Dual Panel1Labi Yesus im lada lam gagu neàdi Aho ame Yahudi dam eeda zi laba im meida nim neo nehame vi vahokeda. “Eho etei uba totobet fi koadalo modem im nim uho mahate aime vi ozodale. Dat utoho deda nibe am tat vueheba laba am na meedam dam gagome anggur neb zi deddume neàdi esu. Labi neo am na meedam dam laba neha, ‘Um laha em anggur dee nim ke vou vahe lame fi bovai esule. Labi afoezobe ame anggur oo amdehezobe vaheme meit duzu uname vaksa futom bake ozome ke baana nabime ve fa ahit feme bumatali esule. Labi neo damat em anggur dee aa li modem bake azi nom vou aasdam num kilana laha mome duzule,’ lahame gagu olu ame baket ab modeham. Labi modeme neàdi anggur deda labe bak mei bake lalo modemu dam na debe soali modeme vahem dam zoho laba gago, ‘Uho em anggur dee nim teohet vou aasdume amdehezobe modeme vahedam di zoho uho va. Zoho eba naedate vahedume esu. Labihadale,’ lahame it gagu esmozi bak bohu bake ab laham.
2Labi le aidamehamdi ozoha, am anggur oo vaedume amdem bak fuhemu fa am na meedamda meida laba gagu ab oluham. ‘Em anggur dee teohet vou aasdam dam labe iho ot loiame vaha doi ebe eho vam zoho eba esuhuda lam le vame fa vou lele,’ lahame gagu ab oluham.
3Labi le gagoha ame anggur dee teohet vou aasdam dam labe ame da lam lehemu gut si foadume saemea fa ab oluham.
4Labi anggur deda labe gut aaha dat gi saemea fa lehemu am na meedamda meida laba neo gagu fa ab oluham. Labi olu lafusi modeha ame anggur dee teohet vou aasdam dam labe neo gi ohula gut fu game ladi ab oluham.
5Labihàmu ame anggur deda labe neo gut aaha neo dat gi saemea fa lehemu dat meida laba neo ab gagu oluham. Olu fusi modehat ab gut oteham. Gi ame baket neo modidam labe ame anggur dee vou aasdam dam labe neo dam zoho gut odda. Labi dam zoho gi foadume fa saemea ouda. Gi labihada.
6Gi labihadume modeha am adat abo aho bisi deeleheda lamota ab vekeham. Làhàmu ab ozoham. ‘Ne, em akati mode? Làhà gi em adat nim neo gagu oluse. Eho labihameam dam labe fa em adat bake vei ladi ahu adat iedi fa eba doi lu olum zoaha bak,’ lahame vi ozome neàdi am adat ab gagu oluham.
7Olu ladume lafuseo vabalehe di labe ame anggur dee teohet vou aasdam dam labe gi bak bohulana gut aaha anggur deda labe am adat ledam bak aahemu neha, ‘Da nim ba am aiam na misia vamda am taia? Imo da nim oteme afoezobe anggur dee nim fa im na misialese,’ lahame im aa ab odoadaham.
8Labi im aa odoadume neàdi ame da fuhuzobe neo gut si oteme am koeiso vou kea lame anggur dee natàh ke labe vou futoi bako iuba ab vooham.”
9Lahame Yesus ame im totobe lam fi koadume neàdi neo ame Yahudi dam busaoda zi laba vi ailo ab gagoham. “Uho ozom, ame anggur deda labe fa li am anggur dee teohet vou aasdam dam laba li akati modela? Gi neha taia? Dat naeda fa li ame anggur dee teohet vou aasdam dam laba oddam bak. Labi oddume am anggur dee lam fa dam amomoi gagome fa vou aasdam bak.
10Imbo bak. Eho etei uba lab gagoho bak lam abo imbote. Lahana meit Alat Vameadaha Im Toedahana laba im meida nehi toehena nim um aame vi ozobohudehe vaba? ‘Dam num moadam dam labe, “Faite,” lahame mu vooho ke lam fa feà Dateli bisi num mome teudem ke am bak.
11Ame bak lam Boehàda Alat Ahamo ozome modehe bak. Labi Aho lab modehe bak lam iho aam di damat ihimo modem biem im feàna modehena aaha bak.’ Lahame toeme esuhu im lam um vi aame ozobohudehe vaba? Ame im lam etei ab imbodi uho Eba ab moudamam bak.”
12Lahame labi vameadume modeha ame Yahudi dam eeda zi labe iho Yesusat etei lab totobet fi koadaha im lam aihemu ab ozoham. “Oo, Yesusat etei lab vameadaha im lam gi iba vàlu vameada taia? Aho li vahokedaha im lam iho aim mu vooho bak laba ozome ame anggur dee teohet vou aasdam dam laba gi vàlu im totobet fi koadaha taia? Imo Yesus sise,” lahame ahu gukeme modem faidi seti vi ozodaha, dam duada totbaho Yesus bake tuhuda feà labe iedi Am sim bili Yesus vou esmozi fa ab laham.
13Labi ame Yahudi dam eeda zi labe fa le vou faobe neo im aa odoadume neàdi dam iba taumda ab gagu ledaham. Neha: Farisi dam totbaho ame. Labi Galilea bak laba azim dam laba vuusdam Boehàda Herodes Antipas bake taumda zi ame. Labihasu gagome ledahazobe im nehasu vameame Yesus bake ab oluham. “Uho Yesus bake ahit fi bovai im mei im meime gagu vi aimeam Yesusat git gagoho bak aihizobe sile,” lahame vameadume neàdi Yesus bake ab oluham.
14Labi le Yesus bake ab gagoham. “Guru oa, Oho lab meedam bak lam im ahebu ozobohu bak. Om abo im vamdesu meedamda Om am bak. Labi Alat ozo, ‘Dam bakda nehasu meedase,’ lahame Aba Aho ozoho im lam Oho dam bake im vahokedam di Om laha gi im vamdesu imbona vahokedam bak. Om ba neham bak modem vabak. ‘Da lam ee feàda Eba im gagohe? Làhà Em aime tuse.’ Laham vab di, ‘Da lam ee vabda Eba im gagohe? Làhà Em aime tum bak mose,’ lahame ba dam fahedam vabak. Labiham labe damat Oba ozomsu gagom di Om ba ame im lam aime iedi vuzehem vabak. Om labiham dàt modemu iho nehi Oba gagu vi ailo modem bak. Im Yahudi dam ihimo dat ahamda Musat toedume fi hasi esuhu Im Feàna zi lam iho tu vuzehi meedam labe Oho ozom, pemerintah iba vuusu meedam bak gohali lodam doi pajak lam iho ame doi lam fa Kaisarleheda laba lodam neào? Ame Im Feàna zi labet iba maleheo? Akatihà?” Lahame labi gagoha Yesusat ame dam labe Aba vàlulo ahit keobaedume fi bovai vi ailo modem bak lam Ahamo ozobohudi fa ab gagoham. “Um gi ahobat neàdi Eba li vameadam damat modem bak. Uho akati, ‘Eho git gagose,’ lahame ahit Eba li gagu vi ailo meedà? Uho ame pajak abo gi vi tau lodam doi oona perakat modehena lam Eba fi male.”
15(12:14)
16Làhàmu ame dam labe le ame doi oona visoi fa vou li Yesus bake ab loham. Labi Aho ve vousai dam bake fi si vimtedam labe ab vi gagoham. “Ame doi nim amam dauhati ulohona modesuhela? Labi amam ee laba toehela?” Lahahat dam labe neha, “Dam ahebu vuusdam Kaisarleheda labe am dauhati am eeti modesuhu bak.”
17Lahame labi gagoha Yesusat fa neo vi gago, “Làhà uho dam ahebu vuusdam Kaisarleheda laba na abada lam fa naedate loda. Labi uho laha Alat Aba Aho gagohoda lam laha meeda. Labihadale.” Lahame labi gagohemu ame dam labe Yesus git gagom bak aiesome ame im lam gagoha Yesusat git gagom vabamu ab àvodeham.
18Labi ame digat zoho labe Saduki dam labe laha neo Yesus bake gagu vi ailo ab li dozeadaham. Ame Saduki dam labe iho ozome tuhu im gi neha, “Mei elom di ba fat ahedi usam kaio,” lahame tu ozodam dam am bak. Laham dam labe Yesus bake li vi ailo ab gagoham.
19“Guru oa, dat ahamda Musat aho toedume fi hasi iba esuhu Im Feàna zi lam im meida nehi toeme fi hasi esuhu bak. ‘Meit am itbaho fatoho vaba elomeam làhà fa ame nam maboe lam am dam zohot fa ve data faasi, “Ame koei labe am data am tame,” laham bak ozome debu bohulalelo ame maboe lam koei labe am vahadat modeo, am dubut modeo, fa vale,’ lahame Musat aham di iube labi toeme fi hasi iba esuhu bak.
20Ne lahana iho etei vouholo modem im nim Oho nasi aimale. Amu di iube ame dam abo tujuh ehet. Datahida ame. Labi donida lima ame. Labi domuàda ame. Labihasu ame dam tujuh labe dat datahida nam ab vaham. Labi ve modeha ame nam lam data faaha vabna dat ab eloham.
21Labi ame maboe lam ame koei laba vi tusuhu dàt fa neo ab vaham. Labi ve modeha ame maboe lam data faaha vabna dat neo ab eloham. Labi ame maboe lam dat doni dàt fa neo ab vaham. Labi ve modeha ame maboe lam data faaha vabna neo dat ab eloham.
22Gi labihasu vou mode ledume dat domuàdate ab vou fuham. Labi vou fusi modeha gi neo ame baket modi ame maboe lam data faaha vabna dat ab eloham. Labiha ladume ame dam tujuh ahebu ab foli seteham. Labi ame maboe lam ba neo ab vi eloham.”
23Lahame ame Saduki dam labe iho ame im lam vouhome neàdi, “Im elom di ba ahedi usào?” laham bak lam tozolo Yesus bake neo vi ailo ab gagoham. “Làhà Oho lab gagoho bak lam, ‘Mei elom di fat ahedi usam bak,’ lahame Oho lab tu ozome gagoho im lam imbodemeam làhà ba diamut dam ahebu elodaha dam fat ahededume usnadam di lam ame dam tujuh labe ototo vaidume ba vi eloho nam lam Oho ozom, amam namet mode?”
24Lahahat Yesusat fa ab gagoham. “Vabà! Um git ozome gagoho bak. Alat Vameadaha Im Toedahana lam uho mahate aame vi ozome ozobohudehe vab damat modem bak. Labi Ala laha im feàna modem Alat modem labe dam elohonàme Aho modi fa neàdem meo bak um laha vabiem damat modem bak.
25Ba diamut dam elodaha bak labet Alat modi fa ahededume usnadam di lam dam ba lahi vam vabak. Labi laha lahi ba dam vam vabak. Gi Alat Am im gagu vou usem dam labe iho asum ahoba iuba azim di gi soaona esdam bakti uloho bak.
26Ne lahana uho neha, ‘Dam elodaha dam labe im elodaha bak labet Alat modi fa ahededume usnadam vabak,’ lahame uho lab gagoho bak lam git ozome gagoho bak. Eho ozoha, uho Musat aham di iube toedume esuhu im lam vi aame ozodam vab damat modem bak. Aham di iube ut aabadehena buà lam vuat eludam bak Musat vi aadàmu aasuhat vua elum bak lam taho faali setem vabamu Musat le netàdi ab aasdamam. Labi aasdume modeha Alat am dae vua labe futoi Musa bake nehame vameadaha bak. ‘Em abo Abrahamti Isakti Yakubti labihasu Eho vuusuhu labe ame dam labe Eba vi ozome vou baedam Ala Em am bak.’ Lahame vameadahana toeme esuhu im lam uho mahate vi ozodam vab damat modem bak. Alat aham di iube lab gagoho bak lam ame dam làtela lam gi elodahanàme fat ahedi Aba vou baedam lahasuhu bak lam Aho vameadaha bak.
27Labiham labe Eho vi ozom, dam elodahada zi labe ba Ala bake vou baedam vab taia? Gi dam ahe damat ihimo Ala bake vou baeda taia? Um abo git ozoho damat modem bak,” lahame ab vameadaham.
28Labi Yesusti ame Saduki dam lamti daet ot beidam di lam dat ahamda Musat toedume fi hasi esuhu Im Feàna zi lam ozobohudi fa dam bake vahokedam guru meida vàmtea labe aho ba vuli tau duzu aiha Yesusat gi im neàt fa vameadàmu aho neo aba aho ozohoda lam fa Yesus bake vi ailo ab gagoham. “Guru oa, Oho ozom, Alat neha, ‘Meedale,’ lahame gagu esuhu im zi lam bisi im tombuda iho modemda akete? Oho nasi gagomale.”
29Lahahat Yesusat fa gago, “Eho ozoha, Alat Vameadaha Im Toedahana zi labe im bisi tombuda gi nehaha bak. ‘Israel dam oa, Boehàda iba vuusdamda iho vou baedam Ala lam gi vàmtea bak. Ba amomoi kaio.
30Labihàmu im dam ahebu meit am ahu vàmadi Ala bake deeli gi labaha bohu vuusda. Labi meit laha gi ame baket mode. Labihadale.’ Lahame Musat laba toehe im lada lam bisi tombuda am bak.
31Labi im meida nehi toehe bak. ‘Uho meit aba it deeli vou faovoi vabiedam bak lamti ulohona vi ozome fa meia laha deeli vou faovoi vabiedale.’ Ba ame Musat aho toedume fi hasi esuhu Im Feàna zi abo damat vou vamea usehena lam iho vi ozom di ba modi tombulemda amomoi vabak. Gi ame im behàsu am bak.”
32Lahame labi gagoha ame guru labe fa neo vi gago, “Lo, Om abo neà gagoho. Oho neha, ‘Iba vuusdamda iho vou baedam Ala lam gi vàmtea bak. Ba amomoi kaio,’ lahame Oho etei lab gagoho bak lam imbote.
33Labi Oho neha, ‘Im dam ahebu gi ahu vàmadi Ala bake deeli gi labaha bohu vuusdale,’ lahaha bak lamti labi, ‘Iho naedamat it deeli vou faovoi vabiedam bak lamti ulohona vi ozome fa dam amomoi bake laha ame baket meedale,’ lahaha bak lamti bisi iho vi ozome vuusu tombulemda am bak. Lahana, ‘Iho Ala bake vi ozome na fi ho vua vahudamda modeo, na amomoi Ala bake vi ozome lomda modeo, labihasu meedale,’ lahame vamea usehe im lada lam bisi tombuda modem vabak.”
34Lahame labi gagoha Yesusat aime vi ozo, “Làhà da lam abo im ozobohudi gagohe?” lahame vi ozobohudi ame da laba fa ab vi gagoham. “Alat dam bake deeli vame Am damali vuusu im vahokedam bak lam abo gàhà bak lam om ozobohudi ab fi gatelo vabaleham bak. Eho ozoha, om kehàm vaba Eba tu vuzehi ab Alam damalelo modemam bak.” Yesusat gi neà bak labihasu gagodàmu Yahudi dam eeda zi labe iho git neo vi gagomeam iba neo modi ladem bak labna zohàme ame digat labe faasi im dam meidavat ba Yesus bake im vi gagu aim bak ab moham.
35Labi ame Fihasi Ala Bake Vou Baedam Num Vàmteabu labe am ad oli aam bak tomba laba Yesusat dam bake vahokedam lahasuhu di labe Am gi ozobohunàme neo ahit dam bake vi ailo ab gagoham. “Dat ahamda Musat toedume fi hasi esuhu Im Feàna zi lam ozobohudi fa dam bake vahokedam guru zi labe iho akati modi ame Alat Gagu Fihasi Vimteme Oluhu Dat Boehàda laba im nehasu gagodàla? ‘Am abo boehàda Israel dam bake vuusdam dat ahamda amu gi eloi seteheda abo Daud labe am mekehàdat modem bak,’ lahame labi gagodàla?
36Ne, aham di iube Alam Aha Nutabe Neàna labe Aho Daud bake modi vizi teudi Daud ahamo nehi gagohona taia? Aho neha: ‘Na Debu Modehe Ala labe Aho fa eba vuusdam Boehàda laba gago, “Om Em ahi totbaho niba nusu Eba tau im dedateli dam vuusu im vahokedase. Labi Eho dam Oba fakemoholehe dam zi lam Eho ahit modi bedi fà Oba iedi uledi im Oboda fà aime meedase.” ’ Lahame Daud aham di iube labi toeme esuhu bak.
37Daud ahamo Alat Ba Gagu Fihasi Vimteme Olulo Modemda Boehàda laba neha, ‘Eba vuusdam Boehàda,’ lahame labi gagodàmu ba akati meit Alat Gagu Fihasi Vimteme Oluhu Dat Boehàda laba neha, ‘Boehàda Daum mekehàda modem bak,’ lahame labi gagodàla? Labihameam làhà Alat Gagu Fihasi Vimteme Oluhu Dat Boehàda lam fa Boehàda Daud vafozi bisi feà Dateleheda Am taia?” Lahame Yesusat labihasu vameadàmu ame dam duada zi labe iho gi deelehat ab vi aidamam.
38Yesusat dam duada zi laba neo nehame vi vameada. “Dat ahamda Musat toedume fi hasi esuhu Im Feàna zi lam ozobohudi fa dam bake vahokedam guru zi labe ibi iho meedam bak uba vizemo. Labiham bake um abo iademe it vou faovoi meedale. Ame guru zi labe ibi iho meedam bak gi nehadam bak. ‘Dam totbaho iba fà gut baedase,’ laham bak ozome sue sona ahoba dusumda bohuna duadume damat im vameadam bak tomba laba le it aai it aaidam labe deeli goom bak ame. Labi iho neo dam duana zi dokbuedam bak laba le damat fà, ‘Neàte,’ lahame iba gut gagom bake deeli meedam bak ame.
39Labi neo im Yahudi damat ihimo fi hasi bakamta vahi Alat vameadaha im ahamda dogoit aidam bakti im meiti meedam num laba olem di vedi dam feàda ihimo nusum bak laba deeli nusualadam meo bak ame. Labi laha na zi vaheme àlo modem di vedi dam feàda ihimo nusu na àm bak laba bisi netàdi vi tau nusu na àdam meo bak ame.
40Labi maboe zi laba ahit neha, ‘Im om vou aasdalo mozo,’ laham dam labet vedi ahi vageme netàdi maboe nazoh fetehesu vi vadume dualem bak ame. Labi laha Ala bake tom gagodam di iho lab faina modehe bak lam vedi ahit vasti ihimo neà damali gi Ala bake la gagoi le gagoidam labe bohulaledam bak ame. Aiee! Ame dam labe labihasu meedam damat modem labe Alat ba diamut, ‘Fa duana modi geàdase,’ lahame na asimbuna feà ame dam laba meeda tame,” lahame Yesusat ab vameadaham.
41Labi Yesusat im lada lam vameadume neàdi Aho ame Fihasi Ala Bake Vou Baedam Num Vàmteabu labe am ad oli aam bak tomba abo damat Ala bake lodamna vahedamnabu modesuhu bak laba netàdi nusu dam duada labe iho Ala bake doi duadam bak laba vi aasda. Vi aasdameam aaha dam na duada labe iho doi duana duadam bak ab aaham.
42Labi neo gut aaha na vab nam maboe labe neo li aba aho Ala bake lolo modemna abo doi oona koena behàsu tembagat modehena ab vou li tau dusuham. Ame doi lam ozom di na vam biemna ozomomnat modem bak.
43Yesusat ame bak lam aahemu Aba vi tau meedam dam laba, “Aba netàdi li dozeadale,” lahame gagu ab li dozeadaham. Li dozeadume neàdi ab gagoham. “Eho etei uba gagolo modem im imboda nidi nim nasi aima. Na vab nam maboe labe aba aho etei Ala bake loho doi lamti dam duada labe ibi iho Ala bake lodaha doi lamti labihasu ozom di bisi na duana Ala bake lohona ozomomda gi maboe abada am bak. Neham bak.
44Ame nazoh dua dam labe vedi doi dua totbaho iho naedamat vada. Labi gi totbaho Ala bake loda. Lahana ame nam maboena nim labiham kai. Ame maboe lam na vab nam modemnàme abada gi ahebu loho bak. Aba aho modi ahedelo modem bak gi ab lu seteham bak,” lahame ab vameadaham.