Alkitab Mobile SABDA
[VER] : [BERIK]     [PL]  [PB] 
 <<  Markus 8 >> 

1Jes galapserem angtane uskambar aa jei ge betwebilirim, jemna tumilgala bar. Ane Yesus ga angtane aa jei ge tikwebaatinennerem ga aa jenbebili, ane ga aa balbabili,

2"Ai angtane aaiserem aa jei ge betwebilirim aafe Ajam nesiktababili, aam temawer jei Abar Aya nwinirim nunu ga nawer-ningna, ane tumilgala jemna mes ge barweipmini.

3Ai bai jei wisimer ge waraubafe jelem jenabe, tifni nelep galap sege werenswebamini. Angtane afwer tamna jemna bijua."

4Angtane aa jei ne tikwebaatinennerem Yesus ga aane tenebana, "Aa je fomfoma ona tamanfennabe angtane rotis golmife jamer unubuguf?"

5Yesus ga angtane aa jei ne tikwebaatinennerem ga aa tenebaabili, "Rotini imnibe fomera?" Ane angtane aa jei ne tikwebaatinennerem ga aane tamawolbana, "Rotini amnibe tuju."

6Yesus ga angtane unggwanfer jep gemerserem ga aa balbabili, "Onnap sa nwinte!" Ane Yesus ga rotini jeiserem ga aa kitultena, Uwa Sanbagiri ga bala "Ase samfer gulbana." Ane ga aa bitabaabisini, ane ga kitulmini angtane Jemna aa jei ne tikwebaatinennerem jebe enggalfe, jei gam ne syenulminenef angtane unggwanfersus jeiserem jebe. Ane jei ga aane kitulmini angtane seyafter jep gemerserem.

7Angtane aa jei ne tikwebaatinennerem jegme jigala bastantouya gane gwirni, unggwanferyan. Yesus Uwa Sanbagiri ga bala, "Ase samfer gulbana." Ane Yesus ga angtane aa jei ne tikwebaatinennerem ga aa balbabili, "Jigala aaiserem jasa syentabaabi!"

8Jepga aa dwena jamer unubugufsus. Angtane jep aa jei ne dwenaram unggwanfer ga enggammer 4.000.

9Ane tumilgal tomna angtane aa jei ne tikwebaatinennerem ga aane dupdupbulu, burnabara ga tuju. Ane Yesus ga aa balbabili jei, "Gasa sofwe!"

10Ane jes jeberserem Yesus ga aa juwili atdusabe, ane angtane aa jei ne tikwebaatinennerem Jebar ga aa ge sofobili ona Dalmanutaminip.

11Jepga angtane safna Farisimana afweraiserem jei Yesus gane tenebawena enggalfe jei Yesus ne unggwasbaf. Jei enggam ne bala, "Yesus, Aamei gwanan bwembwema ap se eyeipmi, jega enggalf ai agma towaswef Aamei Uwa Sanbagirminiweram jela."

12Yesus ini ga garstaabona, ane ga tamawolbaabili, "Aamei ijeya gwenaram namwer aa jep falaram, aamei bwembwema ibafa bili? Ai aamei is Ajam balbabili, bunar-bunarsus Ai bwembwem is Ajam golmiyen ibe."

13Jepga Yesus ga mirtebitefala, atap ga juwili, ane jewer ga sofwa fobogana jimwer.

14Angtane Yesus aa jei ne tikwebaatinennerem jei ga rotini jam ne dirinswebabili gemer ne gwirinfe. Rotini atap ga daamfenna tefner gane gwetaantena.

15Jewer ga aa ge sofobili, Yesus ga aa balbabili, "Aayai roti tan angtane Farisimanaiserem, ane Raja Herodesmana, je kapka!"

16Angtane aa jei ne tikwebaatinennerem jena ga aane gitminenne, "Yesus Jei nei nese roti tanem temawer balbabili, aam temawer nei rotini nemsa dirinswebili nejama gwirinyen."

17Yesus Jei fwater towaswena angtane aa jei ne tikwebaatinennerem jena aa jes ne gitminennerem, ane Jei ga tenebaabili, "Jeje bafa aamei ga ima nasouna rotini ijama domolyanem temawer? Aamke gemerje ijama saryan? Ini imna ke mata?

18Aamei nwenabara, jengga ijama anggayan. Aamei imwanabara, jengga aamei ijama saryan. Aamke ijama dirinswebili Ai gwanan Ajes eyebilirim?

19Ai angtane 5.000 Agalap taayinbilirim rotini tafna gwirime, roti tomna fomera aamei ijesa dupduptababilirim?" Jei ga aane tamawolbana, "Rotini tomna burnabara dua belas."

20Yesus gamjon ba tenebaabili, "Ane Ai angtane 4.000 Agalap taayinbilirim rotini tujume, roti tomna fomera aamei ijesa dupduptababilirim?" Angtane aa jei ne tikwebaatinennerem ga aane bala, "Tomna burnabara tuju."

21Yesus ga balbabili, "Namwer aamei engbar imsa sar waakenfer enggame, Ai roti tanem temawer Agalap nasowenaram, Ai Ajam nasoweyan nei rotini nejama domolyanem temawer."

22Yesus ane angtane Jei aa jei ne tikwebaatinennerem tamna Betsaidaminibe ga aa ge forobili. Angtane afweraiserem jei ga angtane nwena kofa jes ne aftafala Yesusminip, jepga Yesus gane bala, "Tafna Imna se tosobaaniwi angtane aaiserem jem sagabe, jam waakentafe."

23Yesus angtane nwena kofa jeiserem tafnawer ga tebatena, ga tamna sitawer aftafala. Yesus ga nwena makem ga aa gweyimbene, gamjon tafna tosobaaniwili, ane ga aa bala, "Nwem waakenfer ke im anggasi?"

24Angtane jeiserem ga anggasini, ga tamawola, "Maa. Ai amsam anggana, jengga ai angtane enggam ai gerebaabili, tini jam wofela gamserem."

25Yesus tafna gamjon ga aa tosobaaniwili angtane jeiserem jem nwenabe, ane angtane jeiserem nwena ga aa fersonnu, jigala seyafter gemerserem ga aa gerebaabili waakenfer.

26Yesus angtane jeiserem ga aa bala, "Gamjon gase warau ilem jenap; tamna jeiserem namwer jebe ijam warauyan."

27Yesus ane angtane Jei aa jei ne tikwebaatinennerem jewer ga aa ge sofobili, ona kota Kaisareya Filipiminibe jem gwetmanabe. Nelep ga Yesus aa tenebaabili, "Angtane nafsi jeiserem ke Ase enggam ne bala, Ai nansa?"

28Angtane aa jei ne tikwebaatinennerem ga aane tamawolbana, "Angtane afwer enggam ge gubili, Aameiba Yohanes Pembaptisam. Afwer enggam ge gubili, Aameiba Eliyasam. Ane angtane nensaiserem jeime gemer ge gubili enggame, Aameiba angtane nabi gwanan aa jei naawelam, ba jesam."

29Jepga Yesus angtane aa jei ne tikwebaatinennerem ga aa tenebaabili, "Jengga aamei iner Ai As ifoma bala Ai nansa?" Petrus ga aa tamawolbana, "Aameiba Mesiasam, Angtane Uwa Sanbagiri Jei bunarsus aa Jes balam Jam baftanaf enggalfe angtane gam waakentababisif."

30Jepga Yesus angtane aa jei ne tikwebaatinennerem ga aa balbabili ol dagame, "Aamei taterisi aaiserem ijama nasbineneyen angtaneminibe."

31Jepga Yesus ga towaiwulu jam towas-towastababife enggame, "Ai Tane Angtanemana, Ai tamtamtalaiserem unggwanfer As gwirinfi. Angtane sanbaka Yahudimana, ane angtane imam-imam sanbakaiserem, ane guru-guru Hukumu Nabi Musa aa jes tulistababilim aa jei ne towas-towastababuwenaram, angtane seyafter jeiserem jei Ai Asene gwebafa baife. Ane Ai ga Asene munbofo. Jengga nunu nawer-ningnaiserem Ai gamjon ga jem As irwefa terewer."

32Taterisi jeiserem Yesus Jei waakenfer ga nasipmini, jega angtane Jei aa jei ne tikwebaatinennerem jei waakenfer gam ge sarbif. Ane Petrus Yesus ga aa tebawili, ane ga towaitana jam uftafe enggame, "Yesus Aamei taterisi kapkaiserem enggala je Ibaf nasbabili?"

33Yesus ga irfwena angtane aa jei ne tikwebaatinennerem jemniwer, ane Petrus ga aa bala, "Bawas, aamei jas gwisi! Aamei taterisi jeiserem angtaneminiwer im domola, Uwa Sanbagirminiweryan."

34Jepga Yesus ga jenbebili angtane aa jei ne tikwebaatinennerem, ane angtane nafsi unggwanfer jep aaiserem jes ne jam ge jalbife. Yesus ga balbabili, "Angtane afa aa jei gunurum Ams onsobafe, jei jelem temawenefener jam gweyan. Ane jei jamer gam menetwesiwena jam terfe, aam temawer jei Ai As jewer tikwebaatinirim. Ane jei Ai jamer ga As onsobana.

35Angtane afa aa jei gwenaram jelem temawenefener, jei waakenfer gwelaiserem jamer abak-abaksus jei jam domolyan. Jengga angtane aa jei gam gwenaram Am temawer, ane Taterisi Waakena Uwa Sanbagirmana jem temawer, jei waakenfer gwelaiserem jamer abak-abaksus ga jei gam domola.

36Aaiserem je kapka, afa angtane galgala seyafter ogirip gamserem se taabili, jengga jei waakenfer gwelaiserem jamer abak-abaksus jam domolyan.

37Angtane apgal jigala fas afa jam gulbayan Uwa Sanbagirfe enggalfe, jem fwaina waakenfer gwelaiserem jamer abak-abaksus Jemniwer gam domolf.

38Afa aamei Ai As jam isa seferswebanaram, ane taterisi Amnaiserem jem temawer jam isa seferswenaram, Ai Tane Angtanemana, Ai jame Ajep fortyaram Alem nafabaner, ane nafa Uwamanaiserem, ane malaikata waakensususerem jes mese, Aime is gemer As seferswebabili, aamei Ai As igemera seferswebanaram."


  Share Facebook  |  Share Twitter

 <<  Markus 8 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2020
Alkitab.SABDA.org

Android.SABDA.org
SABDA.mobi
Bantuan
Dual Panel

Laporan Masalah/Saran