Dual Panel1Nunu Sabateme, nunu angtane Yahudimana aa jem ge nwinbisiwefaram, awelna jam ne gwebiyen, Yesus ane angtane Jei aa jei ne tikwebaatinennerem ga aa ge wofebili gandum makan nenennabe. Angtane aa jei ne tikwebaatinennerem wisi ga aa ge folbamini, ane jei gandumu ga aane fulu, gandumu jeiserem tafam ga aane tilbebili, tifini ga aa ge janbili, ane igiserem ga aane tombaabili.
2Angtane safna Farisimana afweraiserem ga aane damtabili, ane ga aane tenebaabili, "Nunu Sabateme nei awelna nejama gwebiyen, jengga aamei gandumu ga ijema fulu. Aamei gam ijewera eyebilirim, aamei awelna ga ijema gwebili, Hukumu Nabi Musa aa jes tulistababilim ga jes ima ayebili. Jeje bafa aamei etam-etama kapka jes gamserem ga ima eyebili, nunu Sabateme?"
3Yesus ga tamawolbaabili, "Aamke gemerje ijama gerabisteyan nem asal-asala Raja Daud aa jes eyebilim, jei ane jem afelen mesna wisi aa galap ge folbamilim? Aamke ijama towasweyan?
4Jei ga aa ge kabwitel Jena Uwa Sanbagirmanaiserem kota Nobwer. Ane Imam jepmanaiserem, jei rotini Uwa Sanbagirmanaiserem Raja Daudfe ga kitulbol. Jei rotini jeiserem ga tombaabil, ane afwer ga kitulmil jelem afelen mesnaiserem jebe. Jei game aa jewer ne eyebilim, safe Hukumu Nabi Musa aa jes tulistababilim ga aas galserem: Rotini Uwa Sanbagirfe aa jes gane gulbanaram, angtanna jei rotini jeiserem jam ne tumilyen; jengga imam-imamnefener jei rotini jeiserem ga jei gane tumili."
5Jepga Yesus ga gutena, "Ai Tane Angtanemana, Aiba Tuhansam, ane Ai baabetabara enggalf Agam bili, angtane bas gane eyebili nunu Sabateme."
6Nunu Sabat nensaiserem jeme, Yesus ga jem kautena jena angtane Yahudimana aa jep ge betwebuwefaram jebe; Jei angtanes towas-towastababili. Jes jepserem angtane tafna taasfolawer aa jemanem terbenerem, jei ga jep nuniton.
7Guru-guru Hukumu Nabi Musamana aa jei ne towas-towastababuwenaram, ane angtane safna Farisimana, Jei Yesusfe kapkaiserem jes ne terelibef, jega enggalf jei enggam jam ge gubife, "Yesus Jei kapka gam eyebili!" Jega jem temawer jei Yesus ga gemer ne gerebana, angtane afa kese waakentana nunu Sabateme. Afa Yesus Jei angtane jam se waakentanaram, jei enggam ga sege gubili, "Yesus Jei awelna gam gwebili nunu Sabateme, nunu nei awelna nejama gwebiyeneiserem jeme. Je kapka."
8Jengga Yesus Jei ini jemna mes towaswebaipmini. Ane Jei angtanna tafna aa jemanem terbenerem ga bala, "Jas irwe, aaf se fya mukanawer!" Angtane jeiserem ga irwena, ane jep ga aa fina.
9Jepga Yesus ga balbabili angtane jep jeiserem, "Ai ims tenebaabili, jei bas batabil Hukumu Nabi Musa aa jes tulistababilim jebe? Nei ga bas negama eyebili nunu Sabateme? Ke waakenaiserem jesma eyebili, afa kapkaiserem? Ke angtane jam waakentaasif, afa jam munbof?"
10Yesus ga gerebaabisnenne jei seyafter gemerserem, ane angtane jeiserem ga bala, "Tafna imna se nornorsosi!" Angtane jeiserem tafna ga nornorsosini, ane tafna gamjon ga aane waakennebana.
11Jengga guru-guru Hukumu Nabi Musamana aa jei ne towas-towastababuwenaram, ane angtane safna Farisimana jeiserem ga uskambar ge kakalswebili, ane jei ga aa ge towaiwebili jam ge nasbawefe kapkaiserem Yesusfe jes ne eyebiliserem jem temawer.
12Nunu nensa jeme, Yesus ga jem tauna otumube, sembayanga gam gwebaf. Jepga Jei sembayanga ga gwebabana Uwa Sanbagirfe, gwin bwalna jeiserem jeme.
13Ane ona jame aa nafwenaram, Jei angtane Jei aa jei ne tikwebaatinennerem ga jenbebili Jemnip jam ge jalbife. Ane Jei angtane dua belas jemniwer jeiserem ga destabaabili. Jei angtane dua belas jeiserem ga bosetababili enggame, "Rasul". Kata "Rasul" igi ga enggam, "Angtane aa jes baftabilirim". Angtane dua belas jeiserem ga aas:
14Simon (bosna jemna afelna Yesus aa jes gulbanaram ga Petrus) ane osona jemna Anderyas; Yakobus ane Yohanes; Filipus ane Bartolomeus;
15Matius ane Tomas; Yakobus tane Alfeusmana, ane Simon (aa jes ne jenbewenaram Patrioteme);
16Yudas tane Yakobusmana, ane Yudas Iskaryot angtane Yesus aa jei geram ginanggwaminibe.
17Yesus ga iretya otumu jeiserem jewer, angtane aa jes baftabilirim jebaner. Jei ga aa ge fibili ona aarekabe, angtane uskambar Jei aa jei ne tikwebaatinennerem jebaner. Angtane uskambarsus ga ge forobitye jewerman-jewermana ona Yudeya je jes gemerserem, ane kota Yerusalemwer, ane kotana Tirus ane Sidonwer ga nawersamer fi eyep nulna.
18Jei enggalf ge jalbili Yesus gane sarbasif, ane enggalf gam waakentababif jei bwera-bwerna jelemanaiserem jewer. Angtane bwat kapkaiserem aa jes kabwabilirim, jei mese ga aa ge jalbili, ane ga waakentababili.
19Angtane seyafter ga aa ge unggwasbili Yesus entefe, aam temawer baabeta Jeleminiwer aa jei tubatityerem, ane jeme ga seyafter waakentababili.
20Yesus ga gerebaabili Jei aa jei ne tikwebaatinennerem, ane ga balbabili: "Aamei angtane galgalyenaiserem, ini imna is waakenfer sege folbamini, aam temawer Uwa Sanbagiri Jei aamei waakenfer is gerebaabisnenne, Uwa Sanbagiri Jei im Sanbakf nwini.
21Aamei angtane namwer wisi is jei ge folbaminirim, ini imna is waakenfer sege folbamisi, aam temawer Uwa Sanbagiri Jei is tainbisi, jamer buguf. Aamei angtane namwer ijeya syesyawenaram, ini imna is waakenfer sege folbamisi, aam temawer aamei galap ga isa bweralwesa.
22Gwanan aa jep falam, angtane jei kapkaiserem ga jes ne eyeipmil nabi Uwa Sanbagirmanaiserem jebe. Namwer aam ga Ai Tane Angtanemana, As isa tikwebaatini. Jega jem temawer, angtane gwanan aa jei ge nwinbelem jem asal-asala, jei kabwaksusu is galap sene eyeipmisi, jes gala gam eyebilim nabife. Angtane ga nabis ne nasbabil kakalmer, jei nabi baif ne gwebabil, jei ula kapka jep jes ne nasipmil, ane jei ga ge gubil nabi jei kabwaksusu. Jes jepserem kapka jeiserem ga is etamwemisi, imna ini saaser-saasersus is ga sege folbamisi. Ini imna is jam ge saaser-saaserswebamisi, ane saaser-saaserfe ga isa fostafowesa, aam temawer Uwa Sanbagiri fwaina imna unggwandusa is mes menetabaipmisini taman waaken-giribe.
23(6:22)
24Jengga aamei angtane galgalabara namwer ijeya gwenaram, galap kapka unggwandusa is etamwemisi ibe; aam temawer aamei imsa domolsant gwelaiserem imna ini saaser-saaserfer is jei gwebaipminirim.
25Aamei angtane namwer ijeya twenaram jamer buguf, galap kapka unggwandusa is etamwemisi ibe; galap aamei wisi ga is sege folbamisi. Aamei angtane namwer ijeya bweral-bweralwenaram, galap kapka unggwandusa is etamwemisi ibe; ga enggam galap imna ini is sege jenbamisi uskambarsus, ane ga isa syesyawesa.
26Gwanan aa jep falam, angtane jei ula waakena jes ne nasipmil nabi ula kapkaiserem jem temawer. Jes galserem, angtane gwanan aa jei ge nwinbelem jem asal-asala, jei seyafter afa ula waakena is sene nasipmini im temawer, galap kapka unggwandusa is etamwemisi ibe."
27Yesus Jei gamjon ga balbabili, "Jengga aamei namwer Ai As ijeya sarbasinirim, Ai aaiserem isa jes nasipmiwenaram: Ginanggwana ilemana ga jam isa nesiktababili, ane waakenater ga igama eyeipmini angtane aamei kakalmer is jei gane nasbabilirim kakalmer.
28Angtane safe is jei gane babapsobanaram, aamei ga Uwa Sanbagirfe sembayanga ga isa gwebabana, jega Jei waakenaiserem ga gam golmini jebe. Ane aamei sembayanga ga isa gwebabana angtane kapkaiserem ibe is jei gane eyeibenerem.
29Afa angtane is jam gam saftanaram olbumu afwer aaiserem jebe, safnant, aamei ijam fwayenulboyon, jengga olbumu afweraiserem jes mese is saf gam sofsobana. Afa fene sagamana is jam gam amserentabanaram, safnant, fene orolemana ilemana jegme igam tetmini.
30Afa angtane apgal jigala is jam gane bilipminirim imniwer, ga igama golmini jeiserem jebe; ane apgal jigala ilemansusu is jam gane tamserenibenerem, gamjon ijama bilyen jam warauwulfe.
31Aamei ga isa eyebili angtane nafisfe, jes galserem aamei igemera bilirim ilem inibe, angtane nafsi jei sene eyeipmifi ibe.
32Angtane etam-etamabaraiserem jei gane nesiktababili angtane jei aa jei ne nesiktababilirim, jengga jem ginanggwa jam nesiktababiyen. Jengga aamei angtane is jei ne nesiktenennerem, jetefener ijama nesiktababiyen. Afa gameye, Uwa Sanbagiri Jei fwaina waakena ibe is Jam gulbayan. Angtane seyafter gemerserem ga jam is nesiktababili.
33Angtane etam-etamabaraiserem jei waakenfer gemer sa eyeipmini, angtane waakenfer jebe aa jei ne eyeipminirim, ane jei waakenfer jam eyeipmiyen jem ginanggwa jebe. Jengga aamei angtane waakena is jei ne eyeipminirim, jemnipfener waakenfer ijama eyeipmiyen. Afa gameye, Uwa Sanbagiri Jei fwaina waakena is jam golmiyen ibe. Aamei angtane seyafter gemerserem waakena jebe gemer isa eyeipmini.
34Angtane etam-etamabaraiserem jei apgal jigala gam ne golmini nomkefe angtane etam-etamabaraiserem, ane ga gam balbabili gamjon jam warauwulbofe. Jengga aamei apgal jigala nomkefe ijeba gulbanaram angtanefe, aamei ijama gulbayan angtane jepfener jei gamjon apgal jigal fwaina ibe is jam warauwulbofe. Afa aamei enggalf gulbana, jega angtane jei fwaina ibe is jam warauwulbofe, afa ga gam jes gemerserem, Uwa Sanbagiri Jei fwaina waakena Jam gulbayan ibe.
35Wowo, jeke gam! Ginanggwana ilemanaiserem ga jam isa nesiktababili, ane ga waakenaiserem ga jes igama eyeipmini jebe. Aamei ga nomkef isa golmini, ane enggam ipsama gunurum, gamjon jam warauwulbofe. Ane afa aamei gam isa eyebilirim, aamei ga isa eyebili Uwa Sanbagiri galserem, ane Uwa Sanbagiri Jei fwaina ga unggwandusa ip ga is golmisi. Uwa Sanbagiri Jei aas galserem: safe angtane kakalaiserem jei enggam jam ge gubiyen, 'Ase samfer golmini.', Jei angtane jeiserem gam batobaabili.
36Aamei ga angtane seyafter isa nesiktababili ane ga isa batobaabili, Uwa imna gamserem angtane seyafter nesiktababili ane ga batobaabili."
37Yesus Jei gamjon ga balbabili, "Aamei angtane nafsi aa jes eyebilirim, ipsam donolnbaanut, jega Uwa Sanbagiri Jeime imnip Jam donolnnuyon! Ipsama gunurum angtane nafsi jei etam-etamabara, ga sene tamtamtababili, ane Uwa Sanbagiri Jei aamei ijam tamtamtababiyen! Etam-etama angtane nafsimana ga is borolmini, ane Uwa Sanbagiri Jei etam-etama imnaiserem gase wirtabaabili.
38Sa golmi angtane nafsiserem jebe, ane Uwa Sanbagiri is gase golmini ibe. Uwa Sanbagiri Jei ga ibe uskambarsus ga is enggam se golmini aas gamserem, twiri unggwandusa burwana gam igama gwetaasit, jamer gam tenbitye, aam temawer mwongga aamei ijesa gwirinminirim angtane nafsiserem jebe, Uwa Sanbagiri jegme mwongga jeiserem ga is jeter gam gwirinmini ibe."
39Ane Yesus ga jebe seisya taterisi aaiserem ga nasipmini: "Angtane nwe kofa jei angtane nwe kofa nafsi jam tebasfelyen. Afa jei jam gam tebasfelerem, nawersamer ga gangge janton o mwonabe.
40Angtane kursus aa jei gam onsobilirim, jei sanbakyan guruminiwer. Jengga angtane jeiserem jei kursusuwer jam gam tabanwenaram, ane gam towaswena seyafter, jei ga enggalater guru jelemana galserem.
41Ipsama donolnbaanurum ilem afelenfe etam-etama jemna enggala ti utunu galserem jem nwenabe. Jeke gam. Aamei ga is domola etam-etama imna enggala tini unggwandusa galserem, nwena imna ga is jem gam motolbaasini.
42Aamei ga fomfom igam bala ilem afelna, 'Am afelna, ai ti utunu jeiserem gama ge gosorsiwi nwena imnaiserem jewer.', jengga ilem nwenabe tini unggwandusa galserem, aamei ga ijam domolyan? Aameiba angtane akar-akarem ijei gwenaram! Gwanan tini unggwandusa jeiserem jes is gosorsiwili nwena imna is jei motolbaasinirim! Jepga aamei waakenfer gam is anggasini enggalfe, aamei ti utunu ilem afelnem nwenawer gam gosorbaasife."
43Yesus Jei gamjon ga balbabili, "Tini afa waakena, igi jemna kabwakfer je jam teyan. Ane ga gam tini afa kapka, je jam teyan igi jemna waakenfer.
44Tini seyafter gemerserem ga tannawer gane domola. Angtane gwili jam targayan gimminiwer, ane jei yapkana jam targayan serwenminiwer.
45Angtane waakena jei taterisi waakenaiserem ga jes gam nasbili, aam temawer ini jemna buguf waakenaiserem jeme. Angtane kapkaiserem jei taterisi kapkaiserem ga jes gam nasbili, aam temawer ini jemna buguf kapkaiserem jeme. Jeba bunaram, aam temawer jes igama biltenaram aaremawer, jeiserem ga iniwer gam tawetya."
46Yesus Jei gamjon ga balbabili, "Jeje bafa aamei ga Ai As ima jenbenenne, 'Tuhan, Tuhan!', jengga ijama eyebiyen Ai isa jes bilipminirim ibe?
47Angtane aa jei gam jelaram Amnibe, ane taterisi Amna gam sarbili, ane gam eyebili Ai jes Agam bilirim, Ai angtane jes galserem Ai isa gemer saamisinirim ibe.
48Jei ga enggala: Angtane jena aa jei gam eyebilirim, ane ona gulufer ga gam terbebili, ane dutumiriti ga gam tonola tunabe. Fona unggwandusa jam gam tinirim, fona ga gam tentye jena jeiserem jebe, jengga jena jeiserem jei jam ginulyon jam maltife, aam temawer angtane jeiserem jei jena jeiserem waakenfer mesam eyebili.
49Jengga angtane taterisi Amna As jei gam saribenerem, ane ga jam eyebiyen Ai Ajes bilirim, jei ga enggala: Angtane jena aa jei gam eyebilirim dutumirityamer. Fona unggwandusa jam gam tinirim, ga gam tentye jena jeiserem jebe, ane tatarfer ga gam maltini, ane fona ga gam gwirinfele jamer tatait."