Alkitab Mobile SABDA
[VER] : [BERIK]     [PL]  [PB] 
 <<  Yohanes 16 >> 

1Taterisi seyafter aaiserem is Ayam towas-towasulmini, jega aamei jewer ijama tikweyan Amter isa tikwebaatini.

2Aamei saf isa sofwa jena angtane Yahudimana aa jep ge betwebuwefaram, jengga angtane jebe isene balbabili enggame, 'Ipsama kaunaram aafe!' Jei ke jetefener. Nunu galap-galap jemserem angtane ga isene munbobili, aamei As ijeya tebanaram. Jepga jei ga enggam sene balbabili, 'Ai awelna Uwa Sanbagirmana ga ajesa gwebili.'

3Jei kapka jeiserem jes ne eyeipmini aam temawer jei Uwa Sanbagiri ane Ai As jam ne towaswemiyen.

4Taterisi aaiserem Ai is Ajes towas-towasulminirim galap gase etamwesa. Angtane kapka jame is jep ne eyeipminirim ibe aamei ga enggam isa gusu, 'Tuhan abe gwanan as gam bilipminintim, aaiserem ga je etamwena.'

5Jengga Ai namwer Ai Ajam warauwa Alem Uwaminip Ai As Jei baftannuntum. Gam jega, jeje bafa aamei As ijama tenebayan, 'Aamei Ifwir gwina?'

6Ai isa mesam balbabili enggame Ai gamjon As sofwa. Ga jem temawer ini imna is mes ge jenbamini.

7Ini imna safe is jam sege jenbamini, Ai is Ajes nasipminirim jeba bunaram ga enggam: Sofwera Amna jeba waakena ilem temawer. Afa Ai Ajam sofweyanaye, Ai Angtane is Jei batobaabife Ai Ajam baftanayan. Afa Ai jam As sofwaram, Ai Jei ga As baftatna imnibe.

8Jei aa jep fortyaram, Jei enggam gase gweraulmisi angtane ogirip aa jei ge nwinbenerem jebe jei etam-etama kapka mes ne eyebili. Jeime Am temawer ibe ise gweraulmisi enggame, Uwa Sanbagiri aa jes bilirim Ai bunarsusfer jeiserem Ai jetefeneram eyebili. Ane Jei Uwa Sanbagirem temawer enggam gase gweraulmisi, Uwa Sanbagiri Jei angtane kapka aa jei gane eyebilirim, angtane jeiserem gase tamtamtababisi.

9Jei angtanefe enggam gase gweraulmisi, jei etam-etama kapka mes ne eyebili aam temawer jei Ai As jam ne tebayan.

10Jei enggam gase gweraulmisi Uwa Sanbagiri aa jes bilirim Ai bunarsusfer jeiserem Ai jetefeneram eyebili, aam temawer Ai Ajam sofwa Alem Uwaminibe, ane aamei gamjon Ai As ijama damtayan.

11Jei enggam gase gweraulmisi Uwa Sanbagiri Jei angtane kapkaiserem jes tamtamtababisi, aam temawer Uwa Sanbagiri mes gunu enggame, Jei bawasa se tamtamtasa, bawasa angtane kapkaiserem jem sanbakfe aa jei nwinirim.

12Ai taterisi unggwanfer nafsiserem ibe isa jam nasipmife, jengga namwer aas jepserem aamei gemerje ijama taabiyen.

13Jengga Mafnana Uwa Sanbagirmana taterisi bunarsusfer aaiserem aa Jei nasounaram, Jei aa jep fortyaram, Jei taterisi seyafter bunarsusfer aaiserem ga ise towas-towasulmisi. Jei taterisi Jelemmanfenaiserem Jei Jam nasbiyen. Jengga Jei aa jes sarbisinirim Jei jeiserem ga jes nasbili, ane galap aa jei etamwesaram jes mese ibe is nasipmini.

14Ai Ajes bilirim ane Ai Ajes eyebiliserem, Jei ibe is towas-towasulmini. Jei game aa jewer towas-towasulminirim, jepga angtane ga enggam sege gubili, 'Yesus Jeiba sanbagirsusum!'

15Seyafter Uwa Sanbagiri aa jes bilirim ane aa jes eyebilirim, Ai ga Agemer gunu ane Aime Agemer eyebili. Ga jem temawer Ai enggam Ai gunu, seyafter Ai Agam gunurum ane Agam eyebilirim, Mafnana Uwa Sanbagirmana Jei seyafter jeiserem imse towas-towastababisi.

16Abakferyan aamei gamjon As ijama damtayan. Jepga nunu unggwanferyan gamjon As isa damtafa."

17Jepga ai angtane Jei ajeya tikwebaatinennerem ai ana ga aya taanaaminenne, "Jei nebe nes bas bilipmini enggame, 'Abakferyan aamei gamjon As ijama damtayan.' ane 'Nunu unggwanferyan gamjon As isa damtafa.' ane 'aam temawer Ai Ajam sofwa Alem Uwaminibe'?"

18Ai ana gemer aya taanaaminenne, "Aa jei bagal taterisa enggame, 'Abakefyan' ane 'Nunu unggwanferyan'? Nei nejama towaswebiyen Jei nebe nes bas bilipmini."

19Yesus Jei mes towaswena enggame ai safe ajesa tenaibefe, ane jega jem temawer Jei ga as balbabili. "Ai isa mesam balbabili, 'Abakferyan aamei gamjon As ijama damtayan. Jepga nunu unggwanferyan gamjon As isa damtafa.' Aamke taterisi jeiserem ina ga ijem temawera taanaaminenne?

20Ai taterisi isa Ajes nasipminirim jeba bunaram. Ai Ajep tererem, aamei jepga uskambar isa syawena, jengga angtane nafsi ogiri aaiserem jep aa jei ge nwinbenerem jemna ini saaser-saaserfer sege folbamini. Ini imna gwanan jam sege jenbamisi, jengga galap ini imna gamjon isege saaser-saaserswebamini.

21Wini jame jena aa jep gam enolaram tane jam gerefe, jei ga jam gam syena aam temawer jei jena siginsusfer gam enola. Jengga tane jemna jam gam surnurum, jei sigini jemna gamjon jam sarbistaabonyan. Jemna ini saaserfer falbili aam temawer tane jemna mes surnu.

22Aamei mese jemba gamam. Namwer aas jepserem ini imna ga is jam ge jenbamini, jengga Ai gamjon jam As nwensanswenaram terewer, jepga gamjon ga isAs damtabisi, ane ini imna saaser-saaserfer isege folbamini. Angtane afa fas ini imna saaser-saaserfer jeiserem is jei uftabaipmife.

23Ane nunu jes jepserem, aamei taterisi Abe afa As ijama taanaibeyen. Taterisi aaiserem Ai isa Ajes nasipminirim jeba bunaram, apgal jigala Uwa Sanbagirminiwer ijesa balbabilirim, seyafter jeiserem Uwa Amna Jei ibe is golmisi, aam temawer aamei Am tefner As ijewera tebanaram.

24Gwanan aamei Uwa Amnaiserem ijama balyan Jei apgal jigala ip is Jam golmife aam temawer aamei Amtera tebana. Jengga namwer aas jepserem sa bil, ane Jei ga is golmini, jega ini imna saaser-saaserfersus is ga sege folbamini.

25Taterisi seyafter aaiserem is Ajes nasipminirim ibe, seyafter ga is Ajamfener syetabaipmisini. Jengga abakferyan, Ai jamfener is Ajam syetabaipmisiyen. Jes jepserem Ai bunarsusfer ga isAs towas-towastababili Uwa Amnaiserem jem temawer.

26Jes jepserem aamei Uwa Amnaiserem ga isa bala, aam temawer aamei Amtera tebana. Ane aamei ijesa bilirim jeiserem Ai Uwa Alemanaiserem Jep Ajam bilibeyen.

27Uwa Amna Jei is sarbabisi, aam temawer Jei ims nesiktababili. Aamei Ams isa nesiktene, ane aamei imsama gununt, 'Bunar Yesus Jei Uwa Sanbagirminiweram jela.' Ga jem temawer Uwa Sanbagiri Jei ims nesiktababili.

28Ai Uwaminiwer Amsam iretyant, ane Ai enggalf Ai fortyant angtane ogiri aaiserem jebe aa jei ge nwinbenerem jebar Agma nwinf. Jengga namwer aas jepserem Ai ogiri aaiserem ga As firtetefala, ane Ai gamjon ga As warauwa Uwa Alemanaiserem Jemnibe."

29Jepga ai angtane Yesus ajeya tikwebaatinennerem ga aya bala, "Namwer aas jepserem taterisi Aamei Ijes nasbilirim, taterisi jeiserem jeme waakenfer ga as jem Im gweraulmini. Ane jamfener gamjon Ijam syawulsiyen.

30Namwer aas jepserem ai amsama towaswena enggame, Aamei seyafter gemerserem Imesam towaswena. Aamei itana amna as Imes towaswebaipmini ai nalef Is ajama tenebayan, gam jega angtane afa fas Is jam ne tenebayan. Jega jem temawer ai amesa taabili Aameiba Uwa Sanbagirminiweram jela."

31Yesus jei ga as tamawolbaabili, "Wa, aamei Ase imesma tebana.

32Gasa sar! Babitsim aamei seyafter ga isa nunggiri ilem jenabe. Aamei Anfentowai As isa mirtetefala. Jengga Aike Anfentowai As nwini. Fas, Uwa Amna Jei Abar ge nwini.

33Taterisi seyafter aaiserem Ai ip nasipmini jega ini imna waakenfer ga isege folbamini, aam temawer aamei daamfennaber Abar ga isa gwena. Jame isa nwinirim ogiri aaiserem jebe, angtane Ams tebayanaiserem jei kapkaiserem ibe ga isene eyeipmini. Jengga ipsama ernerem! Ai Ames amsonbana baabeta bawasmana ogiri aaiserem jebe."


  Share Facebook  |  Share Twitter

 <<  Yohanes 16 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel