Alkitab Mobile SABDA
[VER] : [BERIK]     [PL]  [PB] 
 <<  Wahyu 12 >> 

1Jepga winsip ga aa ge anggabiswena bwembwema teisyena unggwandwasusu ga enggam, wini gwere aa jei kamwinirim fen manggen ga aane domolswena, ane muara ga jem tof gwonawer fala, ane jem dwak sagap ga nabalsir gamserem gam gweltena, jep ge batobili torbwana unggwanfer ga dua belas.

2Wini jeiserem ga udanabara, nunu jebe mesam fala tane jemna jewer jam gerefe, ane jei ga jam gwarenwena sigini jemna jeiserem jem temawer.

3Winsip gamjon ga aa ge anggabiswena bwembwema teisyena ga enggam, bwili unggwandwasusu ga aane domolswena, jemna tifni berberem falbili. Jemna duka ga tuju, duka seyafter gemerserem nabalsir rajamana jes galserem ga gala gam bunulntena, ane jemna tanduku ga sepulu.

4Jem bubwatim jei matona afwenefener ga winsiwer kofortababunswena, ane ogirip ga aa fasawoltetya. Bwildusa jeiserem jep fina wini jeiserem jem danggonawer aa jei sartenaram tane jewer gerefe. Bwildusa jeiserem ga enggalf fina tane jewer gaataanuf jam se surnurum.

5Jepga wini jeiserem Tane ga girtowai gerna. Jei anggwabura seyafter gemerserem jem Sanbakfe ga Jei se gwena, ane dumu ga besi dum se girni. Angtane Jei jam ne sarbayanaiserem, Jei besi dum jeiserem jem gam saftabana. Bwildusa jeiserem Tane safe jam gaataanuf, jengga Tane jeiserem ga aane aamsina, ane ga aane girinfele Uwa Sanbagirminip aa Jei nwinirim Jelem taman nwini sanbagiri jebe.

6Wini jeiserem jei dwisgirip ga nunggiri, tampata jeiserem jewer angtane fas. Jengga Uwa Sanbagiri Jei tampata jeiserem mes menetulbisini wini jeiserem jebe. Tampata jeiserem Uwa Sanbagiri se gweyinwena wini jeiserem nunu ga enggammer 1.260 (afa tahunu tiga setenga).

7Jepga taman waaken-girip erala ga aa fala. Mikayel ane jem malaikata bwildusa jeiserem jebar ga aa ge erabana, ane bwildusa jeiserem jelem malaikatfar ge fibili, ane Mikayelfar ga aa ge erabana.

8Jengga bwildusa jeiserem ga jeye kalaswena, ane bwildusa ane jem malaikata Jei gamjon Jam balbabiyen taman waaken-girip jam nwinfe.

9Bwildusa jeiserem ga aa firulntetya, ga totintye. Jei ga ogirip ne firtabaabuntetya, ane malaikata seyafter jeman mesna. Jeiba awasbak gwanan-gwanansus jeiserem, ga jes jemna bosna ga bawas afa setan, jei angtane seyafter ogiriwer jam afaf-afaftababili.

10Ane jepga taterisi ol dagame biliserem taman waaken-giriwer, ane taterisi jeiserem ga ai sarbili enggam aa jei gutenaram, "Nunu namwer aaiserem Uwa Sanbagiri Jei angtane Jelemanaiserem gam waakentababif! Namwer aas jepserem Uwa Sanbagiri Jemna baabeta jam ge sana Raja gamserem. Ane namwer aas jepserem Angtane Uwa Sanbagiri bunarsus aa Jes balam Jam baftanafe Jemna baabeta ga jam ge sana, aam temawer bwildusa jei taman waaken-giriwer ga mes ne firulntetya. Bwildusa jeiserem jei gwanan nem afelen mesna Yesus aa jei ne tebanaram, mesam kenemtababilint Uwa Sanbagirem tarnabe, gwerem ane gwinem.

11Nem afelen mesna Yesus aa jei ne tebanaram jei jam ge janbiyen, jengga bwildusa mes jena Domba Tanem aawiseme, ane taterisi bunarsusfer aaiserem Uwa Sanbagirminiwer jei aa jes ne nasbinennerem jem mese. Jei baife jam naaweyan jena jam ne detfe, jamer futu.

12Ga jem temawer ini imna ise saaser-saasersusfer sege folbamini, aamei taman waaken-gir ane seyafter gemerserem jep aa jei ge nwinbenerem. Jengga tamtamsusu gase etamwemini ogiri yo fini jebe, aam temawer bawasa jei mes iritya imnibe. Ane jemna kakala ga unggwandusa, aam temawer jei tousa enggame nunu jemna gamjon ga bastowaifer gam fala."

13Bwildusa jeiserem jame aa galap towaswenaram enggame, jeiba ogiribe jei mes ne firulntetya, jei ga wini Tane girtowai aa jei gernaram jei ga aa surbinenne.

14Jengga wini jeiserem jepga igwala unggwandusa jem farta naura ga jemna gane tetbili wini jeiserem jebe, jega jei jem gam ifufe tampata dwisgiribe, tamna bijuaber bwildusa kakalaiserem jemniwer. Uwa Sanbagiri wini jeiserem ga jep se gweyinwena nunu abakef ga enggammer tahunu tiga setenga.

15Ane bwildusa jeiserem jei fona unggwanfersus aaremawer ga enggalf tawara wini jeiserem jemnibe, fona jeiserem wini jei gam gwirinfelf.

16Jengga ogiri wini jeiserem ga jeye batobili. Ogiri jei aarema jemna aa teresona, ane jei ga fona bwildusa aaremawer aa jei totintyerem ga oye telbili.

17Bwildusa jeiserem jei wini jeiserem ga jes nasbili uskambarsus, ane ga aa sofwa wini jemniwer, ane tane afwer wini jeiserem jemna seyafter jei ga aa surbobinenne. Tantantane jemna afwer jei taterisi Uwa Sanbagiri aa jes balbabilim jei waakenfer ne saribene, ane jei angtane nafisfe mes ne towasulmini enggame Yesus Jeiba jem Tuhansam.


  Share Facebook  |  Share Twitter

Studi lengkap, silahkan lihat: Alkitab SABDA.
Dengar dan baca Alkitab Karaoke, silahkan kunjungi: Alkitab Karaoke.
Rencana Multimedia Baca Alkitab: BaDeNo.
Studi Alkitab dengan AI: Alkitab GPT.

 <<  Wahyu 12 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Alkitab GPT
Bantuan
Dual Panel Dual Panel