Alkitab Mobile SABDA
[VER] : [BERIK]     [PL]  [PB] 
 <<  Markus 1 >> 

1Taterisi Waakena aaiserem ga Yesus Kristusem temawer, Jeiba Tane Uwa Sanbagirmanaiserem.

2Taterisi Waakena aaiserem ga enggam tawawul, Nabi Yesaya Tane Uwa Sanbagirmana jem temawer aa gemer tulisulum Taterisi Uwa Sanbagirmanaiserem jebe: "Uwa Sanbagiri enggam gunu, 'Sa sar, Ai nabala angtanes As baftana, Aamei Is jei danabaabif, jega enggalf nele Ibe Is gam dwotamif.'

3Angtane aasaje ona dwisgirip jenjenwena enggame, 'Nele Tuhanf sa sartabaasi, nele nornorfer isa eyebana, Jei jep ayinyefe!'"

4Nabi Yesaya aa gemer tulisulum jes gemerserem, jepga Yohanes Pembaptis ga fyatetya ona dwisgiribe, taterisi Uwa Sanbagirminiwer ga nasipmini enggame, "Gasa irfwe etam-etama kapka imnaiserem jewer, Uwa Sanbagiri gasa onsoba, ane aamei ga isa baptiswena. Seyafter jeiserem ga isa eyebili, jega Uwa Sanbagiri etam-etama kapka imna is gam se wirtabaipmini, gamjon Jei jam sarbistaabonyan."

5Angtane ona seyafter Yudeyamana ane angtane kota Yerusalemmana ga aa ge forobuwetya Yohanes jam sarbasife. Ane angtane jeiserem etam-etama jelemana ga aane balbabitowena, jepjon ga Yohanes ga baptistababili jei, fona Yordan je.

6Yohanes fene unta tifniwer eyemiliserem ga jes kamwini. Bana aa jes gwelawilirim je mese unta tifniwer ne eyebili. Ane tumilgala jemna ga matikwam ane nintrin fo onnemana.

7Yohanes taterisi aaiserem ga nasipmini, "Am amnuwer Angtane sanbagirsususerem se fortya. Jei sanbagiri amniwer. Baabeta Jemna unggwandusa amniwer; ai ajam aanweteyan ane tofgol newa Jemna ajam fersobaasiyen.

8Ai isa fom as baptistababili, jengga Jei Mafnana Uwa Sanbagirmanaiserem is jem se baptistababifi."

9Jes galapserem Yesus ga tamna Nasaret ona Galileya ga jewer jela. Ane Yohanes Yesus ga baptistene fona Yordan je.

10Jewer ga Yesus Jame aa galap tawetyaram fonawer, Jei winsi ga damtaswena aane bitnetinirim, ane Mafnana Uwa Sanbagirmana ga iritya junu senaya gamserem Yesusem sagabe.

11Jewer ga taterisi taman waaken-giriwer ga aane sarbili enggame, "Aameiba Tane Amna, Ai Is Ajes nesiktenerem. Aamei ini Amna gam saaser-saasertabana."

12Jewer ga abakferyan Mafnana Uwa Sanbagirmana Yesus ga aftafala jamer taman tetenabo.

13Tampata taman tetena jeiserem jebe, Yesus ga jep nwini nunu abakfer ga empat pulu. Bawasa Yesus ga unggwasbana. Binatanga kakal-kakalaiserem nenes-nensa jebaner ge nwinbene jebe, ane malaikat Yesus ga aane batobana.

14Raja Herodes Yohanes jame aa tebanaram, bwiyip jam gaataantefe, Yesus ga sofna ona Galileyaminip, Taterisi Waakena Uwa Sanbagirminiwer aaiserem ga nasibene.

15Ane ga gunu, "Nunu Uwa Sanbagiri Jei aa jem nwinirim anggwabura seyafter gemerserem jem Sanbakfe, nunu jes jepserem mes gwetmanswel. Etam-etamawer jasa tikwe, waakenaiserem ga jes isa eyebili. Taterisi Waakena Uwa Sanbagirminiwer ga jetefener isa taabili!"

16Jepga jes jepserem Yesus ga gwina fobogana Galileyawer. Jei Simono Anderyas, ayana osona jeiserem, jep ga domsona. Jei jala ge tobolsnenne jigalf. Jei jemna awelna jes jigals ne tawanbinenef.

17Yesus angtane naura jeiserem ga gitmini, "Au, Am sege onsoba! Ai aamei isAs towas-towasona, aamei ga angtane nafsi ga is ge towanbili jega jei Ai As ga sene onsobana, jigala igemer ge towanbinennerem."

18Jes jeberserem jei jalna jemna ga aa ge mirultefala, jepga Yesus ga aa ge onsobana.

19Yesus jewer ga sofna, ane angtane naura gamjon ga domsona, Yakobuso Yohanes, ayana osona, tannawan Sebedeusmana. Jei atdusa jelemanaiserem jep ge nwini, jalna jelemanaiserem jes ge waakenulsini.

20Yesus jes jeberserem ga jenmini. Jepga jei jeta ga aa ge mirtene atdusaber angtane afweraiserem jebar. Ane jei Yesus ga aa ge onsobana.

21Yesus ane angtane Jei aa jei ne tikwebaatinennerem, jei kota Kapernaum jep ga aa ge forobitye. Nunu Sabat, nunu angtane Yahudimana aa jem ge nwinbisiwefaram jama ferwenaram, Yesus ga kawetena jena angtane Yahudimana aa jep ge betwebuwefaram, ane ga towaiwulu angtane jam towas-towastababife.

22Angtane Yesus aa jei ne sarbasinirim, jei taterisi Yesus aa jes nasbabilirim jam ne bitbitwebabili, aam temawer Yesus Jei enggam towas-towastababili angtane baabetabara galserem. Jei jam towastababiyen guru-guru Hukumu Nabi Musa aa jes tulistababilim aa jei ne towas-towastababuwenaram jei gamserem gamyan.

23Jes jepserem angtane bwat kapka aa jei kabwanaram ga kawetetya jena angtane Yahudimana aa jep ge betwebuwefaram jebe. Angtane jeiserem ga gwarenwena uskambar,

24"O Yesus, angtane Nasaretmana, Aamei Ibaf fortya? Aamei abe ase basIs eyeipmini? Aamke enggalf Im fortya, ai as Igam kabwaktababif? Ai amsa towaswena Aamei nansa. Aameiba Angtane ini tabalbalsusu aa jemanem folbanaram, Uwa Sanbagirminiwer Ijei jelaram."

25Yesus bwat kapka jeiserem jes uftana enggame, "Se tikwe! Jase totini angtane aaiserem jemniwer!"

26Bwat kapka aa jei kabwanaram ga egegwena jam totinyefe, ane angtane jeiserem unggwanfersus ga gin-gintene. Jei ga gwarenwena, ane angtane jeiserem jemniwer ga totintye.

27Angtane seyafter jep jeiserem jei ga aa ge bitbitwebili. Jepga jei jen jena ga aane tenaaminenne, "Aaje basa, taterisi ibirmi aaiserem nei nejesa sarbilirim? Jei baabeteme bwat kapkaiserem ga jes surbobili jam ge tobitinyefe, ane bwat kapkaiserem ga sara, ane ga totintye."

28Jepga taterisi Yesusem temawer tatarmer ga wofena ona seyafter Galileyamanaiserem.

29Jes jepserem Yesus ane angtane Jei aa jei ne tikwebaatinennerem ga aa ge tobitintye jena angtane Yahudimana aa jep ge betwebuwefaram jewer. Jepga jei ga aa ge sofobili, Yakobuso Yohanes jebar, jamere Simon ane Anderyas jem jenabo.

30Simonem munau tane jei jelem nutarap tana, tifin sarsar bwerai falbili. Jewer ga Yesus ane angtane Jei aa jei ne tikwebaatinennerem jam aa ge forobilirim Simonem jenabe, angtane Yesus ga aane towastana wini jeiserem jem temawer.

31Yesus ga gwina wini jeiserem jem tarnabe, ane wini jeiserem tafnawer ga taabitena, ane wini Jei ga batobili ga irwena. Jepga tifin sarsara ga barwebili. Jewer ga wini jeiserem jei tumilgala ga kitulmini angtane jeiserem jebe.

32Gwin seiseyeber, gwere mes kautena, angtane bwernabara unggwanfer ga aane aftabifelwetya Yesusminibe, ane angtane bwata kapka aa jei ge kayipminirim jes mese.

33Angtane uskambarsus aa jei ge nwinbenerem kotana jeiserem jebe, jei ga aa ge betwebili jena jeiserem jem mukanawer.

34Ane Yesus angtane unggwanfersus ga waakentababili, bwera-bwerna nenesmer jei aa jes ne domolwenaram jewer. Ane Jei bwata kapkaiserem jes mese jes surbobili. Yesus Jei bai bwat kapka jam ge nasbawefe, aam temawer bwata kapka jeiserem jei mesam ne towaswebana enggame, Yesus Jeiba Angtane waakensusu Uwa Sanbagirmana.

35Gwinibenersus, ona gemerje jam nafweyan, Yesus ga irwesa nunuwer, ga totintye jenawer, ane ga sofsa tampata taman tetenabe kota jitemwer. Jei sembayanga jep ga gwebasa.

36Simon ane Simonem saraboson mesnaiserem jebar jei Yesus ga aane terelbene.

37Jei Yesus aa galap ne damtanaram, jei ga aane bala, "Angtane unggwanfersus Ims ne terelbene."

38Jengga Yesus ga gunu, "Au, nei ganma sofwe aawer. Nei nesa sofwa taman-tamna nafsi aam gwetmanap aa je ge folbanaram jebe. Ai taterisi Uwa Sanbagirmana gamjon jewer gam Age nasibenenne. Aiba Ajem temaweram fortya."

39Ane jewer ga aa ge sofobili ona Galileya seyafter gemerserem jewer. Yesus taterisi Uwa Sanbagirmanaiserem ga nasibenenne jena angtane Yahudimana aa jep ge betwebuwefaram, ane Jei bwata kapka ga surbobili.

40Angtane tifin bwerna aa jemanem folbanaram Yesusminip ga jela. Jei somwan dumem nwintena, Yesus ga bala, "Uwa, afa Aamei jam Is gunurum, Aamei baabetabara ai ga asIs waakentana."

41Yesus angtane jeiserem ga nesiktene, jepga Yesus tafna ga tetena, dukap ga tosobaaniwili, ga bala, "Ai enggam Ai gunu, sya. Se waakenswe!"

42Jes jeberserem angtane jeiserem bwerna jemna ga barwebana, tifni gamjon waakenmer ga folbana.

43Ane Yesus angtane jeiserem ga baftana jam sofwefe, ititmer enggam ga bala,

44"Taterisi aaiserem angtane nafis-nafsiserem jebe ijam nasipmiyen. Jengga jase sofwe imaminip, jeiba angtane taterisi angtanemana Uwa Sanbagirfe aa jei gwirinfelwenaram. Jei aamei is damtanaram enggame, aamei imsam waakenswena. Jepga is eyebili Nabi Musa fwater aa gemer nasbilim: se gulba Uwa Sanbagirfe apgal jigala jeiserem Nabi Musa aa jes bilim. Jepga angtane ga sege towaswebili enggame, aamei bunar-bunarsusfer imsam waakenswena."

45Jengga angtane jeiserem ga sofwa, ane taterisi jeiserem ga nasipminenne angtane seyafter gemerserem jebe. Jei taterisi jeiserem aa jewer nasbinennerem, Yesus ga jem temawer taman-tamnap Jam kaweteyan. Jei taman sitawer nwini, tampata tamanfennaiserem ga jep nwini. Jengga angtane unggwanfer taman nafis-nafsiserem jewer ge forobuwetya, Yesus aa jep nwinirim jebe.


  Share Facebook  |  Share Twitter

 <<  Markus 1 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel