Dual Panel1Gwanan jes jepserem, nunu Sabateme, Yesus ane angtane Jei aa jei ne tikwebaatinennerem ga aa ge wofebili gandum makan nenennabe. Angtane aa jei ne tikwebaatinennerem wisi ga aa ge folbamini, jei ga aane towaiwulu gandumu ga aane fulu, ane ga aane tombaabili.
2Angtane safna Farisimana jei jame aa galap ne damtabilirim jei Yesus ga aane bala, "Se damtabi! Nunu Sabateme nei awelna nejama gwebiyen, jengga angtane Imna Is jei ne tikwebaatinennerem jei ga gandumu jem ne fulu. Jei gam aa jewer ne eyebilirim, jei awelna jem ne gwebili, Hukumu Nabi Musa aa jes tulistababilim ga jes ne ayebili. Jeje bafa angtane Imna Aamei Is jei ne tikwebaatinennerem etam-etama kapka jes galserem ga aane eyebili, nunu Sabateme?"
3Yesus ga tamawolbaabili, "Aamke gemerje ijama gerabisteyan nem asal-asala Raja Daud aa jes eyebilim, jei ane jem afelen mesna wisi aa galap ge folbamilim? Aamke ijama towasweyan?
4Jei ga aa ge kabwitel Jena Uwa Sanbagirmanaiserem kota Nobwer. Ane Imam jepmanaiserem, jei rotini Uwa Sanbagirmanaiserem Raja Daudfe ga aane kitulbol. Jei rotini jeiserem ga tombaabil, ane afwer ga kitulmil jelem afelen mesnaiserem jebe. Jei game aa jewer ne eyebilim, safe Hukumu Nabi Musa aa jes tulistaabilim ga aas galserem: Rotini Uwa Sanbagirfe aa jes gane gulbanaram, angtane jei rotini jeiserem jam ne tumilyen, jengga imamnefener jei rotini jeiserem ga jei gane tumili.
5Aamke imsa gerabistena Hukumu Nabi Musa aa jes tulistaabilim? Jei jep ga enggam tulisul: Nunu Sabateme imam-imam jei Jena Uwa Sanbagirmanaiserem jep awelna aa jei ne gweyibilirim, jei jam ge nwinbesiyen, jengga jeiserem je etam-etamyan. Jega jem temawer angtane Ai Ajei ne tikwebaatinennerem etam-etama kapkaiserem jem ne eyebiyen, gandumu jame aa galap ne fulum nunu Sabateme.
6Ai ims towastababili, namwer aas jepserem Ai aare, ane Aiba unggwan-girsusum Jena Uwa Sanbagirmana jemniwer.
7Taterisi Uwa Sanbagirmana jep ga enggam baatultel: 'Ai tumilgala Abe jam gulbalaiserem enggalfe etam-etama jem borolfe, Ai bai. Jengga Ai angtane ga As terelbaabili, jei angtane nafsi aa jes gane nesiktababilirim.' Taterisi jeiserem jem igiserem aamei teisyena. Ga jem temawer aamei enggam ima gunu, 'Angtane jepmanaiserem jei etam-etamabara.' Jengga jei kapka jam ne eyebaabiyen.
8Ai Tane Angtanemana, Aiba Tuhansam, ane Ai baabetabara enggalf Agam bili, angtane bas gane eyebili nunu Sabateme, nunu angtane Yahudimana aa jem ge nwinbisiwefaram."
9Yesus tamna aa jep nasounaram ga jes mirsona, jewer ga kawetena jena afelna angtane Yahudimana aa jep ge betwebuwefaram jebe.
10Angtane tafna afwer aaiserem aa jemanem terbenerem ga jep nuniton. Ginanggwana Yesusmana jei Yesusfe kapkaiserem jes ne terelbef, jega enggalf jei gam ge gubife, "Yesus Jei kapka gam eyebili!" Jega jem temawer jei Yesus ga aane tenebana, "Angtane ke samfer angtane nunu Sabateme ke gane waakentana?"
11Yesus ga tamawolbili, "Angtane dombanabaraiserem, afa domba jemna o mwonap jam gam jantonom nunu aa jem ge nwinbisiwefaram jeme, angtane jeiserem jei ga dombana jeiserem ga gam geserstena o mwonawer.
12Dombana hargana doini unggwanfer fas, jengga hargana angtanemana je unggwanfersus. Ga jem temawer, angtane jei samfer angtane nunu Sabateme gam waakentana, ane jei Hukumu Nabi Musa aa jes tulistababilim jam ayebiyen."
13Jepga Yesus ga angtane tafna afwenefener aa jemanem terbenerem ga bala, "Tafna imna se nornorsosi!" Jei tafna jemna ga nornorsosini, ane tafna gamjon ga aane waakennebana, tafna afwer gemerserem.
14Jengga angtane safna Farisimana aa ge tobitintye jena angtane Yahudimana aa jep ge betwebuwefaram jeiserem jewer. Ane jei angtane nensaiserem jebar ula ga aane tagalsini basyamer Yesus jam ne tebafe. Ane jei nele enggalf ne terelbene Yesus jewer gam ne munbof.
15Yesus Jei mes towaswena angtane safna Farisimana jei aa jes ne mwangbisinirim jei jes ne eyebife. Jega jem temawer Jei tamna jewer ga mirsona. Angtane unggwanfersus ga aane onsobana, ane Jei angtane bwernabaraiserem seyafter ga waakentababili.
16Ane Jei ititmer enggam ga balbabili, "Angtane nafsi ijama towastababiyen Ai Ajes eyebilirim jem temawer."
17Seyafter jes gemerserem ga etamwena enggalfe, Uwa Sanbagiri aa jes bilim Nabi Yesaya aa jes tulisulum gase tabanwena:
18"Angtane Ajes destabanaram ga aare, Angtane aaiserem ga Ai Ajes nesiktenerem, Jei ga gemer eyebili seyafter Ai Agemer gunurum, ini Amna As saaser-saaserfer folbana Jem temawer. Mafnana Amnaiserem ga As gulbana Jebe, ane taterisi bunarsus Ai Ajes bilirim, taterisi jeiserem Jei anggwabura seyafter gemerserem jep gase nasipminenne.
19Jei kakalem Jam nasoweyan angtaneminibe, ane Jei ol dagame Jam nasoweyan. Angtane jei taterisi jeiserem jam ne sarbiyen Jemna taterisi nelep aa jes nasbifelerem.
20Ini Jemna folera angtane ini weren-wernaiserem jem temawer, ane ini Jemna folera angtane Ai bastowaifer As jei ne tebanaram. Jei enggal se eyebili, jamere angtane ga sene eyebili seyafter Uwa Sanbagiri Jei aa jes bilirim.
21Anggwabura seyafter gemerserem jei waakenfer ga sene tebana."
22Jewer ga angtane bwat kapkaiserem aa jei kabwanaram Yesusminip ga aane aftafala. Jemna nwena ga kofa, ane jei jam nasoweyan, aam temawer bwat kapkaiserem jemnip nuniton. Yesus angtane jeiserem ga waakentana, ane jei ga nasowena, ane ga gaarasnenne.
23Angtane seyafter jep ga aa ge bitbitwebili, ane ga aa ge nasbawena enggame, "Angtane aaiserem ke Tane Raja Daudmana, Angtane Uwa Sanbagiri bunarsus aa jes balam galap jam foryafe?"
24Angtane safna Farisimana jei jame aa galap ge sarbilirim, ga ge gubili, "Belsebul jei sanbaka bwat kapka seyafter gemerserem jemniwer, ane jei baabeta Yesusfe ga jei gulbana. Jega jem temawer Yesus Jei ga bwat kapka jemfener surbobili."
25Yesus Jei itana jemna mes towaswebaipmini, ane ga balbabili, "Angtane negara daamfennaiserem aa jei ge nwinbenerem, afa jei jam gangge syensyanwebilirim safna nafis-nafismer, afa safna jeiserem jei ga jena gane uskamswemini ane jei ga gangge erabana, negara jeiserem ga gane kabwaknowa. Ane ga enggam, afa angtane kotana daamfenna jep aa jei gangge nwinbenerem, afa wini yo anggwana jelem tannabaner aa jei gangge nwinbenerem jena daamfennaiserem jebe, afa jei jena jam gane uskamsweminennerem, waakenfer jam ge nwinbeyen, angtane jeiserem gwela jemna ga gam kabwakswemini.
26Afa bawas je bwata kapka gam suribene, jepga jei jen jena gam bitsona, ane baabeta jemna fas, ane taman-giri bawasmana ga gam kabwakswena.
27Afa Ai bwat kapka jam As surbobilirim Belsebulem baabeteme, afa ga gam jes gamserem, baabeta ga nanmana angtane aamei is jei ne onsobaabilirim, bwat kapka ga jem sene surbobili? Jei tousa jei bwat kapka fas jam ne surbobiyen Belsebulem baabeteme. Ga jem temawer, jemba mesam ge towaswebili enggame, Ai bwat kapka Ajam surbobiyen Belsebulem baabeteme. Aamei is jei ne tikwebaatinennerem jei game aa jewer ge gubilirim, jei jena mes ne gweraasona aamei syefer ga ima nasowena Am temawer.
28Jengga Ai bwat kapka ga Mafnana Uwa Sanbagirmana Jem baabetem ga Ajem surbobili. Ga jem temawer aamei imsa towaswena nunu Uwa Sanbagiri Jei aa jem nwinirim anggwabura seyafter gemerserem jem Sanbakfe, nunu jeiserem mes fortya imnibe.
29Angtane baabetyenaiserem jei jam gam gunurum jam kawetefe angtane baabetabaraiserem jem jenabe enggalfe apgal jigala gam komkomtababisif, jei angtane baabetabara gwanan ga jam gam tafresnenne. Jepga jei apgal jigala jemna ga gam komkomtababisini.
30Afa angtane As jam ne tikwebaatiyen, angtane jeiserem jei ginanggwana Amna. Angtane afa Ai As jam batobayanaye angtane nensa jam dupdupbulf Amnibe, angtane jeiserem jei ga enggalf gam eyebili angtane Amniwer gam ge nunggirbef.
31Ga jem temawer, Ai ims towastababili, angtane etam-etama jam gam eyebilirim, ane Uwa Sanbagirem temawer syefer aa jei gam nasowenaram, afa jei jam gam tikwenaram etam-etamawer, Uwa Sanbagiri Jei angtane jeiserem etam-etama jemna seyafter gemerserem gam wirulbono. Jengga angtane Mafnana Uwa Sanbagirmana Jem temawer nimnafer aa jei gam nasbilirim, Uwa Sanbagiri Jei etam-etama jemna jeiserem jam wirulboyon.
32Taterisi kapka angtane jes gane nasbilirim Am temawer Ai Tane Angtanemana, Uwa Sanbagiri etam-etama jeiserem gam wirtabaipmisini. Jengga angtane Mafnana Uwa Sanbagirmana Jem temawer syefer aa jei gam nasbilirim, Uwa Sanbagiri Jei etam-etama jemna jeiserem Jam wirulboyon, aas jepserem ane gamjon aa jep se falsaram Jei Jam wirulyon."
33Yesus gamjon ga balbabili, "Tini afa waakena jemna igi waakena; tini afa kapka jemna igi kapka. Tini ga igiwer igam domola, ga igam gunu aaga je ti.
34Aamei awas ufwai gemerserem: ini imna kapka, aamei im aaremawer ula waakena afa ijama bilteyan. Jes igma biltenaram aaremawer, jeiserem ga iniwer gam tawetya.
35Angtane waakena jei taterisi waakenaiserem ga jes gam nasbabili, aam temawer ini jemna buguf waakenaiserem jeme. Angtane kapkaiserem jei taterisi kapkaiserem ga jes gam nasbabili, aam temawer ini jemna buguf kapkaiserem jeme.
36Ai im towastababili, nunu umwef jemserem Uwa Sanbagiri angtane aa jem waksosisirim, angtane waakenfer eyebiliserem ane kabwakfer eyebiliserem jes mese, nunu jes jepserem Uwa Sanbagiri angtane seyafter gase tenebaabuwesa enggame, 'Aam je bafa ula kapka ga ima nasbabili?' Ane angtane ga sene tamawolbawesa.
37Afa imna ula waakena, Jei ijam tamtamtayan; afa imna ula kapka, Jei is tamtamtasa."
38Jewer ga angtane safna Farisimana afweraiserem ane guru-guru afweraiserem Hukumu Nabi Musa aa jes tulistababilim, jei Yesus ga aane bala, "Guru, ai enggam aya gunu bwembwem asa domolf Ijes eyebilirim, ai gemer asa towaswena Uwa Sanbagiri Jei Ims baftana."
39Yesus ga tamawolbaabili, "Aamei ijeya gwenaram namwer aa jep falaram, aamei angtane kabwaksusu, Uwa Sanbagirminiwer imesa nunggirbabili bijua. Aamei As ima bala Ai bwembwems eyebif, jengga Ai Ajam eyebiyen. Aamei bwembwema daamfenna tefner isa domola, bwembwema fwater aa je etamwelam Nabi Yunusminiwer.
40Yunus jei nunu nawer-ningna ane gwini nawer-ningna jigala unggwandusa jem uftonap. Jes galserem Ai Tane Angtanemana, Ai tonmwa bitis mwonabe ga Ase faliton nunu nawer-ningna ane gwini nawer-ningna.
41Gwanan-gwanansus gamjon jepserem, angtane kota Niniwe je aa jei ge nwinbelem, jei aa galap ne sarbilim taterisi Nabi Yunus aa jes nasbilim, angtane Niniwemana ga ge tikwebil etam-etamawer, jei ga waakenaiserem ga jes ne eyebil. Ane namwer aas jepserem Ai aare, Aiba igsusum Nabi Yunusminiwer. Jengga aamei namwer ijeya gwenaram, aamei taterisi Amna imsa sarbili, jengga aamei etam-etamawer ijama tikweyan. Jega jem temawer nunu umwef jemserem Uwa Sanbagiri angtane aa jem waksosisirim, angtane waakenfer eyebiliserem ane kabwakfer eyebiliserem, angtane kota Niniwemana jei terewer ga sege irwebisi ibaner, aamei ga isene balbabisi, 'Aameiba angtane etam-etamabaram, etam-etama kapka imnaiserem je unggwanfersus.'
42Fwater-fwatersus wini sanbakfe aa jei nwinim negeri Selatanminiwer, jei ga enggalf sofna bijaususube, taterisi Raja Salomomanaiserem gam sarbif. Taterisi jemna waakensusu, jei seyafter towaswel. Wi sanbaka jeiserem jei taterisi Raja Salomomana ga sarbil, ane ga onsobil. Ane namwer aas jepserem Ai aare, Aiba igsusum Raja Salomominiwer. Jengga aamei namwer ijeya gwenaram, aamei taterisi Amna ijama onsobiyen. Jega jem temawer, nunu umwef jemserem Uwa Sanbagiri angtane aa jem waksosisirim, angtane waakenfer eyebiliserem ane kabwakfer eyebiliserem, wi sanbaka jeiserem terewer gase irwesa ibaner, aamei ga is balbabisi, 'Aameiba angtane etam-etamabaram, etam-etama kapka imnaiserem je unggwanfersus.'"
43Yesus seisya taterisi ga jes nasbabili enggame: "Bwat kapka angtane jame aa galap mirtetefalaram, bwat kapka jeiserem ga wofena ona serteraiserem jebe enggalfe, tampata jep nwiniserem ga jes terelbili, jengga jei masef tampata fas jam domolyan.
44Ga jem temawer jei ga gutena, 'Ai gamjon jam age warau jena gwanan ai ajes miruluntum jebe.' Jei jame aa galap fornaram jena jeiserem jebe, jei jena jeiserem ga domola, jena jeiserem ja teten, ga waakensusu, oltunu fas.
45Jepga jei ga sofna, bwat kapka ga tuju afweraiserem jes kitulnonofe, ane ga aftabifeltye. Bwat kapka afwer jeiserem, jei kakalsusu jemniwer. Ane jepga jei seyafter ga aa ge kabwitena angtane jeiserem jem inibe, ane jep ga aa ge nwinbene. Angtane jeiserem gwela jemnaiserem gwanan jes jepserem je kapka, jengga gamjon aas jepserem gwela jemnaiserem je kabwak-kabwaksusu. Jeiserem ga is etamwemini ibe, aamei angtane etam-etamabara ijeya gwenaram namwer aa jep falaram. Etam-etama kapka imnaiserem je unggwanfersus."
46Yesus aa gemer nasounaram angtane unggwanfer jeiserem, Yesusem eneserem ane Jelem oson mesna sitawer ge fibitne, Yesusfar ge nasbawef.
47Angtane daamfenna ga Yesus bala, "Iye ane oso Imna mesna jei sitawer ge fibitne, jei Ibara nasowef."
48Yesus angtane jeiserem ga bala, "Iye Amna jei nansa? Ane oso Amna jei nansa?"
49Jepga Yesus ga destabaabili angtane Jei aa jei ne tikwebaatinennerem, ane ga balbabili, "Angtane aaiserem jes mese jei iye ane oso Amna.
50Angtane aa jei gam eyebilirim Uwa Amna taman waaken-giribe aa gam gunurum, angtane jeiserem jei ga iye mese oso Amnaiserem, bunar-bunarsusfer ga jes."