Dual Panel1Labi neo Alat Am im gagu vou usemda auoholeheda labe neo trompet abada dae neo ab feuham. Labi feume modeha eho neo vi aaha falo gi amu asum ahoba iuba fa bak niba biti modesdamna eho ab aaham. Ame falo lam dat ààmomna laba abo koei it oazehena le esdam bak abo bak itmat zoho novaha bak ozom vabna labe am de naolehe zoho modesuhu doo labe am kunci lu vuusdam bak eho ab aaham.
2Labi eho neo vi aaha ame da labe aho bak itmat zoho novaha bak ozom vabna labe am de naolehe zoho modesuhu doo fi stoi modeha vuahu fai abo oloha vuahuti ulohona ab tom futoham. Labi modeha ala digadda lam ab aibuleham. Labi asum tom fi haba doni alim baa neà bak nim laha vuahubut belu ab aibuleham.
3Labi modeha sàgàhà mei zi feà ame vuahu labe silidam labe futodume dam bakdate ab beodamam. Amu ame sàgàhà zi lam Alat ahit modi moliba ut sokba bake azim moliba labe iho meia veem bak lamti ulohona modi vizi im dedamali dam bake veeme kealem sàgàhàt moz.
4Lahana ame sàgàhà lam, “Ba sibe modeo, ut et modeo, na deddahana labe am et modeo, labihasu a modi vàhàdedamule. Gi dam meit im dauha laba meia nohaeme itoeme esuhuna Alabada lam im dauha laba nohaeme itoehe vabda laba beome geàdale,” lahame gagu oudaha bak.
5Ame sàgàhà zi lam laha, “Abo dam bake beodume elodale,” lahame ba gagu oudaha vabak. “Gi dam bake veedume damat vanamai alihi nemahusi geàdam bohu meedume ala auoholele,” lahame gagu oudaha bak. Ame lab veedume galihasi geàdamna lam abo molibat dam bake veem di kealedam bak lamti ulohona dam bake veedume kealedam bak.
6Labihadam di labe damat modem vanamahemu, “Ihimo ahit it oteme elodase,” lahame vi ozodamnàme ame elomna debu lam dam bake vou netàdehe vab labe ba dam labe ihimo ahit it oteme elodam vabilehe bak.
7Labi ame sàgàhà labe am alihi aam di gi dam debu meit fa dam debu mei bake ot beluidalo modem di iho ziddaha kuda im so damat beom bak labna zohàme na teuna vastesumna modealadam bakti ulohona ame sàgàhà so laba modealadaha bak. Labi ame sàgàhà labe im dauha aam di gi dam bakda dauhalehe bak. Labi im ohu laba nom omahehena lam abo emasat modehena omahehena ààmom bak.
8Labi im ohuta lam laha lahi ohuta bohetlehe bak ààmom bak. Labi im mo lam gi mei vàhàdedam singa mole.
9Labi laha im ahude vastesdamna aam di gi besit modehena ààmomna tetehesdam bak. Labi im busehà dae lam gi kuda damat kereta laba vààsu ziddume dozealaha kereta labe dam bake ot beluidalo fi tudam labe nom gigidam daeti uloholi silidam bak.
10Labi ame sàgàhà labe abo moliba dogosoali meia belu kealemna ehe bak. “Dam bakdate veeme modi kealedume ala auoholele,” lahame gagu vizi dam bake modi geàdamna lam gi im dogoso laba modesda.
11Labi ame sàgàhà zi labe im boehàda iba gagu na meedamda ehe bak. Ame boehàda iba na gagu modiamda lam abo Alat Am im gagu vou usemda abo na ahebu modi fa vàhàdedamda abo koei it oazehena esdam bak abo bak zoho novaha bak ozom vabna labe im dedateleheda am bak. Laham dat labe am ee lam Ibrani dae gagom di, “Abadon,” laham bak. Lahana Yunani dae gagom di, “Apolion,” laham bak. Ame ee behàsu laba ozom di gi, “Meia modi vàhàdeme seddamda,” lahame gagom bak. Laham im lam eho ab vi aadaham.
12Im lada lam aadume neàdi meit eba neha, “Beodume geàdam bak ahamteda lam oba ab modi fet aaham bak. Lahana faod! Ba neo beodume geàdam bak modelo modemda behàsu ehe lahasuhu bak,” lahame eba ab gagoham.
13Labi eho neo duzu vou faoha Alat Am im gagu vou usemda enamleheda labe neo trompet abada dae ab feuham. Labi feuhu di labe eho vi aiha na butem daevat Alat avaesdam laba modesuhuna abo vuat usime vuahubuli ahana neàna feemna esum beahuba emasat modehena labe am oula ozoho fetehesu tom tousdamna sapi dooda mo ohula modesuhuna moti ulohona modesuhu bak ahia labet futoho daevat ab vi aiham.
14Ame dae lam gi Alat Am im gagu vou usemda etei trompet dae feuhudate nehame buteda. “Alat Am im gagu vou usem dam Efrat Soabo am naa zoho laba Alat amu simtedi modesdam dam ahia lam taho isi olule,” lahame ab buteham.
15Làhàmu ame dam lam ab isi oudaham. Ame Alat Am im gagu vou usem dam ahia lam amu di iube Alat ame dam laba neha, “Dam bakda zoho beodume foedale,” lahame fet gagu esuhu alati digatti jamti fuhu labe ab isi oudaham. Labi isi oudume dam bakda zoho behàsu vekesi zoho meida beodume eloda. Lahadume damat esuhu bak ahebu ab uloholedaham.
16Labi ame Alat Am im gagu vou usem dam ahia labe iho dam bakda zoho lab faasi beodalo modem di labe im meo dam zi kuda laba zisi nusualadaha dam lam dehe di abo dua ratus juta zi fai ehe bak. Meit ame debe novaha bak lam eba fi desi gagohona eho vi aime ozobohudi niba toehe bak.
17Labi eho edehesi fako bakamta aasdume aaha di lam kuda zi fai labe im toha nusualadaha dam zi fai lamti gi nehasuhuna aadaha bak. Ame kuda laba zisi nusualadaha dam totbaho labe im ahude vastesdamna lam abo besit modehena lam totbaho alihi bozina abo vua eludam bakti ulohona modealada. Labi ame dam totbaho zi laba vi aaha ame na ahude vastesdamna lam abo alihi gihona modealada. Labi ame na totbaho lam abo alihi haualihoena meona abo na keobe ee gagom belerang lahamna labe am alihiti ulohona modealada. Labihada. Labi ame kuda zi labe im ohu laba vi aaha gi na meona singa ohubu ààmom bak. Labi im aha labet na nehamda làtela futoda. Vua elum boz ame. Labi vuahubu ame. Labi fahet fi fasi bubuadam bakti ulohona futodamna ahagoa gai ame.
18Lahamna làtela lam kuda zi labe im aha labe futodume modeha dam zoho behàsu vekesi zoho meida vabidume beoda. Lahadume bakda ahebu ab uloholedaham.
19Ame kuda zi labe iho meia vabidume beomna zoho gi im aha labe futodamna làtela am. Labi laha neo im dogoso fa mum ohubuli meia belu geàdamna am. Labihasu meedahana labe dam bake beodahana eho ab aaham.
20Lahana eho aaha di lam dam Yesus bake fakemoholi mu vooho dam zoho ame na labet tau beodume elodaha vab dam zoho labe ame bak lam aahanàme ba ibi iho faina meedam bak lam voedume fa ahu neà bak vàmadi meedam kai. Abo ibi iho setan zi laba ahu adat iedi vou baedam bak ame. Labi ostam alalehena abo emasat modehena lamti perakat modehena lamti perunggut modehena lamti ket modehena lamti utot modehena lamti labihasu ve auet modi alalehena zi lam abo na aam biemna zi abo mei dae aim biemna zi abo nao gohatem biemna zi lahamna laba im ahu adat iedi vou baedam bak ame.
21Labi laha ame dam labe iho meoli meia oddam bak ame. Labi iho aha dae feàna vuusu meedam bak ame. Labi iho ostame fi loholi la modi le modidam bak ame. Labi iho na meina aa vadam bak ame. Labihasu ba voedume fa ahu neà bak vàmadi meedaha vabak lam eho ab vi aadaham.