Alkitab Mobile SABDA
[VER] : [BERIK]     [PL]  [PB] 
 <<  Yohanes 14 >> 

1Yesus ai angtane Jei ajeya tikwebaatinennerem ga as balbabili, "Ini imna is jam ge jenbamiyen. Uwa Sanbagiri Jam isa tebana, ane Ai mese Asi jam isa tebana.

2Uwa Amna Jem jenabe, mwona anesus angtane jep ge nwinbeleiserem. Afa mwona unggwanferyanaye, Ai enggame Ajam guyon, mwona jei ane. Jengga jep ga mwona unggwanfer, ane Ai ga Ajam sofna jewer, Ai mwona ibe isa gam menetabaipmisif.

3Ai As sofnaram tamna ibe is Ajewer menetabaipmisif jamer taban. Jewer ga Ai ga gamjon gas warautna, ane aamei ga isAs aftabifele jebe, jega Ai Ajep nwinirim, aamei mese aameime jep isa nwini.

4Aamei imsa towaswebana nele Ajewer sofnaram."

5Jepga Tomas Yesus ga aa tenebana, "Tuhan, ai ajama towasweyan Aamei Ijewer sofnaram. Nele jeiserem ai fomfom asa towaswebana?"

6Yesus ga aa tamawola, "Aiba nelsam Uwa Sanbagiri ijewera damtafe. Seyafter Ai Ajes bilirim jei bunar, ane Ai waakenfer gwelaiserem jamer abak-abaksus As golmini angtanefe. Angtane jei gam ge forobili alem Uwaminibe, jengga nele jemna Am tarasamer gangge jalbili.

7Afa aamei imsa towaswena Aiba nansa, aamei gamjon isa towaswena Uwa Amnaiserem Jeiba nansa. Namwer isa towaiwena As isa towaswebana. Jega jem temawer aamei jegme isa towaswebana Uwa Amna Jei nansa, ane aamei Jei imsa damtana."

8Jepga Filipus Yesus ga aa bala, "Tuhan, Uwa Imna As jasege saamisi, ga jetefener aya bili."

9Jengga Yesus ga aa tamawola, "Ai safe abaka ibar jam wofelabe, Filipus, jeje bafa aamei gemerje ijam towasweyan Ai nansa? Enggam ijam guyon, 'Uwa Sanbagiri Im ge saasi amnibe.' Jeiserem ga ijam guyon, aam temawer angtane Ai aa jei ne damtanaram, jei mes ne damtana Uwa jeiserem.

10Aamei ga aater is taabili, Ai Uwafar daamfennaber ge nwini, ane Uwa Jei Abar daamfennaber Ai ge nwini. Taterisi is Ajes bilipminirim, jei ke Amanfenna. Taterisi jeiserem jeba Uwamana aa Jei nunitonom Amnibe. Jei baabeta Jelemanaiserem Ap gulbana, jega Ai awelna Jelemana jeiserem Agam gwebif.

11Aamei ga aater isa taabili Ai Ajes bilirim, Ai Uwafar daamfennaber ge nwini, ane Uwa Jei Abar daamfennaber ge nwini. Afa aamei ijama taabiyen Ai Ajes bilirim, gasa domol bwembwema Ai Ajes eyebilirim. Jepga aamei isa taabili Ai Ajes bilirim jeba bunaram.

12Aaiserem bunar Ai Ajes bilirim. Angtane Ai As jei gam tebanaram, jei gam eyebili Ai jes Agam eyebilirim. Ai Ajam sofwa Uwa aa jep nwinirim. Ga jem temawer angtane jeiserem gase eyebili Ai jes Agam eyebilirim, ane jei gamjon nensa waakensususerem gase eyebili.

13Aamei As ijeya tebanaram, seyafter ijesa bilirim Am boseme, Ai isAs eyeipmisi ibe, jega Ai is gam As ge saamisini baabeta unggwandusa Uwa Amnaiserem Jemna.

14Afa aamei As ijeya tebanaram, apgal jigala jes igama bilirim Amnibe, Ai isAs gam eyeipmi ibe."

15Yesus gamjon ga gutena, "Afa aamei Ams isa nesiktene, seyafter Ai Ajes bilirim, ga jeter isa eyebili.

16Ai Uwa As balfa, ane Jei is gaarmini ibe Angtane is Jei batobaabife, Ai gamserem isa gam batobaabilirim. Jeiba Mafnana Uwa Sanbagirmana, Jei nes Jei ge saamisini jeiserem seyafter ba bunaram. Jei ijebara gwef jamer abak-abaksus.

17Angtane Amanyanaiserem ogiribe, jei Mafnana Uwa Sanbagirmana jam ne domolyan, ane jam ne towaswebiyen. Ga jem temawer Mafnana Uwa Sanbagirmana Jam nwinyen jem inibe. Jengga aamei Jei imesa domola, ane Jei ibar daamfennabera nwini, ane Jei mes fortya im inibe.

18Ai isAs mirtebitefala, jengga Ai isa jam mirtebitefalyan infentowai gwesef tane gamserem. Ai gamjon As warautna imnibe.

19Abakefyan, angtane Ai Ams tebayanaiserem jei Ai As jam ne damtayan, jengga aamei gamjon As isa damtana. Ai gamjon As gwena, ga jem temawer aamei gamjon isa gwena.

20Nunu jes jepserem, aamei isa towaswefa, Ai Uwa Alemanabar daamfennaber As ge nwini, ane aamei Abar daamfennaber nesa nwini, ane Ai ibar daamfennaber nesa nwini.

21Angtane As jei gam nesiktenerem, angtane jeiserem taterisi Amnaiserem mes gam taabili, ane jei ga gam eyebili Ai Ajes gam bilirim. Uwa Amna jei se nesiktene, jei As jei nesiktenerem. Ane Ai mese jeime As nesiktene, ane Ai Ana gase gweretana jemnibe."

22Jepga Yudas nafsi (jeke Yudas Iskaryot, jesyan) jei ga gutena, "Tuhan, aam je bafa Ina ga Im gweretana amnibe, jengga Ina Ijam gweretayan angtane Ims tebayanaiserem jemnibe?"

23Yesus ga aa tamawola, "Afa angtane As jei nesiktenerem, jei gase eyebifi Ai Ajes bilirim. Uwa Amna jei se nesiktene, ane Ai Uwafar ga As ge fortya jemnibe, ane jebar ga nesa nwini.

24Jengga angtane As jei nesikteyeneiserem, jei jam eyebiyen Ai Ajes bilirim. Taterisi Amna ijesa sarbilirim jeke Amanfenna. Fas, jei Uwamana, Uwa Ai As Jei baftannuntum.

25Seyafter aaiserem Ai ibe Ajes nasipminirim, aas jepserem Ai ibar negalaba nwinirim.

26Jengga Uwa Amna Jei se baftafa Angtane is Jei batobaabife, Jeiba Mafnana Uwa Sanbagirmana. Uwa Sanbagiri Jei Mafnana se baafulnu, aam temawer Ayam gunu. Mafnana Uwa Sanbagirmana is towas-towastababili seyafter bunarsusfer jeiserem, ane Jei ga is Jei se batobaabili, jega aamei ijama dirinswebabiyen seyafter Ai isa jes nasipminirim ibe.

27Ai As eyebili jega ini imna samfer ga isege folbamini. Ini Amna Ase samfer folbana, ane aaiserem Ai ip golmini. Ai isa jes golminirim ibe, enggamyan ini samfer is jam ge folbamiyen, angtane enggalaiserem Ams tebayanaiserem ogiribe. Ini imna kabwakfer is jam ge folbamiyen, ane ijama ereyen.

28Aamei imesma sara Ai enggame Ajes gutenaram, 'Ai Ase sofwa, jengga Ai gamjon imnibe As waraufalsanya.' Afa aamei As jam isa nesiktenerem, aamei ga ini saaser-saasersus is gam sege folbamini, aam temawer Ai Uwa Sanbagirminibe As gwina. Ai sanbagiri, jengga Jei sanbagirsusu Amniwer. Ga jem temawer Ai sofwa Jemnibe.

29Ai namwer ga ibe isa jes bilipmini gwanan nalefe seyafter jei jam ge etamwebiyen, jega galap jam aa jep ge etamwebilirim, aamei ga isa taabili Ai Ajes bilirim ba bunaram.

30Ai gamjon ibar abakfer nejama nasouyan, aam temawer bawasa ogiri aaiserem jem sanbakef aa jei nwinirim jei gase fortya. Jengga jemna baabeta Amnibe fas.

31Jengga Ai jeber-jeber Agam eyebuwena seyafter Uwa aa jes gam bilirim, jega angtane ogiri aaiserem jebe jei sege towaswebili Ai Uwa As nesiktene. Sya, au ganma sofwe."


  Share Facebook  |  Share Twitter

 <<  Yohanes 14 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel