Alkitab Mobile SABDA
[VER] : [BERIK]     [PL]  [PB] 
 <<  Matius 26 >> 

1Yesus aa galap tabanulurum taterisi seyafter jeiserem aa jes towas-towasulminirim, Jei angtane Jei aa jei ne tikwebaatinennerem ga balbabili,

2"Aamei tousa nunu gamjon ga naura masar Paskana gase fala. Ai Tane Angtanemana, Asene gerfa angtaneminibe, ane jei ga Asene munbofo ti salibibe."

3Jes jepserem angtane imam-imam sanbakaiserem ane angtane sanbaka Yahudimana, ga aa ge betwebili jena unggwandusa Kayafasmanaiserem jebe. Jeiba imam sanbagirsususerem.

4Jei ula jewer ne tagalsif Yesus basyamer jewer ne tebafe, ane gam ne munbof.

5Jengga enggam ga aa ge gubili, "Masara aaiserem jepyan, aam temawer afa nei Yesus namwer Jam nesa tebanaram jam munbofe, angtane seyafter ga sege kakalswebili, ane ga sege erebili."

6Yesus aa galap nwinirim tamna Betanyaminibe, Jei Simonem jenap nwini. Simon jei mes waakenswena tifin bwerna unggwandusa aa jei folbanaram jewer.

7Yesus Jei Simonem jenap aa galap twenaram, wini aasaje ga jela Yesusminibe. Jei botola tuna pualamawer eyebiliserem ga jes gwirni. Botolap aa jei falitonom minyaka jemna ninsini ga waakensusu, jemna hargana unggwanfer. Wini jeiserem jei Yesus dukap ga sukutono minyaka jeiserem jeme.

8Angtane Yesus aa jei ne tikwebaatinennerem jei ga aane domola wini jeiserem aa jes eyebilirim, ane ga aane nasbili, ane ga aa ge gubili, "Enggam je kapka minyaka jam suwulsiriserem.

9Minyaka jeiserem jemna hargana uskambarsus. Waakena jengga enggam, jei minyaka jeiserem gam jualtana, ane doini jeiserem ga angtane galgalyenaiserem ga jep gam kitulmini."

10Yesus Jei ini jemna mes towaswebaipmini jei aa gam ge gubilirim, ane Jei enggam ga balbabili, "Aamei wini aaiserem jem temawer kapkaiserem ijama nasbiyen. Jemna awelna jeiserem jei samfer eyebili Amnibe.

11Angtane galgalyenaiserem jei jeber-jeber ibar ima nwinwena, jengga Ai ibar abakef seyafter nejama nwinweyan.

12Minyaka jame aa galap suwulntenaram Am tifinibe, jei ga Ams menetaasini Ai tonmwa bitis jafner Agam falinonf.

13Ai bunarsus ims towas-towastababili, Taterisi Waakenaiserem ogirip aa jep ne nasbinennerem, wini aaiserem jei Ap aa jes eyeibenerem, taterisi jeiserem angtane sene nasbinense enggalfe wini aaiserem gane sarbistaabonf."

14Jes jepserem angtane dua belas Yesus aa jei ne tikwebaatinennerem, angtane aasaje daamfenna jemniwer, bosna jemna ga Yudas Iskaryot, jei ga sofwa angtane imam-imam sanbakaiserem jemnibe,

15ane ga tenebaabili, "Afa ai Yesus ip jam isas gaarminirim, aamei as bas isa gulbana abe?" Ane doini tiga pulu perak ga aane eterbili jemnibe, ane doini tiga pulu perak jeiserem ga aane kitulbono Yudasfe.

16Jes jepserem Yudas jei ga towaiwena dwona ga aa terelbili enggalfe jei Yesus jep jam gaarmife.

17Nunu nabal-nabalsusu jemserem masara Roti Tanyana jem Tombaabif aa jem falaram, nunu jes jemserem angtane Yesus aa jei ne tikwebaatinennerem jei Yesusminip ga aa ge jalbili, ane ga aane tenebana, "Jena ga fwersa Aamei Ijep gunurum, ai tumilgala Paskamana Ibe Is ajeba menetabaibaasife Aamei Ijes tombaabiliserem?"

18Yesus ga tamawolbaabili, "Kota Yerusalemwer sa sofwe, ane anggwana daamfenna nem tousaiserem jebar ga isa nasowetna. Ga enggam isa bala, 'Guru ga enggam gunu, Ai Ajep tereserem mes gwetmanswena. Ai ane angtane Amna As jei ne tikwebaatinennerem, Ai Paskana jebar sa gwebili im jenabe.'"

19Jepga angtane aa jei ne tikwebaatinennerem ga aane eyebili Yesus aa gemer bilipminirim, ane jei tumilgala Paskamanaiserem ga aane menetulsini.

20Ona aa gwinswelam, Yesus ane angtane dua belas Jei aa jei ne tikwebaatinennerem ga aa ge nwinbetena jam dwenfe.

21Jei aa gemer dwenaram, Yesus jepga balbabili, "Ai bunarsusfer aamei isa Ajam towas-towastababili, aamei aas ijeya nwinirim, angtane daamfenna imniwer jei Ai As jei se gera ginanggwaminibe."

22Angtane Jei aa jei ne tikwebaatinennerem jei taterisi jeiserem jame aa galap ne sarbilirim, ini jemna unggwanfersus ga aa ge jenbamini. Ane jepga Yesus daamfen-daamfennem ga aane tenebawena, "Tuhan, Aamei angtane Ijes balaram, bunarsusfer ga nansa, ke ai?"

23Yesus ga tamawolbaabili, "Angtane rotini Ajebar ge ustababitowenaram mangkonabe, angtane jeiserem jei Ai ga As jei se gera ginanggwam tafnabe.

24Ai Tane Angtanemana, As tere aa gemer tulisulum Taterisi Uwa Sanbagirmanaiserem jebe. Jengga galap kapka unggwandusa se etamwebafa angtane Ai aa jei geraram jemnibe. Afa angtane jeiserem jam suruyonaiserem, jei samfer."

25Jepga Yudas, angtane Yesus jei geraiserem, ga gunu, "Nansa, ke ai Guru, Aamei Ijes balaram?" Yesus ga tamawolbana, "Bunar, ba aameisam."

26Jei jame aa galap dwenaram, Yesus Jei rotini ga goltena, ane Uwa Sanbagiri ga bala, "Ase samfer gulbana." Jepga Jei rotini jeiserem ga bitabaabisini, angtane Jei aa jei ne tikwebaatinennerem jep ga kitulmini. Jei ga balbabili, "Gasa tebabi, ga isa tombaabili! Rotini aaiserem jeba tifini seyafter Amnaiserem."

27Jepga Yesus mangkona fo angguruboro ga goltena, ane Uwa Sanbagiri ga bala, "Ase samfer gulbana." Ane angtane Jei aa jei ne tikwebaatinennerem jep ga golmini, ane ga balbabili, "Aamei seyafter, fo angguru aaiserem sa telbi!

28Fo angguru aaiserem jeba aawisi Amnaiserem As jei tenbenteyalaiserem Amniwer angtane unggwanfer gamserem jem temawer, jega Uwa Sanbagiri Jei etam-etama kapka angtanemanaiserem gam wirtabaabili, gamjon jeiserem Jam sarbistaabonyan. Ane jega jem temawer Uwa Sanbagiri Jei taterisi ibirmi enggam gam bilipmini angtanefe, angtane Jei ga gam eyebaabili angtane Jelemanfe.

29Ai ims towas-towastababili, Ai gamjon fo angguru Ajam telbiyen, jamere Ai gamjon ibar ibirmiter nesa telbili, nunu Uwa Amna Jei aa jep gwesaram anggwabura seyafter gemerserem jem Sanbakfe jeme."

30Jepga jei simala ga aane twolbabili taban, jei ga aa ge sofobili taarentumu bosna Saitun jewer.

31Jepga Yesus angtane Jei aa jei ne tikwebaatinennerem ga balbabili, "Gwini aaiserem aamei seyafter isa nunggiri Amniwer, Ai As isa mirtetefala, aam temawer Taterisi Uwa Sanbagirmanaiserem jep ga enggam baatultel: 'Ai Angtane dombana aa jei gerebaabisnennerem, Angtane jeiserem As munboso, ane dombana jep ga sege syensyanwebisi.'

32Game saf, Ai gamjon Ajep irwenaram terewer, Ai aamei ga isAs danabaabili ona Galileyaminibe."

33Petrus ga gunu, "Angtane seyafter saf sege nunggirbene Imniwer, jengga ai ajam nunggiryen."

34Jepga Yesus Petrus ga bala, "Ai bunarsus ims towastana, gwini aaiserem nalef ayanga giriserem jam guteyan, aamei Ai ga Asis baanbaanwebana nawer-ningginfer."

35Jengga Petrus jei Yesus enggam tamawolbana, "Ai safe Ibaner jam nes ne tere, ai enggam ajam guyon, ai Aamei teisyena." Ane angtane afwer Jei aa jei ne tikwebaatinennerem, jeime seyafter jes gemerserem ga gemer ge gubitena.

36Jepga Yesus ga aa ge sofobili tamna bosna Getsemani je, angtane Jei aa jei ne tikwebaatinennerem jebaner. Jei ga aa balbabili, "Aamei aaf sa nwinte! Ai Ajam gwina aaure, sembayangs gwebaf."

37Jei Petrus ane tannawan Sebedeusmana ga balbabili, "Aamei Amsa onsoba." Ane angtane nawer-ningna jeiserem ga gemer aftabifele. Jepga Yesus Jena ga entene ini ga towaiwebana ini jam jenbafe, ane ini Jemna ga kabwaksobana.

38Yesus jepga aa balbabili, "Ini Amna As uskambar jenbana, Ai Ajam tere gamserem. Aamei aaf sa fya, ane aamei Abar jamer nesa gerasnenne!"

39Yesus ga gwisini bastantowaifer, Jei Jener ga jena onabe, mirmase Jemna o sagap ge falibene. Jei sembayanga Uwa Sanbagirfe ga enggam gwebabana, "Uwa Amna, afa samfer, tamtamtala uskambar aaiserem Amniwer se golteya. Ai bai tamtamtala aaiserem jam gwirinfe! Jengga Aamei Ipsam eyebilirim Ai Ajes bilirim, jengga Aamei Igemer gunurum, ga jeter Is eyebili."

40Jepga Yesus gamjon ga warautna angtane nawer-ningna Jei aa jei ne tikwebaatinennerem jemnibe, ane ga damtabili jei nus ge tabana. Yesus Petrus ga aa bala, "Aamke imasef unggwasa Abar ijam gerebaasnenefe jema daamfenna?

41Aamei jam isa gaarasnenewena, ane sembayanga ga jam isa gwebabuwena, jega etam-etama kapkaiserem bawasa is jes bilipminirim ibe, etam-etama jeiserem ijama eyebiyen. Aamei ga waakena tefner gam isa eyebif, jengga tifini seyafter imna werna."

42Yesus gamjon nawerfer ga sofna, sembayanga Uwa Sanbagirfe ga enggam gwebabana, "Uwa Amna, seyafter Aamei Ijeter bilirim, se etamwena. Afa tamtamtala uskambar aaiserem Aamei bijaufer Ijam golteyan Amniwer, jengga Ai seyafter gwirinfe, sya Ai Ase gwirni."

43Yesus gamjon Jame aa galap warautnaram, Jei gamjon ga damtabili angtane nawer-ningna jeiserem nus ge tabana. Jei nwena masef ne unggwasbaabili, nwena jemna daran-darna jam ge gaarabisife.

44Jepga Yesus gamjon ga mirtebitefala, ane ga sofna, sembayanga nawer-ningginfer gam gwebabaf Uwa Sanbagirfe, sembayanga gwanan aa gemer gwebabanaram, gamjon jegme gemer gwebabana.

45Jepga aa warautna angtane Jei aa jei ne tikwebaatinennerem jemnibe, ga balbabili, "Aamke nunu ke igemera tana? Sa damta! Jema ga sen fyal: Ai Tane Angtanemana, Asene gera angtane etam-etamabara jem tafnabe.

46Jasa irwe! Au, nei ganma gwi! Angtane Ai aa jei geraiserem, jei aare mes foryal aafe."

47Yesus ga gemer nasowena, angtane dua belas Jei aa jei ne tikwebaatinennerem, angtane daamfenna jemniwer bosna Yudas jei ga fortya. Angtane unggwanfer jebar aa jei ge forobityerem, jei nombeya bwalna gane erbili, ane jei tini bwalna unggwan-gwansus jes mese jes ne erbili. Angtane imam-imam sanbakaiserem ane angtane sanbaka Yahudimana, angtane unggwanfer jeiserem ga jei ne baftabili.

48Yudas, angtane Yesus aa jei geraram, jei angtane unggwanfer jeiserem fwater balbabili enggame, "Angtane ai ajes aalumbonorom, Angtane jeiserem aamei ga jes isa tebana!"

49Yudas aa galap fortyaram, jei tatarfer Yesusminip ga gwina, ga bala, "Gwinem, Guru." Jepga jei Yesus ga aalumbono olbumube.

50Yesus ga tamawola, "Am afelna, aamei tatarfer se eyebi, aamei ijewer jelaram jam eyebif!" Jepga angtane nafsi jei ga aa ge jalbili, Yesus ga aane tebana ginggitfer ga aane tebasnenne.

51Angtane daamfenna Yesus aa jei ne tikwebaatinennerem Yesusfar jep aaiserem, jei nombeya ga fotoltena, ane ga aa ge aafwebana angtane awelna imam sanbagirsususerem jemnip aa jei gwebilirim jam tegilfe, jengga imwana tefner targabaasini jamer te.

52Yesus jepga bala, "Nombe imna gamjon se kaawulnte jelem golap! Angtane seyafter nombeyem aa jei gangge erabanaram, jei nombeyabaner sege terbili.

53Aamke teisyena? Aamei Ai ke As enggam im bala, Ai Uwa Sanbagiri Ajam balyan Ams batobafe? Aamke teisyena afa Ai Uwa Amna As bala, Jei tatarmer As batobana, ane Jei malaikata uskambarsus se baftabili Ai Ajei ne gerebaasnenef? Jengga Ai Ajam balyan.

54Taterisi Uwa Sanbagirmana jep ga enggam baatultel, namwer aa je etamwenaram, se etamwena. Afa Uwa Sanbagiri malaikata jam se baftabunnurum Ams ne gerebaasnenef, gam jega Taterisi Uwa Sanbagirmana aa jes tulistaabilim, jei jam tabanweyan."

55Jes jepserem Yesus ga angtane unggwanfer jeiserem ga balbabili, "Aike angtane komkoma, aamei ga nombeya bwalna ane tini bwalna unggwan-gwana, aamei Ai jem ga As ima forobatya jam tebafe? Ai nunu jeber-jeber aamei is Ai towas-towastababuwenantam, Jena Uwa Sanbagirmanaiserem jebe, jengga aamei Ai jep Ase ijama tebayan.

56Jengga seyafter aaiserem mes etamwena, jega nabi aa jes ne tulistaabilim Am temawer gam se tabanwena." Jepga angtane seyafter aa jei ne tikwebaatinennerem Yesus ga aane mirtetefala, ga aa ge nunggirbili.

57Angtane Yesus aa jei ne tebanaram, jei Yesus ga aane aftafala jena Kayafasmanaiserem jebe. Kayafas jeiba imam sanbagirsususerem. Guru-guru Hukumu Nabi Musamana aa jei ne towas-towastababuwenaram ane angtane sanbaka Yahudimana, jei seyafter jena jeiserem jep mes ge betwebili.

58Petrus jei Yesus amunuwer onsobananna. Jei bijautowaifer wofna, jamere Imam Sanbagirsususerem jem ja sitabo. Jewer ga Petrus ga kautena sita jeiserem jebe, ane jep ga aa ge nwinbene angtane Polisi Jena Uwa Sanbagirmana jebar. Jei jam towaswef seyafter jeiserem fomfom se tabanwena.

59Angtane imam-imam sanbakaiserem ane Angtane Yahudimana Sanbak-sanbaka seyafter gemerserem, jei angtane enggalaiserem ga jes ne terelbaabili, angtane syefer nasowelaiserem Yesusem temawer enggalfe jei enggam gam ne balbabif Yesus Jei kapka gam eyebili, ane jega jem temawer jei Yesus ga jam ne munbof.

60Jengga Jemna kapkaiserem daamfenna afa jam ne domolbayan. Angtane unggwanfer taterisi afaf-afafaiserem ga aane balbabitounaram nenes-nenesmer, jengga daamfennaber jam falyan. Umwef ga angtane naura ga aa ge jela danggonawer.

61Jei enggam ga aa ge gunu Yesusem temawer, "Angtane aaiserem Jei enggam gunu, 'Ai Jena Uwa Sanbagirmana samfer As wirulsini, ane nunu ga nawer-ningginfenna Ai ibirmi gamjon ga As gwitiri.'"

62Jepga imam sanbagirsususerem ga irwena, ane Yesus ga bala, "Aamke taterisi aaiserem ke Ijam tamawolbiyen? Aamei Ibas nasbifi taterisi kapka aaiserem jem temawer?"

63Jengga Yesus Jei jafner fina, Jam nasoweyan. Imam sanbagirsususerem Yesus ga bala, "Ai Ims bala Aamei bunarsusfer Is nasowena Uwa Sanbagiri aa Jei gwenaram, Jem danggonabe! As balbabi, Aamke Tane Uwa Sanbagirmana, Angtane Uwa Sanbagiri bunarsus aa Jes balam Jam baftanaf enggalfe angtane gam waakentababisif?"

64Yesus ga tamawola, "Bunar, Aiba Jesam, iner imsam gutena. Jengga aamei angtane seyafter gemerserem Ai isa Ajam towastababili: Abakefyan aamei Ai As isa damtasa, Ai Tane Angtanemana. Ai Uwa Sanbagirem taasfolawer Ase nwinsi, Uwa Sanbagiri Jei baabetsusu. Ane Ai As iresanya winsi sinsinibaner taman waaken-giriwer!"

65Imama Sanbagirsususerem jei Yesusmana taterisi jeiserem jame aa galap saribenerem, jei ga kakalswena, fene sagamanaiserem ga taayimbetena, ane ga bitaimbaasini. Ane jei enggam ga gunu, "Jei Uwa Sanbagiri syefer baltena! Nei gamjon angtane nafsiserem nejama sarbayan. Aamei seyafter iner imsama sarbana Jei enggam gunu, 'Ai Uwa Sanbagirfar As ge nwini Sanbakfe.'

66Jewer aamei ifomfoma gunu?" Ane Safna Angtane Yahudimana Sanbak-sanbaka Seyafter Gemerserem jeiserem ga aa ge tamawolbili, "Jei syefer baltena, gam jega Jei jesa munbo!"

67Jepga angtane afweraiserem jei Yesus makem ga aane gwebana miribe, ane gane tumbu-tumbutono tafa murmureme. Ane angtane afwer tafa felfelem ne safsaftana,

68ane jei ga aa ge gubili, "Afa Aamei bunarsus Angtane Uwa Sanbagiri aa Jes balam Jam baftannufe, afa Aamei Jese, sya Aamei amse towastababi Aamei Is nane safsaftana!"

69Petrus sitawer aa gemer nwinirim, yafonsiwiri awelna angtanefe aa jei gweyibenerem jemnip ga jela, ane ga bala, "Aamei mese Yesus, Angtane ona Galileyamana jeiserem, ba aamei ma tikwebaatinenne."

70Jengga Petrus jei ga jam baanbaanwena angtane unggwanfer jeiserem jem danggonawer. Jei ga gunu, "Ai ajam towasweyan aamei ibas bili."

71Jepga jei mwa sitawer ga gwina. Yafonsiwiri nafsi awelna angtanefe aa jei gweyibenerem Petrus ga damtana, ane jei angtane jep aa jei ge fibilirim jei angtane jeiserem ga balbabili, "Angtane aaiserem jeiba Yesusfar aa jei ge wofobuwenaram, Yesus angtane tamna Nasaretmana jeiserem."

72Petrus gamjon Yesus ga baanbaanwebana. Jei ga gunu, "Ai bunarsus nasowena Uwa Sanbagirem danggonabe: Ai Angtane aaiserem ai teisyena!"

73Jepga abakefyan, angtane jewer aa jei ge fibilirim Petrusminip ga aa ge sofobili, ga aa ge gubili, "Bunarsus, aamei angtane Yesus iJeya tikwebaatinennerem, aameiba jesam. Ai towaswena, taterisi gulu imnaiserem isa amsa towasweibene."

74Jepga Petrus jei ga towaiwena jena jam gaarstenanafe Uwa Sanbagirminibe enggame, "Ai Angtane jeiserem ai teisyena! Afa ai syefer as nasowena, Uwa Sanbagiri Jei ai ga as tamtamtana!" Jes jeberserem ayanga giriserem ga gutena.

75Ane taterisi Yesus gwanan aa jes nasibenentem, Petrus jei taterisi jeiserem ga saribaastabona enggame, "Nalef ayanga giriserem jam guteyan, aamei Ai ga Asis baanbaanwebana nawer-ningginfer." Ane Petrus ga totintye, ane uskambarsus jep ga syena.


  Share Facebook  |  Share Twitter

 <<  Matius 26 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel