Dual Panel1Jepga aa ge forobili foboga jimwer ona bosna Gerasa je.
2Yesus atawer jam aa galap jutetyaram, angtane bwata kapkaiserem aa jei kabwanaram ga bitis tampatawer jela, jei Yesus ga damtana.
3Angtane jeiserem jei jentowai nwini bitisibe, ane angtane nafsi jei jam ne tafreyan ranteme.
4Angtane jeber-jeber tufa yo tafna jemnaiserem ga aane faarebana ranteme, jengga rantai jeiserem jam gam deksona jamer te. Baabeta jemna unggwanfersus, baabeta angtane nafsiserem jemniwer. Angtane jei masef, jei jam tebayan enggalfe gam tikwefe.
5Gwin gwer jei bitis tarnap, ane taaren tarnap jep gam wofena, ga jep gam gwenanna, ane jena jam gam targabaasnenne tonem.
6Angtane jeiserem jei Yesus bijauwer jam aa galap damtanaram, jei ga nunggiryele Yesusminibe, jepga somwan dumem ga nwintena Yesusem danggonawer, Yesus ga sembatana. Yesus bwat kapka ga bili, "Aamei bwat kabwak, jase totinye angtane aaiserem jemniwer!" Bwat kapka jeiserem ititmer ga nasowena, "Aamei amnibe as Ibas eyeibefe, o Yesus Tane Uwa Sanbagirmana, Uwa Sanbagiri angtane aa jes ne gaartenaram tagarsusup? Bosna Uwa Sanbagirmana, ai Ims bala, Aamei ai ase Ijam tamtamtayan!"
7(5:6)
8(5:6)
9Jepga Yesus angtane jeiserem ga tenebana, "Imna bosna nansa?" Jei ga tamawola, "Bosna amna 'Unggwanfer', aam temawer aiba unggwanfer jemnibe."
10Ane bwat kapka jeiserem ititmer ga bala, "Safnant, ai as Ijam surbobiyen ai ajama sofwefe ona aaiserem jewer."
11Otumu jes jepserem twena unggwanfersus ga jep naawena, tumilgals ne terelbaabili.
12Ane bwat kapka jeiserem Yesus ititmer ga aane bala, "Ase enggam se balbabi, 'Aamei twenminip sa gwi!', ane ai ga asa kawetena twenminibe."
13Yesus ga ula jemnaiserem jeter ga taayipmini. Ane bwat kapka jeiserem ga aa ge tobitintye, jepga twenminip ga aa ge kabwitena. Twena jeiserem ga enggammer 2.000. Twena jeiserem ga aa ge nunggirbili, ane ga aa ge janbiton obinfiwer jamer foboganabo, jepga aa ge albitini, jamer futu.
14Jepga angtane twena aa jei ne gerebaabisnennerem, ga aa ge nunggirbili, ane taterisi ga aane nasbinenne kotanap ane taman-tamnap ona jep gemerserem. Jepga angtane ga aa ge jalbili enggalfe, aa je etamwenaram jeiserem gam ne domolf.
15Jei ga aa ge jalbili Yesusminibe, jei angtane jeiserem ga aane damtana jep nwini. Bwata kapka gwanan unggwanfersus jem kabwana, jengga namwer jei mes waakensona. Jei fene gamjon ga mes kabwabili, ane ini ga mes waakenswebana. Ane angtane jeiserem aa jei ge forobuwetyaram, jei seyafter ga aa ge erebili, aam temawer jei enggam ge towaswebili baabeta Yesusmana ba unggwandwasusum.
16Angtane jei jener aa jei ne domolaram jeiserem aa je etamwenaram, jepga angtane nafsiserem jep ga aane nasipmini. Angtane bwat kapkaiserem aa jei kabwanaram, ane twena unggwanfer jeiserem jem temawer ga jes ne nasbili.
17Jepga Yesus ga aane bala, ga aane balbalwena enggalfe Yesus ona jemnaiserem Jam mirtetefalf.
18Yesus aa gemer juswenaram atdusabe, angtane bwat kapka gwanan aa jei kabwanaram, jei Yesus ga bala, "Yesus ai Ims gam onsobaf."
19Jengga Yesus Jei bai. Jei angtane jeiserem enggam ga bala, "Se warau ilem jenap, ane ilem afelen mesnaiserem jemnip. Tuhan seyafter is jes eyeibenerem ibe, ane Jei is fomfom gam nesiktene, jeiserem ga is nasipmini."
20Angtane jeiserem ga sofna, jepga towaiwulu jam nasbinennefe ona Sepulu Kota je, seyafter Yesus aa jes eyeibenerem jebe. Ane angtane seyafter ga aa ge bitbitwebili.
21Yesus gamjon ga sofna atame jamere foboga jimwero. Ane fobogana jem eyep angtane unggwanfer ga aa ge betwebili Yesusem tarnabe.
22Angtane bosna Yairus ga jela. Jeiba angtane sanbak jena angtane Yahudimana aa jep ge betwebuwefaram. Jei Yesus jame aa galap damtanaram, jepga jei jener ga jena Jem tof tarnabe enggalfe jei aa jes bilirim Yesusfe gam bilibef.
23Jepga bala, "Tane yafma amna bwernabara, amkom fom tere. Jase jal, tafna ga Is tosobuniwitye jem sagabe, jega jei gase waakenswena, gase gwena."
24Yesus angtane jeiserem jebar ga aa ge gwina. Angtane unggwanfersus ga aane onsobana, jena aane bafsosowenaram afwer taamwer, ane afwer taamwer.
25Angtane unggwanfer jeiserem jem nenennabe, wini aasaje ga bwernabara. Aawis fwa jemna jeber-jeber domolwena tahunu dua belas.
26Jei doini jemna seyafter doktorf kitulbowena, obata mese ane apgal jigala nafsi jem armantababili enggalfe jei bwernawer jem gam waakenswef. Jengga masef, jei jam waakensweyan bwernawer. Bwerna jemna jeber-jeber unggwandwaswebili.
27Jei taterisi Yesusem temawer mesam sarbili. Jei angtane unggwanfer jebar ge wofebili, ane Yesus ga gwetmanwebaasini duruwer, fene Jemna ga ensobana.
28Jei enggam gunu jelem inibe, "Ai fene Jemna tefner as ensobana, ai samfer ga as waakensona."
29Jes jeberserem aawisi ga tikwebili, jena ga enola bwerna jemna barwebilirim.
30Yesus ga towaswena, "Wa, baabeta Amna mes totinyel." Jega jem temawer Jei ga irfwena, jepga angtane unggwanfer jeiserem ga tenebaabili, "Fene Amna Ase nane ensobana?"
31Angtane aa jei ne tikwebaatinennerem ga aane bala, "Aamei tousam angtane unggwanfersus nei nes jei ne baftabinennerem! Jeje bafa Aamei ga Imasef tenna, 'Fene Amna Ase nane ensobana?'"
32Jengga Yesus angtane jeiserem ga angbasnenne enggalfe jam damtafe, jeiserem nane eyebili.
33Wini jeiserem ga jam erne, ane ga egegwena, aam temawer jei mesam towaswena ga fom etamwena jem tifinibe. Jei ga jela Yesusem tarnap, ga nwintetya somwan dumeme, ga nasbaibene seyafter aa je etamwenaram jamere jei aa waakensona.
34Jepga Yesus wini jeiserem ga bili, "Am tane, aamei Ai As imes tebana waakenfer, jega jem temawer aamei gase waakenswe. Gase sofwe waakenfer."
35Jes jepserem Yesus ga gemer nasowena, angtane Yairusem jenawer aa jei ge jalbilirim, ga aa ge forobitye, Yairus ga aane bala, "Tane imna futu. Aamei Yesus gamjon ijam balyan im jenap jam gwife."
36Yesus jame aa sarbabilirim, jengga Jei jewer Jam irfweyan. Jei Yairus ga bala, "Aamei ipsam ernerem! Amse sarba, Amter is tebana."
37Jepga Yesus angtane nafsi ga balbabili, "Ai Ase ijama tikwebaatiyen. Jengga Petrus, Yakobus, ane Yohanes osona Yakobusmana, jei Ai ga Ase jei sene tikwebaatini."
38Jei jame aa galap ge forobilirim Yairusem jenabe, Yesus angtane unggwanfer jeiserem ga damtabili, jei jam ge syebuwena, jei gobweram jam ge tayebinenne.
39Yesus ga kautitun, ane ga balbabili, "Aamei ibafa syesyawena? Ane jeje bafa aamei gobweram ga imasefa tayenanna? Tane jeiserem jei jam teryen, jei nustana."
40Jengga jei Yesus jam ne bweraltana, aam temawer jei enggam ge towaswebili tane yafma jeiserem mes tere. Ane Yesus angtane jep aaiserem balbabili jam ge tobitinife. Jepga tane jeiserem jemna ene yo jeta, ane angtane nawer-ningna aa jei ne tikwebaatinennerem, jei seyafter Jebar ga aa ge kabwitena mwonabe, tane aa jep falitonom.
41Jepga Yesus tane jeiserem tafna jemna ga taayibitena, ane Ibrani olem ga bili, "Talita kum," afa nem olem ga enggam, "Wai tane, Ai ims bili, jas irwe!"
42Ane jes jeberserem tane jeiserem ga irwena, ga wofena. Umuru jemna tahunu dua belas. Angtane seyafter jep aaiserem jei ga aa ge bitbitwebili.
43Jengga Yesus angtane seyafter jeiserem ititmer ga balbabili enggame, "Angtane nafsi afa ijama towastayan taterisi aaiserem jem temawer." Jepga balbabili, "Tumilgal sa golbi tane aaiserem jebe."