bisi Faina Meedamda labe aho iba, “Debu faina modem bak lam modele,” lahame ootedume iho bedem bak labna zohàme Oho iba soat vatohedale. [Neham bak. Om bisi feàda dam ahebu vuusdam Boehàdatebo Om naeda am bak. Iho ee Oboda gi labaha bohu vousai vou baedam bohu vuusdam bak. Neàde.]’ Uho labihasu tom gagodale,” lahame ab vahokedaham.
14Labi im lada lam vahokedume neàdi Yesus Aho neo nehame vi vahokeda. “Meit uba fai bak meedam di uho gi ozahigeàmu fa vei neàdedale. Uho labihameam làhà im Ai Ala asum ahoba iube Aho laha ubu uho faina meedam bak lam gi ozahigeàmu fa vei neàdeda tame.
15Lahana meit uba fai bak meedam di uho ame bak lam ozahigeàmu fa vei neàdedam vabameam làhà im Ai Ala labe Aho laha ubu uho faina meedam bak lam ba ozahigeàmu fa vei neàdedam vabak,” lahame ab vahokedaham.
16Labi im lada lam vahokedume neàdi Yesusat neo nehame vi vahokeda. “Uho Ala bake ot netàdiame im ot vameaidalo ahit na àm mu tom gagolo modem di um dauha ladehebeat a meedamule. Labi um ohu fau visoi um ohu laba a nom gulamule. Labi sue kaobulehena a visoi dumule. Im lada lam dam ahobat neàdi meedam dam labe ibi iho meedam bak am bak. ‘Iho ahit na àm mu Ala bake tom gagodam bak nim damat fà iba aame vou baedase,’ lahame ahit labihasu gi ahobat neàdi meedam damat modem bak. Lahana ame dam labe ibi iho meedam bakti ulohona a meedamule. Uho Eho etei uba gagolo modem im imboda nidi nim nasi aima. Ame dam labe iho lab ahit na àm mu Ala bake tom gagodam bak lam im dam totbahot iba fa vou baedaha bak labet modi im Ai Ala labe ba ame dam labe iho lab meedaha bak laba gohali ba ame baleà vouhodam vabak.
17Labihàmu uho Ala bake ot netàdiame im ot vameaidalo ahit na àm mu tom gagolo modem di gi ubu uho modi baleàhà im lamota modem neàte. Abo dihambe keesi anekehà valo kike. Labi dauha valo kike. Labihadamta neàte.
18Uho lab Ala bake ot netàdiame im ot vameaidalo ahit na àm mu tom gagolo modem bak lam damat aame ozobohudem vabiem bak am tame. Gi uhumo aa daleà na àm bak mu tom gagodamta neàte. Neham bak. Im Ai iho aam biem Ala labe abo dam bakda iho aa daleà modehena lam ahebu ozobohudem Alat modem labe Aho uho lab daleà modehe bak gohali ame baleà vouhodam bak,” lahame Yesusat ab vahokedaham.
19Labi im lada lam vahokedume neàdi Yesusat neo nehame vi vahokeda. “Um bak niba azim di bisi nazoh soa maehena duali bak niba vahedam bak lam a vi ozome meedamule. Neham bak. Bak nim nazoh àboziem meot. Boet aume fa hae vi vieme gihobuli vàhàdem meot. Meit um numa aa oli nazoh vam meot. Labihadàmu bak niba nazoh dualem bak bisi a azi vi ozodamule.
20Meit aho soa maehe nazoh vahedaha bak laba am ahu laba it ozodam meo bak. Labiham bake gi im nehasu meedamta bisi neà bak am bak. Uho bak niba azim di gi im Alabadata meedale. Uho lab meedam bak labet modi Alat fa ame bak laba gohali ame baleà vouhou uba soa maehe nazoh asum ahoba iuba vaheme neàdi ahumdi esum bak am tame. Ame bak laba ba nazoh àboziem vabak. Boet aume fa hae vi vieme gihobuli vàhàdeme setem vabak. Meit aa oli vam vabak. Gi neàna modesdam bak,” lahame ab vahokedaham.
21(6:20)
22Labi im lada lam vahokedume neàdi Yesusat neo nehame vi vahokeda. “Meit am fako vuagat fauti uloho labe na alihi aadamna am bak. Labiham labe neham bak. Fako meibada neàdi im ozobohudi fi gatelo àhàkemeam làhà num vuagat fauhati uloholi na ahebu aadam bak. ‘Abo neà bak neame?’ laham bak ozobohudi meedam bak.
23Lahana meit am fako faidemeam abo im ozobohudi fi gatem bak àhàkem vabameam làhà am gi aibu bakti uloholi na aam vabili modesdam bak. Ba, ‘Neà bak neame?’ laham bak vabili gi fai bak tadem bak. Labihàmu, ‘Neà bak neame?’ laham bak meit am ahu ozobohudi fi gatem vab labe am ahu ad laba aibuli modesdam bak lam gi feàna modesdam bak.
24Labi im meida neham bak. Dat vàmtea labe meia na gagu meedamda behàsdemeam làhà ba na im ozome meedam vabiem bak. Neham labe labihaha bak. Meia na gagu meedamda behàsdemeam làhà dat meida laba faki ziesobuli aho gagoho bak lam gi tozome mu fa dat meida laba deeli aho gagoho im lamota aime uledi meedam bak. Labi laha um ahu Ala bake tu vuzehi vàmadi meedameam làhà ba ahu behàsdi fa nazoh zi lamti vahi tu vi ozodam biem bak. Labi laha um ahu bisi nazoh zi laba tu àvodi meedameam làhà ba ahu behàsdi fa Alati vahi tu vi ozodam biem bak,” lahame ab vahokedaham.
25Labi im lada lam vahokedume neàdi Yesusat neo nehame vi vahokeda. “Um a bisi nehame vi ozodamule. ‘Im na àm bakti vao udem bakti vabalemeam làhà im ba akati modi ahedi na im meedàla? Im labihameam eloe taia?’ laham bak lam um bisi a àvodi vi ozodamule. Labi, ‘Im so bozbulehe bak nim im akati modi sueli dusuela?’ laham bak lam um bisi a àvodi vi ozodamule. Neham bak. Im ahedi na im meedam bak lamti na àm bak lamti na behàsu lam vi ozom di bisi tombuda im ahedi na im meedam bak am bak. Labi laha im so nimti sueti na behàsu lam vi ozom di bisi tombuda im so am bak.
26Uho bumet meedam bak laba vi ozodale. Bume ba na debe soali modeme àm vabnat modem bak. Labi laha ba na modeme vahem num mome iho àmna laba vahedam vabak. Lahana im Ai Ala naedat Aho gi ozahit ame bume keobena laba vou faovoi dihasi na lu esu. Dihasi na lu esu. Labihadam bak. Labihàmu uho ozom, damti ame bume lamti na behàsu lam vi ozom di bisi tombuda akete? Gi im dam am bak. Labiham bake im Ai Ala naedat Aho laha iba dam bakdate vou faovoi aasdam Alat modem bak.
27Uho ozom, um elom vaba gi ahe lahasu bohu vuusdam bak laba uho bisi lab it vou faovoi ozodam bak labet modi um elom vaba fa vi ahedidume bohu vuusdam meo. Vabà! Ba gi koena vi tau bohulalem vabak.
28Uho koena vi tau bohulalem bak modem biem labe um akati neha, ‘Iho so bozbulehe bak nim akati modi sueli dusuela?’ lahame bisi dihasi vi ozoda. Dihasi vi ozoda. Labihadàla? Uho ut ava aam neàna ahamo usim di labe meedam bak laba vi ozodale. Ame ut ava lam damat dehe vabna gi ahamo usihinat modem bak. Labi laha ame ut ava labe anekehàli elu faitoi fi name beateli gimsum vabak. Lahana ame ut ava damat aam di abo aam neàna modem bak.
29Lada lam labiha. Lahana dat ahamda Boehàdatebo Salomo labe aba aho vuusualaha nazoh feà lamota zi feàt. Lahana aba aho dusuhu sue neàna lamti ame ut ava lamti na behàsu lam vi ozodam di bisi aam neàda ut ava am bak.
30Ame ut ava lam gi usdalo iahamu aladume seti fa damat vamateme fa vua vahudam bak lam Alat ozobohunàme gi ozahit aasu vabiedam labe damat aam neà bak modi esuidam bak. Alat labihasu modehelahit uho ozom, um so bozbulehe bak lam laha modi fa fi olem vaba? Vabà! Abo modem bak. Neham bak. Ame ut ava lam Alat modi aam neàdehe bak lamti um so bozbulehe bak lam Alat modi fa fi oli neàdem bak lamti na behàsu lam vi ozodam di uho ozom, bisi tombuda akete? Im dam am bak. Lahana um akati Eba mahate tu vuzehem vaba vedi gi im iudu ium ozo. Im iudu ium ozo. Lahadume vi ozodam bohu meedàla?
31Neham bak. Ala bake tu vuzehe vab dam debu mei debu mei laham dam labe, ‘Im etei ana à? Vao ake le ude? Ana ve sueli dusuela?’ lahame àvodi vi ozodam bak abo feàte. Lahana ame dam labe ibi iho àvodi vi ozodam bak lam uho a vi tau meedamule. Dam bakda na àm vaba idoali elom bak lamti sue dusum bak vabalem bak lamti im Ai Ala Na Debu Modeheda labe Am ozobohu bak. Ba biem vabak. Labiham bake uho a bisi nehame àvodi vi ozodamule. ‘Im na àm bake im akati mode? Im vao udem bake im akati mode? Im sue vabalehe bake im akati mode?’ laham bak lam bisi a àvodi vi ozodamule.
32(6:31)
33Uho fa gi nehasu meedale. ‘Alat Ahamo Boehàdateboli iba deeli vame Am damali vuusu im vahokedàmu iho gi Aba Aho ozome esuhu bak lamota uledi im vamdesu meedase,’ laham bak laba nasi ahu vitasu vàmadele. Uho ame bak laba nasi vitasu vàmadi meedameam làhà Alat uho amu lab àvodi vi ozodamna lam ahebu uba ba vi loda tame.
34Labihàmu uho etei nasi, ‘Em dihasi ana à? Em dihasi vao ake le ude? Em dihasi ana ve sueli dusuela?’ labihasu na im ba dihasi modiamda zi laba a nasi fet àvodi vi ozodamule. Uho gi na im uho etei di nibe àvodi meedume vou disimda lamota vi ozome meedale. Etei vi ozome meedamda nimti ba dihasi àvodi vi ozome meedamda lamti a vi tau valiheme dualemule. Ba dihasi modemda lam gi labihasu faode,” lahame Yesusat ab vahokedaham.