1Inja, naek srar, mko ḇenadiwarek nko, insa Manseren wos ḇyedi irwuren ma imbran kuker payamyum rofandu mko.
2Ma insa nkosma faspar ro ḇefrur fafardun ma snonkaku ḇeḇarḇor, snar snonkakusya saksma kakyar kam ḇa.
3Manseren ikada i kaḇaḇaḇ. Nari ḇyuk samambraḇ ma i ḇriwarek mko ro ḇeḇarḇorsya.
4Ma nkokyar faro Manseren, mboi rosai nkanun faro mko kwar, nari mkofrur pdefna.
5Ma Manseren ikfin mko faswef rarirya ḇesyakwar faro Allah saswar ḇyedi kada, isof Kristus kananon ḇyedi.
6Ḇape nkanun faro mko, naek srar, kuker snonsnon Manseren Yesus Kristus, insa mkoḇinkwanbur naek ono ḇefrur fararur sena ḇa ma ḇeḇeuser farkarkor mkosma kwar ro nko anna ḇa.
7Snar mankun mkofawi, rariso nari mkoso kankenem nkoḇena. Rofyor nkoisya rofandu mko nkofararur myaren kaku.
8Ma nkan snonkakusya roḇeyan sena waworek ḇa, mboi nkoḇesewar rawo nkardomes ro roḇ meser, insa nkofrur kandera awer oso ro mko.
9Nkosma hak fankor fafnoḇek faro naek srar kako, ḇape nkor ḇa, snar nkomarisen nkoḇe fasasna faro mko, insa mkoso fasasna ani.
10Snar, rofyor nkoisya rofandu mko kako, nkoḇuk swarapepen ine faro mko kwar: Rofyor snonkaku oso imewer ifararur, dakanan awer.
11Nkokofen radine snar nkomnaf, mboi ono sisya sikenem kuker aunosḇa ma sifararur ḇa, mboi ssombirek kuker roi ḇeḇefandun ḇa,
12snonkaku ḇerariryasya nkoḇuk swarepen ma anun kuker Manseren Yesus Kristus, insa siknon ma sifrur faswef fararur sena ma rarirya nari sanan ro mankunsi.
13Ma mko, naek srar, mko papum fasaw awer mkofrur fararur ḇeḇye.
14Rofyor snonkaku ono simewer simnaf rosai nkokofen ro syap ine, mko kakop si (mko fasepen si) ma mkokenem awer kuker si, insa simai,
15mboi mkokara si ḇembroḇ awer, ḇape mkosonek si imnis naek mkoḇesirya.
16Manseren ḇeḇeknam aski-fakamaman, ani ḇyuk aski-fakamaman ḇyedi ro roi ḇeḇor kam, faro mko kada. Manseren ryowus mko kam kada.
17Aroo ro aya, Paulus. Aroo ine mankundaya yafas ḇardi. Ine aḇyair ro syap ḇeḇor ayena.
18Ma saswar fnoḇek fakamaman ro Manseren koḇedi Yesus Kristus, ryowus mko kam kada! Ro nko, Paulus, Silas ma Timotius