1Snar rarirya, ne, romawa mko, indo mkosouser sasoser ro sna-kma mkoḇesi snar Manseren.
2Mkoḇesyowi sna-kma mkoḇesi -- ine kada sasoser ḇeḇefandun ro asas ine:
3insa mkosma aski ma kankenem ḇekwan ro supswan ine.
4Ma kma mkoya, mkomsor awer romawa mkoḇesi, mboi mkofarkor si kuker farkarkor ma ananun Manseren.
5Ne, manfamyan mkoya, mkosouser tuan mkoḇesi kuker makakak ma radadai kuker sne ḇeḇye ro supswan ine, imnis raris mko souser faro Kristus,
6ma mkoso user ro ḇarpon sena monda awer fa mkofrur sneprei sisnesna, ḇape mkomnis manfyan faro Kristus inja mkofrur Allah marisen ḇyena kuker sne ḇesiper,
7ma ḇemarisen ḇefrur afuffarmyan ḇyedi imnis snonkaku ḇeyuffarmyan faro Manseren mboi faro snonkaku ḇa.
8Mkofawi, mboi snonkaku oser-oser, iḇye manfamyan, iḇye kako ḇemkei, rofyor ifrur roi ḇeḇye oso, nari isma munsu ḇyedi ro Manseren.
9Ma tuan-tuan mkofrur rarirya kako faro si ma mkosawen masasor. Mkoswarepen, mboi Manseren sedi ma Manseren mkoḇedi isya ro boiyaswa ma ikada snonkakusya simnis kam.
10Ḇarpurya, mkosambraḇ kuker papoik ro Manseren.
11Mkuf Allah romamun ḇeḇor fyasos faḇyuk faro mkona, insa mkofarmku mkosampum Ibiris ankarkar ḇyena;
12snar kofaḇri fakosampum snonkaku ḇa, ḇape kosampum samambraḇ ḇeḇuk sasoser, ḇesma papoiksya, ḇeḇeḇru ro supswan ḇepampan ine, rur ḇeḇarḇor ro farsyos sansoren.
13Snar rarirya mkun Allah romamun ḇeḇor fyasos na, insa mkosambraḇ mkoḇuk sampum ro ras ḇeḇarḇor ani ma mkores nako, famkokfrur mnis roi ḇeḇor kam kwar.
14Inja mkores nako, mkoḇoḇek roi ḇeḇoḇek napnapesya ma mkosansun-sansun embroḇ napnapesya,
15mkosower mkowemna kuker roi ḇesower wemin, ma mkoḇaryas Ankankinem Ḇeḇye ro askiya.
16Rofafisu nakam mkun adai kakyar snar kuker adai ani nari mkofasye ikoi ḇesak nakam ro Ibirisya;
17mkosaswo ḇaḇeaskiya imnis roi ḇesaswo ma Allah wos ḇyedi imnis sepada Rurya,
18mkofrur nakam kuker nadi famkor fafnoḇek ro Allah. Mkonadi kada rofafisu nakam kuker Rurya ma mkomnai awer ro nadi ma fararyor faro snonkaku ḇeḇor ḇesrensya,
19ma aya kako, insa yasma wawos ḇemnis, rofyor yaḇas sḇadon ayedi, yasma fakamaman ḇenapes, insa yaḇri yaḇaryas kankunes Ankankinem Ḇeḇye,
20yuffarmyan imnis manwawan sḇefa ḇesmai. Mkonadi kada insa kuker ḇri yaḇaryas i, imnis moḇ yawos rai.
21Insa mkofawi rariso ro mankundaya ma rariso ro dine, nakam nari Tikhikus, naek koḇedi yaswar ani ma ḇefnoḇek aya ro afuffarmyan ro Manseren, nari ikofen ḇadir faro mko.
22Kuker kakara ine yawan i faro mko insa ikofen ḇadir rariso kuker nko faro mko ma iwos sneprei mkosnemna.
23Aski ma saswar kuker kakyar ro Allah, Kmaya ma Manseren Yesus Kristus ryowus mko kam.
24Iḇye Allah ḇyeḇok naek srar mko kam kada, ḇeswar Manseren koḇedi Yesus Kristus kuker saswar ḇekain fyoro-fyoroya. Ro aya Paulus