Dual Panel1Raja Agripa Paulus ga bala, "Ai aamei is ajam bala, aamei namwer samfer se nasbi taterisi im temawer aa jes ne nasbinennerem." Paulus tafna ga tetena, jepga jei jelem temawer waakenfer ga nasbili enggame:
2"Raja Agripa, ai samfersus namwer ai finaram im tarnabe enggalfe, ai agam nasowef waakenfer taterisi kapka jem temawer, taterisi angtane Yahudimana am temawer aa jes ne nasbinennerem.
3Nabal-nabalsusu ga enggam Raja Agripa, aamei imsam towaswena osiri angtane Yahudimana asal-asala nemnaiserem jem temawer, ane ol tantanna jelemanaiserem. Jega jem temawer ai aamei isa jem bala, aamei gwanan ai as jafner is sarbasini.
4Angtane Yahudimana seyafter gemerserem mesam ge towaswebilint ai ajes bilintim ane ajes eyebilintim ai bastowaisamer agalap agam gwenantam, ona alemanaiserem jep agalap nwinintim, ane kota Yerusalem jep agalap gwenantam galap mese.
5Jei mesam ge towaswebilint am temawer, jei afa enggam sege gubilirim, ai gwanan agalap gwenantam ai angtane safna Farisimana gemerserem ga agam gwenant. Angtane safna Farisimana osiri jemna kanaususu agama nelemanaiserem jebe.
6Namwer ai aasa jep finaram, ai ga enggalf ai fina ai as jam ne tenebaf, aam temawer Uwa Sanbagiri aa jes bilipmilim asal-asala nemnaiserem jebe galap aa je etamwelaiserem, ai jeiserem ajebar fibilirim ai taterisi jeiserem ajamer taabili.
7Taterisi Uwa Sanbagirmana aa jes bilipmilim tewe dua belas Israelmanaiserem jebe, tewe Israel jeiserem jeime taterisi jeiserem namwer jeter ne taabili. Jei Uwa Sanbagiri aa jebar ne pujitawenaram gwinem ane gwerem, jei ga Uwa Sanbagiri aa jes bilipmilim galap aa je etamwelaiserem ga jebar ne fibili. Raja Agripa, anggwabura Yahudimana as jewer ne balaram kabwakeme aam temawer ai enggam ajewer gunurum, taterisi Uwa Sanbagiri aa jes bilipmilim galap se etamwena.
8Jeje bafa aamei angtane Yahudimana ijama taabiyen enggame, Uwa Sanbagiri Jei angtane futunu gamjon gam nwinsantana.
9Gwanan galapserem an mesna alem inibe ai agemeram gununt ai seyafter kapkaiserem as eyebili awelna Yesusmanaiserem jebe. Yesus Jeiba angtane Nasaretmanam.
10Ane ai kapkaiserem amesam eyeipminint angtane Kristenfe kota Yerusalem je. Angtane imam-imam sanbakaiserem jei baabeta abe as mes ne gulbanant enggalfe, ai angtane unggwanfer Yesus aa jei ne tebanaram jei agam katabuntowef bwiyibe. Ane ula aa jes ne tagalsinintim enggame angtane Kristen afweraiserem jam ne munbobife, aime ai gununt, 'Sya.'
11Angtane unggwanfer Yesus aa jei ne tebanaram, ai angtane jeiserem ai tamtamtababuwenant jena angtane Yahudimana aa jep ge betwebuwefaram seyafter jebe. Ane ai unggwasant angtane Kristen jam taatwebaabife jei taterisi Yesusem temawer baif gane gwebif. Kakala am inibe ga enggam, ai agam sofwa kota-kotana bijua nafis-nafsiserem jebe, kapkaiserem ga agam eyeipmini jebe."
12Paulus gamjon ga nasouna, "Ai kota Damsikwer agalap sofwenantam, ai surta imam-imam sanbakaiserem aa jes ne tulisuluntum ga ajes gwirnint. Surta jeiserem ga enggalf angtane nafsiserem jep agam ge saamif, jega angtane gam ge towaswebif enggame imam-imam sanbaka jeiserem jei ai as jei ne balant, ane baabeta jemna abe as mes ne gulbanant.
13Wa Raja, ai jame agalap sofnantam gwere ga bolap, ai nafa winsiwer ga ai domolant. Nafa jeiserem uskambarsus gwer nafa jemniwer. Nafa jeiserem ga jam bwere-bwerewena amnip jamer durga, ai ane angtane ai ajebara wofenantam jem nenennap aya fiton.
14Ai seyafter onnap ga aya jenant, jepga ai taterisi Ibrani oleme ga ai sarbilint, ai as balantam enggame, 'Saulus, Saulus aamei kapka Ap As ibaf eyeibene? Aamei bwerafe ina is entene afa aamei sanbaka imna ijam sarbayanaye, lembunu giri gamserem, angtane lembunu jam jemanserem tini aa jei gam girnirim lembunu jam baftafalfe, lembunu jeiserem tini ga gam fetetene tofeme.'
15Ane jepga ai tenebanant, 'Aamei nansa, Tuhan?' Tuhan ga as tamawolbanant, 'Aiba Yesusam, aamei kapkaiserem ijep eyeibenerem.
16Gas irwe, ga is fina! Ai imnibe Ana Ajewer ge sana enggalfe Ai aamei is Agam destabaf awelna Amnaiserem As igam gweibef. Aamei angtane nafsi jam is towas-towastababili aamei namwer ijes domolaram Amniwer, ane galabe isa Ajes bilibeleiserem jes mese is towasulmini.
17Ai aamei isAs gerebaasnenne waakenfer anggwabura Israelminiwer ane angtane Yahudimanyan jemniwer. Ane Ai aamei ga isAs baftana jemnibe enggalfe,
18nwena jemna gam is fertebaipmunnu, jega aamei angtane jeiserem gam is tergenbaabili gwiniwer gam sege tobitintye jamer nafabo. Gamjon ga is tergenbaabili baabeta bawasmanaiserem jemniwer gam ge irfwebif, jamer baabeta Uwa Sanbagirmanaiserem jebo. Ane angtane jeiserem jei Ai waakenfer As ga sene tebana, etam-etama kapka jemna Uwa Sanbagiri gasa wirtabaipmini, gamjon Jei Jam sarbistaabonyan. Ane jei Uwa Sanbagirem tanefe gase naawena, angtane Uwa Sanbagiri aa jes destabaabilirim.'"
19Paulus gamjon ga nasouna, "Raja Agripa, taterisi jeiserem Yesus ap bilibenent, ane jega jem temawer ai ajes domolantam winsiwer, ane ai ajes sarbilintim, ai seyafter jeiserem ga ai onsobili.
20Ai taterisi Uwa Sanbagirmana ai bunarsusfer nasibenennent, gwanan-gwanansus angtane kota Damsik je aa jei ge nwinbenerem jep ai nasipminint. Ane angtane kota Yerusalem ane ona Yudeyaminip aa je ge nwinbenerem, ane angtane Yahudimanyan jei mese jep ai nasipminint. Ai enggam ai nasipminennent, 'Gasa tikwe etam-etamawer, ane ga isa irfwena Uwa Sanbagirminibe. Gamjon ga waakenaiserem ga jes isa eyebili, jega angtane jepga sege towaswebili enggame aamei etam-etamawer imsa tikwenant.'
21Ai jes gemerserem game ajewer balbabilintim, angtane Yahudimana jei ai ga as jem temawer ne tebanant Jena Uwa Sanbagirmanaiserem jebe, ane jei as jam ne munbof.
22Jengga gwanan jes galapserem jamer namwer aas jepserem Uwa Sanbagiri ams gerebaasnenne waakenfer. Ane namwer ga ai fina imnibe enggalfe, ai angtane bastantouya ane sanbak-sanbakaiserem jep agam nasipmif seyafter bunarsusfer gemerserem. Ane ai ajes nasbilirim jei nafisyen nabi gwanan aa jes ne nasbilim, gamjon ga jese etamwena nabi-nabi seyafter ane Nabi Musa mese aa jes ne bilim.
23Jeiserem ga enggam, Kristus, Angtane Uwa Sanbagiri bunarsus aa Jes balam Jam baftanafe, Jei jamer se tere, ane Angtane nabal danala jam irwela terewer ga Jei. Jeiserem mes etamwena jega angtane Yahudimana ane angtane Yahudimanyan jei gam ge towaswebif enggame Uwa Sanbagiri angtane mesam waakentababisini, ane Jei ga nafa Jelemanaiserem mesam bilipmini angtanefe."
24Paulus jener game aa galap nasounaram, jepga Festus ga gwarna, "Paulus, aamei fofal-fofala! Aamei taterisi anesus imes gerabistena, jega jem temawer aamei ga ijam towaiwulu fofal-fofala ga!"
25Jengga Paulus ga tamawolbana, "Uwa Festus waakenaiserem, ai ajam fofal-fofalweyan. Jeiserem amnibe fas, ai bunarsusferaiserem ga ajes nasbili. Ula amnaiserem jei fofal-fofalyan.
26Raja Agripa jegme taterisi aaiserem seyafter mes towaswebili, jega jem temawer ai ajam ereyen taterisi aaiserem jam nasbife Raja Agripam tarnabe. Ai bunarsus ames towaswena enggame, seyafter aa je etamwenaram jei mes towaswebili aam temawer taterisi aaiserem jam seisyawulmiyen.
27Raja Agripa, aamke taterisi nabi-nabi seyafter aa jes ne nasbilim ke imes taabili? Maa, ai ames towaswena aamei imes taabili."
28Jepga Raja Agripa Paulus enggam ga bala, "Aamke enggam im gunu taterisi aaiserem man folera, jega ai namwer tatarmer angtane Kristenfe agam gwef?"
29Paulus ga tamawolbana, "Ai sembayang as gwebabana Uwa Sanbagirfe, afa tatarmer afa samem-samem, aamei ane angtane seyafter ai namwer as ijeya sarbasinirim enggam etamwelaiserem ai gamserem, jengga naau kekelna aaiserem aamei ijama domolyan im tafnabe."
30Jepga Raja Agripa, Gubernur Festus, Bernike, ane angtane seyafter jep aa jei ge nwinbenerem ga aa ge irwebili.
31Jewer ga jei ga aa ge tobitintye, ane jen jener ga aane gitminenne, "Angtane aaiserem jei kapka afa fas jam eyebiyen nei jei jem temawera tamtamtafe jamer futu, afa jei bwiyip kataf."
32Raja Agripa jei Festus ga bala, "Jei afa enggam jam guyono, 'Ai gwanan Kaisarminip age gwi.', gam jega nei angtane aaiserem fwater gane aftannunt."