Alkitab Mobile SABDA
[VER] : [BERIK]     [PL]  [PB] 
 <<  Matius 14 >> 

1Jes jepserem Raja Herodes jei angtane sanbakef nwini ona Galileya je. Herodes jei taterisi Yesusem temawer jame aa galap sarbilirim,

2jei angtane awelna jemna aa jei ne gweyibenerem enggam ga gubili, "Yesus Jei bunar-bunarsus ba Yohanes Pembaptisam aa jei irwenaram terewer! Jega jem temawer Jei ga bwembwema samfer eyebili."

3Muara gwanan galapserem Herodes jei wini osonemana gam gula. Osona jemna bosna ga Filipus, ane wini jeiserem jemna bosna ga Herodyas. Yohanes Pembaptis jei Herodes ga bala, "Jeiserem kapka, aamei wini jeiserem ijewer gularam." Jega jem temawer Herodes jei angtane ga baftabili enggalfe Yohanes gam ne tebaf, ane ga sene taferna, ane bwiyip ga sene gaataantena. Herodes jei Yohanes jam munbof, jengga jei angtane Yahudimanaiserem ga jes erebaabili, aam temawer angtane jei enggam ga aa ge gubili, "Yohanes jeiba nabisam."

4(14:3)

5(14:3)

6Nunu masara Herodes aa jem surulum, tane yafontowaya Herodyasmanaiserem ga jela. Ane jei jep ga tesarabili angtane masarap aa jei ge forobityerem jem tarnabe. Jega jem temawer ini Herodesmana gam saaser-saasersusfer gam folbafe.

7Jei tane yafma jeiserem ga jes bili enggame, "Aamei is amsam golstenna, aamei apgal jigala jes igam bilirim jam taabife, ai apgal jigala jeiserem is agam golbili."

8Eneserem jei ga yafmaiserem ga jei bili. Ane yafmaiserem jei ga ula enemana ga onsoibili, ane jei Herodes ga bala, "Abe duka Yohanes Pembaptismanaiserem jes is golbili pirnibener!"

9Raja ula jeiserem aa galap sarbilirim, ini jemna ga jenbana, aam temawer jei gwanan jena mes gaarstenanna angtane unggwanfer jepserem jem tarnabe, ane afa jei ula yafmemana jam onsobiyeneye jei gase sefersona. Jega jem temawer jei ginanggwana jemna ga balbabili, "Aamei tane yafma aaiserem jei aa jes bilirim, jeiserem gasa eyebi!

10Aamei duka Yohanesmanaiserem ga jam isa targabaasini!" Ane jei duka Yohanesmana ga aane targabana bwiyibe.

11Ane duka jeiserem ga pirnibener ga aane gwirinwena, tane yafma jeiserem jepga aane golbili. Ane tane yafma jei ga gwirinfele jelem eneminibe.

12Jepga angtane Yohanes aa jei ne tikwebaatinennerem ga aa ge jalbili, Yohanesem futunu ga aane gaartena, ane ga aane girinfele jam tirnnufe tonmwa bitisibe. Jewer ga aa ge sofobili, ane Yesus ga aane towastana.

13Yesus Jei taterisi jeiserem jame aa galap sarbilirim aa jei etamwenaram, Jei tamna jeiserem ga mirsotefala atdusame, ga gwina taman tetenabe. Angtane uskambar ga ge sarbili Yesus mes gwina, jei tamna jemna ga aane mirsotefala, ane Yesus ga aane onsobana tufawer.

14Atdusa Yesusmana jam aa galap batuwilirim, jepga Yesus ga jutetya, jewer ga angtane unggwanfer ga damtabili. Yesus angtane jeiserem ga nesiktababili, ane angtane bwernabara jepmana ga waakentababili.

15Ona jame aa dafwenaram, angtane Yesus aa jei ne tikwebaatinennerem jei Yesusminip ga aa ge jalbili, ane ga aane bala, "Tampata aaiserem tamanfenna, ane ona jama towaiwenaram jam gitgitswefe. Angtanes balbabi jei gangge sofobi, jei tumilgala ga sene armantababili tamnabe."

16Yesus ga balbabili, "Jei safnant. Jei jam ge sofwebiyen. Tumilgala jebe aamei sa kitulmi!"

17Jei Yesus ga aane bala, "Amnibe aafe rotini tafna gwiri ane jigala ga naura, ga jenefener ge falbili."

18Yesus ga balbabili, "Au, sa erbiyel Amnip!"

19Jepga Jei angtane unggwanfer jeiserem ga balbabili, "Sa nwinte kakatar sagap!" Yesus Jei rotini tafna gwiri ane jigala naura jeiserem ga tebabili, ane jewer ga taman waaken-girip ga anggaswena, ane Uwa Sanbagiri ga bala, "Ase samfer gulbana." Jepga Yesus Jei rotini ga bitabaabisini, ane ga kitulmini angtane aa jei ne tikwebaatinennerem jebe. Jewer ga gamjon ga aane kitulmini angtane unggwanfer jeiserem jebe.

20Angtane seyafter jep gemerserem ga dwena jamere unubuguf. Gamjon ga tomna bitbitiserem ga aane dupdupbulu, burnabara ga dua belas.

21Anggwana jep aa jei ne dwenaram unggwanfer ga 5.000 anggwa. Wi tane seyafter jebar jep aa jei ne dwenaram, jam ne ertebiyen.

22Jepga Yesus ga balbabili angtane Jei aa jei ne tikwebaatinennerem, "Sa jusya atdusap, ane ga is danna fobogana jimwer!" Jepga Jei ga balbabili angtane uskambar, "Aamei jasa warau!"

23Angtane uskambar aa galap ge sofobilirim, Yesus ga tawena otumube, Uwa Sanbagirfe sembayanga jam gwebabafe. Gwini mes fortya, Yesus Jei Jener Jei otumup,

24jengga atdwas angtane aa jei ne tikwebaatinennerem je maa, mes bijauswena onnawer. Muru unggwansusu anesus atdusa jeiserem ga irfifulu, aam temawer nindaya unggwanfersus ne gwebana.

25Ona fom nafwela jengga gwini gemer, Yesus jemnip ga jela. Jei foboga sagap wofentena.

26Angtane Jei aa jei ne tikwebaatinennerem jei Yesus aa galap ne damtanaram Jei fo sagap wofentena, jei uskambar ga aa ge erebili. Jei enggam ge gubili, "Jeiba spoksam!" Jei ga aa ge erebili, ane ga aa ge gwarenbuwena.

27Jengga jes jeberserem Yesus ga balbabili, "Sa tikwe, ipsama ernerem! Ai aare."

28Petrus ga tamawolbana, "Tuhan, afa Aamei bunarsus Yesuse, as Im bal fo sagstamer gama ge gwi jamer Imnibo."

29Yesus ga bala, "Au!" Jewer ga Petrus atdusawer ga jutena, ane fo sagstamer Yesusminip ga gwina.

30Jengga nindai uskambar aa galap domsonaram, jei ga erne, ga towaiwena fonap altife, ane ga gwaren-gwarenwena, "Tuhan, as teba waakenfer!"

31Yesus ga tatarfer tafna Petrusmana ga taayimbene, ane ga dektetena. Yesus ga bala, "Aamei Asi bastowaifer im tebana. Aam je bafa baabeta Amna unggwandusaiserem ijam taabiyen?"

32Jei aa galap ge juswenaram atdusabe, nindaya ga aane tiknebana.

33Jewer ga angtane atap aa jei ge nwinbetenaram, jei Yesus ga aane pujitene. Jei enggam ne bala, "Bunar-bunarsus Aamei Tane Uwa Sanbagirmana."

34Yesus ane angtane Jei aa jei ne tikwebaatinennerem aa galap ge forobilirim foboga jimwer, ona ga Genesaret ga jep ge batobili.

35Angtane jepmanaiserem ga aa ge anggabili enggame aa jei fortyaram Jeiba Yesusam. Ane jei angtane ona jepmana seyafter gemerserem ga aane towas-towasulmini. Jepga angtane bwernabara seyafter gemerserem Yesusminip ga aane aftabifelwetya.

36Jepga Yesus ga aane balbalwena enggame, "Ai ke samfer fene Imna fwesapfener asa ensobana?" Ane angtane bwernabara seyafter fene Jemna aa jei ne taayimbowenaram, jei ga aa ge waakenswebili.


  Share Facebook  |  Share Twitter

 <<  Matius 14 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel