Alkitab Mobile SABDA
[VER] : [BERIK]     [PL]  [PB] 
 <<  Matius 13 >> 

1Nunu jes jeterserem Yesus Jei jena ga mirultefala, jepga foboga binfip ga nwintetna.

2Jepga angtane unggwanfersus ga aa ge forobitye, jam eterbiyen. Jega jem temawer Yesus ga juswena atdusabe, Jei jep ga nontena. Ane angtane unggwanfer jeiserem jei fo eyep ge fibili.

3Ane jepga Jei seisya taterisi unggwanfer ga nasbabili. Jei aa galap nasbabilirim, Yesus ga balbabili: "Angtane makan anggwana jam gam sofnaram enggalfe twam tanna gam tonolf makanabe.

4Jei twam tanna jam aa galap gam fasawolnannaram, twam tanna afweraiserem ga nelep gangge janbili. Jepga junu ga gangge forobitye, ane twam tanna jeiserem ga gane tombaabili jamer bar.

5Ane afwer ga ona tunabaraiserem ga jep gangge janbili, jep ona unggwanfer fas. Twam tanna jeiserem ga gangge kokosbili tatarmer, aam temawer ona bastowaifer.

6Jengga gwer kakala jam gam anggasyetyaram, twam tanna kokosa jeiserem ga gangge werenswebili, ane ga gangge sasanswebili, ga gangge terbili, aam temawer tarna uskambarsus jam ge kabwiteyan onabe.

7Ane twam tanna afwer ga ona tini utuboroserem ga jep gangge janbili. Tini utuboro jeiserem jam gangge kokosbilirim jamere unggwan-gwansus, ane twam tanna jep aa jei gangge kokosbilirim ga gam matabili, jamer twam tanna kokosa jeiserem ga gangge aralakswebili.

8Ane twam tanna afwer ga ona waakenaiserem jep gangge janbili, ga aa ge kokosbili jamere aa ge unggwan-gwanswebili, ane igiserem ga aa ge taabili. Igi aa jei ge taabilirim afwer ga 100 gemer ge taabili, afwer ga 60 gemer ge taabili, ane afwer jeiserem jemna 30 gemer ge taabili."

9Seisya taterisi jeiserem jama tabanulurum, Yesus ga gunu, "Afa aamei imwanabara, taterisi Amna As jam isa saribene, ane waakensusfer isa towaswebili."

10Angtane Yesus aa jei ne tikwebaatinennerem ga ge jalbili Yesusminibe, ga aane tenebana, "Aam je bafa angtanefe seisya tateris tefner Im nasipmini?"

11Yesus ga tamawolbaabili, "Taterisi nunu Uwa Sanbagiri Jei aa jem nwinirim anggwabura seyafter gemerserem jem Sanbakfe, Uwa Sanbagiri taterisi jeiserem jemna igiserem Jam towasulmiyen angtanefe jamer abaka. Jengga namwer aas jepserem Uwa Sanbagiri Jei waakena Jelemanaiserem ibe is mesam kitulmini, jega enggalf aamei taterisi jeiserem jem igiserem gam isa towaswena. Jengga angtane afwer jeiserem Uwa Sanbagiri taterisi jeiserem jem igiserem Jei jam ge saamisiyen.

12Angtane taterisi Amna aa jei sarbisinirim ini waakenaiserem jeme, ane taterisi Amna gase taabili, angtane jeiserem jei gamjon Taterisi Waakena jem temawer gase sarbisini waakenfersus, jega jei unggwanfersus gase sarbisini. Jengga angtane baif gwelaiserem jam sarbisife, Uwa Sanbagiri Jei se amsonbana jemniwer, jei aa jes towaswebilirim bastowaifer jeiserem.

13Ai seisya taterisi Ajetefener nasipmini angtane unggwanfer jebe, aam temawer jei safe jam gangge anggabisini, jengga jei jam ne domolyan. Jei safe jam gane sarbili, jengga jei jam ne sarbiyen, ane jei waakenfer jam ne towaswebiyen.

14Angtane aaiserem jemnip aa jei etamwenaram, jeiserem ga Nabi Yesaya aa jes nasbilim jam etamwefe ga jei tabanwena. Nabi Yesaya enggam gul: 'Uwa Sanbagiri ga balbabili: Aamei iner isa sarbisini jamer abaksusu, jengga aamei ijama towaswebiyen. Aamei iner isa anggasini jamer abaksusu, jengga aamei ijama towaswebiyen.

15Angtane jeiserem ini jemna ga kubanem ge folbamini; imwana jemna mat, jei bai jam sarfe; nwena jemna kof, jei bai jam anggafe. Afa jei nwena jam motsosiyene, jei gam domola; afa jei imwana jam motsosiyene, jei gam sara; afa ini jemna kubanyana, jei gam towaswena. Ane jei ga gam ge waraubitne Amnibe, ane Ai ga angtane jeiserem Agam waakentababili.'

16Ini imna is waakenfer sege folbamini, aam temawer aamei waakenfer imsa anggasini, aamei waakenfer imsa sarsini, ane aamei waakenfer imsa towaswena.

17Ai bunarsus ims towas-towastababili, nabi fwatermanaiserem ane ga angtane aa jei ne eyebilim Uwa Sanbagiri aa gemer gam gunurum, jei uskambar ga aa ge gubil enggalfe jeiserem jam ne domolf aamei namwer ijesa domolaram, jengga jei fas jam ne domolyan. Ane jei jam ne sarbisif aamei namwer ijesa sarbilirim, jengga jei fas jam ne sarbisiyen."

18Yesus gamjon ga balbabili, "Imsa sarsi! Seisya taterisi twam tan manggen tonolaiserem, jem igiserem ga enggam.

19Angtane aa jei gam sarbilirim taterisi nunu Uwa Sanbagiri Jei aa jem nwinirim anggwabura seyafter gemerserem jem Sanbakfe jem temawer, jengga jei taterisi jeiserem waakenfer jam sarbiyen, angtane jeiserem jei ga enggala, twam tanna aa je ge janbilirim nelebe ga jes galserem. Bawasa ga aa jela, ane taterisi jei aa jes sarbilirim ga amsonbana jem iniwer.

20Twam tanna aa je ge janbilirim ona tunabaraiserem jebe, jeiserem ga enggam: Angtane taterisi Uwa Sanbagirmana aa jei gam sarbilirim, ane tatarfer ga gam taabili ini saaser-saasereme.

21Jengga taterisi jeiserem jelem inibe waakenfer jam eganulsiyen, jei namwenefener gam tebana. Jepga afa jei kabwaktala jam gam domolaram, afa jei ga aane tamtamtababili aam temawer jei taterisi Uwa Sanbagirmana mes ne taabili, jei taterisi jeiserem tatarfer ga gam dirinswebili, ane jei gamjon ga gangge waraubili etam-etama jelemanaiserem jebe.

22Twam tanna aa jei gangge janbilirim ona tini utuboroserem jem nenennabe, twam tanna jeiserem ga enggam: Angtane taterisi Uwa Sanbagirmana aa jei gam sarbilirim, jengga ini jemna jam gam eseswebanaram gwela ogiri aaiserem jem temawer, ane doim temawer. Jei ini enggam gam folbana, apgal jigala unggwanfer gam damtabif. Jega jem temawer taterisi Uwa Sanbagirmanaiserem jei aa jes gam sarbisinirim ga jem gam mastabili jelem inibe, jamere jei taterisi jeiserem jam taabiyen.

23Ane twam tanna aa jei gangge janbilirim ona waakenabe, je ga angtane enggalaiserem: Angtane taterisi Uwa Sanbagirmana waakenfer aa jei gam saribenerem, ane jelem inip waakenfer ga gam eganulsini. Jei waakena tefner ga gam eyebili jamere waakenaiserem jam gam taabili, igiserem afwer ga 100, afwer 60, afwer 30."

24Yesus seisya tateris nafsiserem ga nasbabili angtane unggwanfer jem tarnabe enggame: "Nunu Uwa Sanbagiri Jei aa jem nwinirim anggwabura seyafter gemerserem jem Sanbakfe, nunu jeiserem ga enggam fala taterisi aaiserem twam tanem temawer gamserem: Makan anggwana gandum tanna jelem makanap jam tonola gamserem.

25Ona aa gitgitswelam, angtane seyafter ga jam ge tabal, makan anggwana jeiserem jemna ginanggwana ga foryal. Jei sasfan tanna ga tonola gandum tanna jem sagabe, ane ga sofna.

26Gandum tanna jame aa galap ge kokosbilirim, ane tanna jame aa galap ge taabilirim, jepga aa ge anggabili sasfanayo gandumu.

27Ane angtane awelna makan anggwamana aa jei ne gweyibenerem, jei ga aa ge jalbili makan anggwaminibe, ane ga aane bala, 'Uwa, ai aya gunu aameiba gandum tanna i waakena gam tonola makanabe. Jengga sasfana je fwer ge jalbili?'

28Makan anggwana jeiserem ga gam tamawolbaabili, 'Jeiserem ginanggwam tafam ne eyebaabili.' Jepga angtane awelna jemna aa jei ne gweyibenerem gamjon gane tenebana, 'Uwa, aamke baiyan ai ajama gwina makanap, ane sasfana ga asa mulsini?'

29Jei ga gutena, 'Wowo. Afa aamei sasfana jam isa mulsini, gam jega gandum mese isa mulsini.

30Safnant. Gwanan je ge fibi jamer tanna sege taabili. Galap ai angtane aa jei ne fulurum as balbabili, gwanan sasfan isa dupdupbulu, ane ga isa fwirna, ga isa gwalansini. Jewer jon ga gandumu ga isa dupdupbulu, ane ga isa gwetaantena makan jenap.'"

31Yesus seisya tateris gamjon ga nasbabili, jega angtane waakenfer gam sege sarbili enggame, angtane Uwa Sanbagirem gwonap aa jei naawelaiserem ba sege etamwebili unggwanfersus. Yesus ga enggam nasipmini angtane unggwanfer jem tarnabe: "Nunu Uwa Sanbagiri Jei aa jem nwinirim anggwabura seyafter gemerserem jem Sanbakfe, nunu jeiserem ga enggam fala taterisi aaiserem eremu tanem temawer gamserem: Angtane eremu tanna bastantouya gam goltena, ane jelem makanap ga gam tonola.

32Eremu tanna jeiserem safe bastantowaisus, jengga jam gam kokosaram, ane jam gam unggwanswenaram, jeba unggwandwasusu. Ane ga gam etamwena tini unggwandwasfe, jega tini jeiserem jem tirnibe junu ga gola jep ga gane eyebaabili."

33Yesus Jei seisya taterisi gamjon nensaiserem ga nasbili angtane unggwanfer jem tarnabe enggame: "Nunu Uwa Sanbagiri Jei aa jem nwinirim anggwabura seyafter gemerserem jem Sanbakfe, nunu jeiserem ga enggam fala taterisi aaiserem roti tanem temawer gamserem: Wini roti tan bastantowaifer aa galap tetelam, ane tepungu unggwanfer ga enggammer empat pulu liter waakenfer jebaner ga dupdupbulu. Roti tanna bastowaifer jeiserem tepungu unggwanfer ga je gam gwebili jam taweyafe, jepga rotife ga gam etamwena."

34Yesus Jei seisya taterisi angtanef ga jes towas-towasulmini. Jei jeber-jeber Jam gam towas-towastababilirim, Jei ga seisya tateris tefner gam nasbabili.

35Yesus Jei jes gemerserem ga gam towas-towastababili, jega nabi aa jes nasbilim gase tabanwena: "Ai seisya taterisi Ajebara nasbabif; Ai tateris Ajam nasbif, taterisi Ajes syawulsilim ogiri gwanan aa galap eyebalam."

36Jepga Yesus angtane uskambar jeiserem ga mirtebitefala, jenap ga kautena. Angtane Jei aa jei ne tikwebaatinennerem ga aa ge forobitye Jemnibe, ane ga aane bala, "As nasipmi seisya taterisi sasfana makanabaraiserem jem igiserem jem temawer."

37Yesus ga tamawolbaabili, "Angtane gandum tanna waakena aa jei gam tonolaram, jei Tane Angtanemana.

38Makana jeiserem, je ga ogir. Gandum tanna waakena jeiserem je ga angtane Uwa Sanbagiri aa jes gam bilirim jeiserem aa jei gam eyebilirim. Ane sasfana jeiserem, je ga angtane aa jes gam eyebilirim bawas aa jes gam bilirim jam eyebife.

39Ginanggwa sasfana aa jei ne tonolaram jei ga bawas. Nunu gandumu aa jep ne targabaabisinirim, je ga nunu ogiri umwef jepserem ga jes. Angtane aa jei ne fulurum jei ga malaikat.

40Nunu ogiri aaiserem jem umwef jepserem jei ga enggam se falsa, sasfana jeiserem aa gemer gane gerentababisinirim, ane ga gane giranbaabisini tokwanabe ga gemer.

41Ai Tane Angtanemana Ai ga malaikata Amna ga As balbabisi, 'Sa sofwe angtaneminip, angtane nafsi aa jes ne balbabilirim etam-etama kapka jes eyebif. Angtane kapka jeiserem ga isa dupdupbulu angtaneminiwer, angtane Uwa Sanbagirem gwonap aa jei naawenaram, Uwa Sanbagiri ga jem Sanbakf se nwini. Ane angtane etam-etamabaraiserem jegme isa dupdupbulu!'

42Malaikata jeiserem jei angtane jeiserem ga sene fasawolwili taman tokwagiribe. Jep ga angtane ga sege syebinense, ga sene enolsa siginsusu, ane ini jemna uskambar ga jam sege jenbamisi.

43Ane angtane Uwa Sanbagiri aa jes bilirim aa jei ne eyebilirim, jemna nafa enggam ga sege folbamini gwere galserem, ogiri ibirmi Uwa Sanbagiri Jelemanaiserem jebe. Afa aamei imwanabaraye, taterisi Amna aaiserem ga As jam isa saribene, ane waakenfersus ga isa towaswebili."

44Yesus gamjon ga balbabili, "Nunu Uwa Sanbagiri Jei aa jem nwinirim anggwabura seyafter gemerserem jem Sanbakfe, nunu jeiserem ga enggam fala taterisi aaiserem gamserem: Angtane jei galgala waakenaiserem, hargana uskambar ga makanap sitabaabisini. Jepga angtane jeiserem ga ter. Jepga angtane nafsi galgala waakenaiserem jep ga damtabili, gamjon aa matabaabistena, ini jemna saaser-saasersus. Jepga galgala jemna ga seyafter ga jualtababili, jega makana jeiserem ga armantal."

45Yesus gamjon ga balbabili, "Nunu Uwa Sanbagiri Jei aa jem nwinirim anggwabura seyafter gemerserem jem Sanbakfe, nunu jeiserem ga enggam fala taterisi aaiserem mutyaram temawer gamserem: Angtane tokonabaraiserem, jei mutyara waakena gam terelbaabili. Mutyara jeba inanaisam jemna hargana doini unggwanfer.

46Jei mutyarna waakensususerem jame aa galap domolaram, mutyarna jeiserem ga unggwan-giri, ane jemna hargana unggwanfer, jei tatarfer galgala jemna seyafter ga jualtababili, ane mutyarna jeiserem ga armantal."

47Yesus gamjon ga balbabili, "Nunu Uwa Sanbagiri Jei aa jem nwinirim anggwabura seyafter gemerserem jem Sanbakfe, nunu jeiserem ga enggam fala taterisi aaiserem jalam temawer gamserem: Angtane jigala aa jei gane tawanbinennerem, jei jalna unggwandusa ga jam gane daktabisini foboganabe, jigala nafis-nafsiserem ga aane damtabili.

48Jalna jame aa galap tenbityerem, angtane jeiserem jei jalna ga aane goltena, tufawer ga aane gwirinfele. Ane ga aa ge nwinbetena, jigala ga aane syentabaabisini. Waakenaiserem jei burnap ne bokolntena, ane kapkaiserem jei tokwanap ga aane giranbaabisini jamer fus.

49Jeiserem je ga nunu ogiri aaiserem jam umwef jepserem ga jes gamserem. Malaikata ga sege forobitye, ane jei angtane etam-etamabaraiserem ane angtane Uwa Sanbagiri Jei aa jes bilirim ga sene waksosini.

50Angtane etam-etamabaraiserem ga sene fasawolwisi taman tokwagiribe. Jep ga angtane ga sege syebinense, ane ga sene enolsa siginsusu, ane ini jemna ga uskambar sege jenbamisi."

51Yesus ga tenebaabili, "Aamke taterisi Amnaiserem seyafter ke imsa towaswebili?" Jei aa ge tamawolbili, "Maa."

52Yesus ga balbabili, "Afa ga gam, gam jega guru-guru afweraiserem Hukumu Nabi Musa aa jes tulistababilim, jeiserem aa jei ne towas-towastababuwenaram, jei namwer Ai As jam sene tebanaram, ane jega jem temawer jei Uwa Sanbagirem gwonap gase naawena, ane Uwa Sanbagiri Jei ga jem Sanbakf nwini. Guru-guru jeiserem jei ga angtane aas galserem ga gala: angtane galgala fwatermanaiserem ane galgala ibirmiserem aa jei gam gwaasaasinirim galgal jenawer. Guru-guru jeiserem taterisi fwatermana Uwa Sanbagiri aa jes gam bilirim jei tousa. Ane jeime taterisi ibirmi Amnaiserem jes mese ga waakenfer ne towaswebili."

53Yesus Jei seisya taterisi aa galap tabanulurum jam nasipmiliwer, Jei tamna jeiserem ga mirsotefala.

54Jei ga warauwa Jelem tamnabe. Jepga angtane ga towas-towastababili jena angtane Yahudimana aa jep ge betwebuwefaram jebe. Ane angtane ga jam ge bitbitwebili jei taterisi Jemna jame aa galap ne saribenerem, ane ga aa ge gubili, "Angtane aaiserem Jei tousaiserem jeiserem fwer domola? Ane Jei baabeta ga fwer domola bwembwema jem gam eyebife? Nei enggam neya towaswena, Jei aa jes eyebilirim, jeiserem jengga Uwa Sanbagiri Jener gam eyebili.

55Yesus Jei ke angtane jena aa jei eyebaabuwenaram jem tane? Ene Jemna jei ke bosna Maria, osona Jemna jei ke bosna Yakobus, Yusuf, Simon, ane Yudas?

56Jemna osona yafontowai jei nebar ne seyaftera nwini. Nei teisyena Jei fwer taabili seyafter aaiserem."

57Jei Yesus jam ne sarbayan, ane jam ne tebayan, ane jepga jei ga aane nasbana. Jepga Yesus ga balbabili, "Afa angtane nabi Uwa Sanbagirmanaiserem jei jam gam nasbili, angtane seyafter ga jes gane sarbasini. Jengga angtane nabif gwelaiserem jelem tamnabe, ene jeta, ayana yo osona jemna, jei jam ne sarbayan."

58Angtane jei taterisi Yesusmanaiserem jei jam ne taabiyen, jega jem temawer Yesus Jei bwembwema tamna jeiserem jep Jam eyebiyen.


  Share Facebook  |  Share Twitter

 <<  Matius 13 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel