Dual Panel1Ga ip, Filemon am afelna, ai Timotiusfar is ajes ge nesiktenerem, aamei awelna abar seyafter nei ne gwebili enggalfe, angtane nafsiserem jei Yesus ga sene tikwebaatini; ane wi imna bosna Apfya mese, aameiba enggammeram Kristus Yesus imsa onsobana ai gemerserem; ane tane imna bosna Arkipus, aamei awelna Yesusmana unggwanfer im gwebili abaner; ane safna Yesus aa jei ne tebanaram, Filemon im jena aa jei ge betwebuwenaram; kota Kolosewer. Surta aaiserem amniwer, Paulus. Timotius surta aaiserem ga ajebaner ge baafulu. Timotius jeime Kristus Yesus mes tikwebaatini, nei gemerserem. Ai Paulus bwiyip nwini kota Roma, aam temawer ai awelna Kristus Yesusmana ajewer gweyibenerem.
2(1:1)
3Ai sembayanga as gwebana Uwa Sanbagirfe, Uwa nemna, ane Tuhan Yesus Kristusfe, ga enggam, "O Uwa Sanbagiri Uwa amna, ane Yesus Kristus Tuhan amnaiserem, ai Aamei Is enggam ai bala, waakena Imnaiserem Filemonfe Is gulbana, ane Apfya, ane Arkipus, ane safna Yesus aa jei ne tebanaram jep mese. Ini jemna waakenfer ga sege folbamini."
4Am afelna Filemon, ai sembayanga agalap gwebanaram Uwa Sanbagirfe im temawer, sembayanga ga enggam ai gwebabana, "Uwa Sanbagiri as samfer gulbana Filemonem temawer. Jeiba angtane Yesus aa jei tikwebaatinirim.
5Angtane ai as mes ne towastana jem temawer. Jei angtane Yesus aa jei ne tebanaram seyafter jei mes nesiktababili. Ane jei jam tikweyan Tuhan Yesus tebalawer."
6Filemon, ai sembayanga as gwebana aamei angtane Yesus aa jei ne tebanaram gam is batobaabili uskambar, aam temawer aamei Yesus imes tebana. Aamei ga jes is eyebili, jega enggalf seyafter waakenaiserem Uwa Sanbagiri nes jes golminirim nebe, jeiserem waakenfer gam is sarbili, aam temawer nei Kristusfar daamfennaber neya gwena.
7Am afelna ai is ajes nesiktenerem, ini amna ase saaser-saasersusfer folbana, ane ini amna as mes kanauswebana, aam temawer aamei angtane Yesus aa jei ne tebanaram imes nesiktababili, ane aamei ini jemna imes ketamistena.
8Filemon ai ims bala Onesimusem temawer. Ai awelna Uwa Sanbagirmana ajewer gweyibenerem, ai bwiyip ga ajem temawer nwini. Ai bwiyip agalap nwinirim jamer namwer aas jepserem, ai Onesimusfar ga agalap ge dorwena. Ai Onesimus ga ai towas-towastana Yesusem temawer, ane jei Yesus ga tebana. Jei Yesus aa jewer tebanaram, jega jem temawer jei ga enggala tane amna gamserem, ane ai ga jem jeta gamserem. Filemon, ini imna ga fuma, ke samfer Onesimus jei gamjon imnip jam waraufe? Ai aamei is enggam ai bala, se tebana gamjon jega jei awelna imna gamjon is gase gweyibene gwanan gamserem. Yesus Kristus Jei ams baftana enggalfe, taterisi Jelem temawer agam nasipminennef angtanefe. Jega jem temawer ai baabetabara aamei is ajem balfe enggame, "Onesimus se teba! Baife ijam gwebayan!" Jengga ai aamei is ajam taatwebayan. Ai enggam ai gunu, aamei Onesimus se teba gamjon, aam temawer nei nena nemsa nesiksona. Ai angtane sanbak, ai fwater ai gwel taterisi Yesus Kristusmana ajamer nasipminenewelabe angtanefe. Ai bwiyip ga ajem temawer nwini.
9(1:8)
10(1:8)
11Gwanan jepserem Onesimus jei is jam batobayan awelna imnaiserem jebe, jengga namwer jei samfer nes batomini awelnabe. Awelna imnaiserem jep is batobana jam eyebife, ane awelna amnaiserem jes mese as batobana.
12Ai jei gamjon ajam warautana imnip. Ai jei ai uskambar nesiktene.
13Ai bwiyip agalap nwinirim jamer namwer aas jepserem aam temawer ai Taterisi Waakenaiserem ajewer nasipminennerem, ai safe Onesimus aafer ai tebasnenef abar ge nwinf. Ai Onesimus aafer ai tebasnenef enggalfe, jei ai as gam batobaf aamei gemerserem, afa aamei abar aaf negan nwinirim.
14Jengga ai aamei is ajam tergenbayan, aamei ai ajes bilirim jeiserem ijam eyebife. Ai is enggam ai bala, aamei ga Onesimus iner is tebana jega jei awelna imna gamjon is gase gweyibene.
15Onesimus jei gwanan awelna imna abakfer is jam gweyibeyen. Jengga namwer jei jam warauf imnibe, ga ibar is ge nwini jamer abaka. Ane jei awelna imna waakenfer is gas gweyibene.
16Namwer Onesimus gam ke angtane tefner ijes armantanaram, jengga jei Yesus mesam tikwebaatini aamei gemerserem. Ga jem temawer aamei ga jes is nesiktene. Bunarsus ai Onesimus uskambar nesiktene! Jengga aamei jei uskambarsus is nesiktene, aam temawer jei aamei imes armantana, ane aam temawer jei Tuhan nemna waakenfer mes tebana.
17Filemon, afa aamei ilem iniber jam is gunurum enggame, "Ai awelna Tuhanmana Paulusfar ge gwebuwena.", gam jega Onesimus ga jam is tebana ini saaser-saasermer, aamei ai as igemer tebanaram.
18Jei gwanan aa galap nunggirtenentem imniwer, afa jes galapserem jei kapkaiserem imnip is jam eyeibeleye, ane afa jei doini imniwer is jam komkomtabasiliye, ai doini imna jeiserem is aner as waratabana ibe.
19Ai Paulus, tafna alemanaiserem ai taterisi aaiserem aner ai tulisulu: Seyafter Onesimus jei is jes waratabalaiserem, jeiserem ga is aner as waratababana. (Ai is bafas towastana enggalfe aamei igam sarstaabonfe, ai Taterisi Waakena Yesusmanaiserem ibe is amesam towasulbono. Ane jeiserem aamei imsam sarbili Yesus ga im tebana, ane Uwa Sanbagiri Jei gwela waakena jamer abak-abaksus is gulbana ibe. Jega jem temawer ai samfer aamei is ajam balfe enggame, ap se kitulbo ai seyafter ajes balbabilirim.)
20Bunar am afelna, nei nawersamer Tuhan nems ne tikwebaatini, jega jem temawer aamei Onesimus se teba, ai aamei is agemer balaram, jei awelna imna gamjon is gase gweyibene. Nei nawersamer Kristus nemes ne tebana, jega jem temawer afa aamei jei gamjon waakenfer jam is tebanaram, ini amna saaser-saaserfersus ga ase folbana.
21Ai surta aaiserem ibe is agalap tulisulbonorom, ai bunarsusfer amsam towaswena aamei Onesimus waakenfer is tebana, aamei jei ijam tamtamtayan. Ai tousa aamei is eyebili unggwanfersus ai ajes bilirim jewer.
22Aamei seyafter sembayanga jam isa gwebabana Uwa Sanbagirfe, jega ai gamjon gam as warauwa imnibe. Ini amna as enggam folbana, Uwa Sanbagiri Jei samfer ai as gase bala, "Sya, gase warau Filemonminip." Jega jem temawer ai aamei gamjon is ajam bala, aamei mwona ap is menetulbaasini.
23Epafras jei bwiyip ai ajebar ge nwinirim, aam temawer jei awelna Kristus Yesusmana jei jewer gweyibenerem, jei isa enggam balbabili, "Kelek, waakenfer sa nwin!"
24Angtane awelna abar ajeya gwebilirim, bosna Markus, Aristarkus, Demas, ane Lukas, jeime isa enggam ne balbabili, "Kelek, waakenfer sa nwin!"
25Ai sembayang as gwebana Tuhan Yesus Kristus Jei waakena Jelemanaiserem ip ise golmini aamei seyafter gemerserem.