Dual Panel1Taterisi Uwa Sanbagirmana gwanan aa jes bilim jeba gemeram fala. Taterisi jeiserem ga enggam, angtane samfer gam kautena tampata waakena Jemna jep gwesiliserem. Au, waakenfer ganma gerabisnenne, jega angtane afa fas im nenennabe nelebe jama afaftaanuyon, ane jega jem temawer jei jam kauteyan tampata Uwa Sanbagirmana jep gwesiliserem jebe.
2Angtane Israel aa gam ne sarbilim, nei nengba nemsama sarbili Taterisi Waakena. Angtane Israel jei taterisi jeiserem aane sarbil, jengga jei jam ne taabiyen, gam jega taterisi jeiserem jei jam batobaabiyen.
3Jengga nei Uwa Sanbagiri gemer nejeya tebasinirim, nei ga nele jeiserem nejama afaftaanuyon, ane ga nesa kauna tampata Uwa Sanbagirmana waakena jep gwesiliserem jebe. Jengga angtane jem tebayanaiserem, Uwa Sanbagiri ga enggam gul: "Ai bunarsusfer nasbabili, ane ai ititmer balbabili, 'Jei fasfasus jam ge kabwiteyan tampata Amna waakena jei jep gwesiliserem.'" Ane tampata jep gwesiliserem Jei aa jes bilim, Jeiba nes mesam eyeipmil, ane aa tabanulsil awelna Jemna Uwa Sanbagiri Jei seyafter aa galap eyebilim.
4Taterisi Uwa Sanbagirmanaiserem jep ga enggam tulisul nunu nomor tuju jem temawer, "Awelna Uwa Sanbagirmanaiserem jei ga enggam, Jei seyaftersus gam eyebili, jepga nunu nomor tuju Jei ga jem gwesini."
5Gamjon aa tulisul taterisi Uwa Sanbagirmanaiserem jebe, gwanan ai agemer gunurum, "Jei fasfasus jam ge kabwiteyan tampata Amna waakena jei jep gwesiliserem."
6Nei bunarsusfer nemsa towaswena enggame, Uwa Sanbagirmana tampata jep gwesiliserem jeiba jeweram. Ane angtane afwer jep sege kabweitesa, ane Jebar jep gase gwesisi. Jengga angtane gwanan-gwanansus taterisi Uwa Sanbagirmana aa jei ne sarbilim, ane jei jam ne taabiyen taterisi jeiserem, jei jam ge kabwiteyan tampata jep gwesiliserem.
7Jepga tahunu anesus gamjon aaiserem, Uwa Sanbagiri aa bil nunu nafsiserem, ane nunu nafsi jeiserem bosna ga aas, "Nunu namwer aaiserem". "Afa nunu aas jepserem aamei jam isa sararam Uwa Sanbagiri Jei ip jam is nasipminirim, ini imna ipsama kekeletababisinirim." Taterisi Uwa Sanbagiri angtane Israelf aa jes golmilim, taterisi jeiserem Raja Daudfe jegme jeter gulbal, ane Daud taterisi jeiserem ga aa tulisul.
8Ane gwanan-gwanansus jepserem Daud jei nalef jam foroyan, Yosua jei asal-asala nemnaiserem aa aftabifel tampata Uwa Sanbagiri aa jes bilipmilim angtane jeiserem jei gam ne domsofe. Jengga tampata jeiserem angtane abakfer jep gwesiliserem jesyan, Uwa Sanbagiri aa jes bilim. Gam jega Uwa Sanbagiri tampata jep gwesiliserem jem temawer Jei gamjon enggam ga gul, "Nunu namwer aaiserem jeme, angtane sene domola tampata jeiserem."
9Ane namwer aas jepserem angtane Uwa Sanbagiri Jelemanaiserem jei sene domolsa nunu jem gwesiliserem, nunu Uwa Sanbagirmana jem gwesili jes galserem nunu nomor tuju.
10Angtane aa jei gam kautenaram tampata Uwa Sanbagirmana jep gwesiliserem, awelna jemna seyafter taban, ane jei jep ga gam gwesini, Uwa Sanbagiri Jena jes gamserem Jei awelna Jemna jam aa tabanulsilim, ane ga aa gwesil.
11Gam jega au, nei Uwa Sanbagiri tefner ganma tebasi, jega nei samfer ga nesa kautena tampata nei nejeba gwesiliserem. Au, nei waakenfer ganma gerabisnenne, jega angtane afa fas nem nenennabe jam irfweyan Uwa Sanbagiri jam onsobafe, asal-asala nemna jes galserem gangge irfwebil, ane jam ge kabwiteyan tampata Jemna waakena jei jep gwesiliserem.
12Taterisi Uwa Sanbagirmana jeiba baabetabaram, ane jei awelna samfer gam gwebili. Taterisi jeiserem jei binbinsusu samtena jemna binbini afwer-afwer galserem jemniwer. Jei is gam tegiltena jamere inibo, ane jei is gam gwerauwulbana aamei jes igam bilirim ilem inibe, ane ijes eyebife.
13Nei apgal jigala afa fas nejama syawulsiyen Uwa Sanbagirminiwer. Jei seyafter gerebaabili ogiri aaiserem jebe, ane seyafter sitaber ge falbili Jem nwenabe. Galap nei nesa fisa Jem nwenabe, ane jep ga taterisi nemnaiserem ga nesa taawolbaabisi.
14Jengga Yesus, Tane Uwa Sanbagirmanaiserem, Jeiba Imam Sanbagirsusu nemnaiserem, ane Jei mes tauna taman waaken-giribe nes gam batobaabif. Gam jega au, nei jeber-jeber Jei ganma tebasi kanaufer.
15Nei nenfentowai baabeta fas. Jengga nemna Imam Sanbagirsususerem, Jei mes towaswena enggame nei baabeta fas, ane Jei nes gemer nesiktababuwena. Ane sa sarbistaabon, Jeimba mesam ne unggwasbanant, unggwasbala nafis-nafsiserem jeme, nei gamserem nei nes gam ne unggwasbaabuwenaram. Jengga Jei etam-etama kapkaiserem afa Jam eyebiyen.
16Au, nei nejama ereyen, nei nesa gwina Uwa Sanbagirem nwenabe waakena Jelemanaiserem nep nes Jei golminirim. Nei jeiserem nesa eyebili, jega Jei etam-etama kapka nemnaiserem nes gase wirtabaipmuwena. Ane afa galap nei jam negama werenswenaram, Jei ga nes gam batobaabili, nei jam jep negama balaram.